Naon beja nu haneut ayeuna? Salah sahijina Laporan Majalah Tempo perkara rekening "teu wajar" para Jenderal Pulisi. Laporan majalah Tempo ieu nyababkeun pulisi siga nu "janggotna kahuruan", biasa bela diri jeung arek nuntut Tempo sacara pidana jeung perdata. Anehna nu dimasalahkeun ku pulisi teh lain eusi beja laporanana tapi coverna majalah Tempo, nu ngagambarkeun saurang jendral pulisi nuntun (disered) babi ...hehehe. Ceuk saurang panggede pulisi cover eta ngahina Pulisi, sabab nyaruakeun pulisi jeung babi.
Wah sigana gara-gara laporan Tempo ieu, Pa Pulisi jadi sensitip pisan, tepika gampang kasigeung. Poho yen geus ti baheula mula, urang Indonesia sok neundeun duit dina cengcelengan. Sedengkeun kecap /cengcelengan/ sigana tina kecap /celengan/ -> /celeng/ nu hartina bagong. Jadi gambar babi dina cover eta ngalambangkeun tempat neundeun duit alias rekening ..heuheu. Saena mah Pa Pulisi lamun bade tantat-tuntut teh diemut heula, ulah maen peletak nyarios di media asa disaruakeun jeung sato/bagong. Karunya ka pulisi-pulisi nu balageur, jadi kabawa-bawa "diseungseurikeun". Wilujeng Tepang Taun Pak Pulisi! Baktos, WALUYA
