Urang diajar sajarah Islam, yu!, sugan moal combrek kieu. Kuring rek ngadongengkeun sakanyaho kuring, yen baheula kungsi kajadian antara Khalifah (pamimpin spritual agama Islam) jeung pangawasa (sultan) dijabat ku beda jelema. Jadi ngaharib-harib siga agama Katholik, aya Paus, salaku pamimpin agama, jeung aya deui Raja salaku pamimpin nagara. Caritana kieu, waktu di taun 1258 M, Puseur Kakhalifahan Abbasyiah, Bagdhad diserbu Bangsa Mongol bebeakan. Khalifah Al-Musta'shim Billah (640-656 H/1242-1258 M) perlaya ku tantara Mongol. Akibatna Kakhalifahan Islam jadi vakum.
Di jaman harita, di Mesir ngadeg hiji dinasti karajaan, disebutna teh Dinasti Mamluk. Urang Mamluk sabenerna aslina urang Turki. Marenehna tadina budak beulian nu dijadikeun tantara keur kaperluan pertahanan para Khalifah. Tapi lila-lila para budak ieu ku kamampuanana mangaruhan tantara sejen jeung rakyat, ngangkat diri jadi Sultan. Dinasti Mamluk mimiti ngadeg taun 1249 M (jadi 10 taun samemeh Bagdhad diserebu Mongol). Saeunggeusna Bagdhad ancur, Mamluk nu sultanna Sultan Baybars perang jeung urang Mongol tepika urang Mongol bisa dielehkeun. Sultan Baybars saterusna neangan sesa turunan Khalifah Abbasyiah, nyaeta Akhmad, nu saterusna dibawa ka Mesir terus diangkat jadi Khalifah jeung sang Sultan sumpah ngajangjikeun kasatianana. Ku jalan kitu sang Sultan boga Legimitasi ti Khalifah dina mimpin nagara. Tah ti saprak harita jabatan Khalifah jeung jabatan Sultan teh misah. Kunaon lain Sultan Mamluk wae nu ngajabat kabeh dua jabatan ieu? Sigana mah urang Mamluk teu wani ngalanggar aturan yen Khalifah teh kudu ti Suku Quraisy (cenah mah ieu teh hadist Nabi). Cukup lila dinasti Mamluk kawasa di Mesir ti taun 1249 M tepi ka 1517 M (150 taun leuwih). Kakhalifahan Abbasyiah oge tetep ngadeg di Mesir, sanajan para sajarahwan nyebut para Khalifah ieu, Khalifah "boneka", da puguh teu boga kakawasaan nanaon, ngan diperlukeun keur ngalegimitasi kakawasaan Sultan Dinasti Mamluk wungkul. Kacaritakeun di Turki, mimiti ngadeg hiji Dinasti nu kasohor Dinasti Turki Usmani atawa sering oge disebut Turki Ottoman. Nu ngadegkeun dinasti ieu aranna teh Usman nu ngangkat diri jadi Sultan di taun 1288 M. Dinasti ieu mimiti mah wilayahna leutik, tapi ku kamampuan perangna jadi ngalegaan malah akhirna bisa naklukeun Konstantinopel. Waktu turunan Usman, Salim I jadi sultan, Turki Ottoman nyerebu karajaan Mamluk di Mesir, karajaan ieu taluk di taun 1517 M. Harita nu jadi Khalifahna Al-Mutawakil. Al Mutawakil ku Selim I "digusur" ti Kairo ka Konstantinopel, geus kitu dipaksa kudu nyerahkeun jabatan Khalifahna ka Selim I, nyaeta ku jalan nyerahkeun Pedang jeung Jubah Kangjeng Nabi Muhammad. Tah ti saprakna harita jabatan Khalifah jeung Sultan dijabat deui ku saurang sanajan Salim I teu boga teureuh ti Suku Quraisy (Nu hartina ngalanggar aturan (hadist) yen Khalifah kudu ti Suku Quraisy). Jeung ti saprak harita kota Konstantinopel (Bizantium memehna mah) aranna diganti jadi ISTAMBUL. Dinasti Kakhalifahan Turki Ottoman kawasana lila, tepika ambruk di taun 1924, ku Mustafa Kemal Attaturk. Pedang jeung Jubah Kangjeng Nabi, cenah mah masih aya keneh tepika ayeuna, nyaeta di museum Topkapi (urut istana para Khalifah) di Istambul. Cag ah, koreksi lamun aya nu salah ..... Baktos, WALUYA
