Kabayangkeun abah waluya ngarenjag, lamun nu gehgeran mah bisa kacaletotan nyebutan nu jorang
Punten banyol he From: kisunda@yahoogroups.com [mailto:kisu...@yahoogroups.com] On Behalf Of Waluya Sent: Thursday, September 16, 2010 12:23 AM To: kisunda@yahoogroups.com Subject: [kisunda] Nakol Bedugna Beda Saminggu samemeh lebaran, ngadadak kuring kudu ka Surabaya. Rada wegah sabenerna mah kudu indit-inditan di bulan puasa teh, komo ari geus duekeut ka poe lebaran, tapi teu bisa nolak da parentah "pangab(utuh)" ...hehehe. Ti Bandung make mobil opat urang, kaasup supir. Inditna poe jumaah tas saur, da niat teh arek puasa we sakuatna. Jalan nu nu dipilih jalan Pantura, lumayan gancang, jam 11 geus tepi ka samemeh kota Kendal. Didinya neangan masjid rek ngilu jumaahan. Kabeneran pisan manggihan masjid gede disisi jalan, poho deui aran tempatna mah. Nya eureun didinya, mobil bisa parkir di hareupeun masjid pisan. Kuring langsung ka tempat wudu, nu lumayan alus jeung bersih, terus asup ka jero masjid, maksud teh rek langsung solat sunat. Di jero masjid kuring nempo bedug mani gede pisan lengkep jeung kohkolna. Kulantaran geus jarang pisan kuring ngareungeu sora bedug, jadi panasaran hayang ngadenge sorana waktu ditabeuh, kuring ngahaja milih tempat deukeut bedug, hareupeunana, padahal di hareup masih karosong keneh. Jam 12 kurang 20 menit, lamun teu salah mah, tukang nakol bedug, nu make samping jeung kopeah, ngajurungkunung tina diukna, kop kana panakol, terus nabeuh kohkolna, torongtong ..tong..tong ...dur!. Beg teh dada kuring asa aya ninggang, bakating ku eundeur. Dur ..dur ..dur.dur dur, bedug ditakolna beuki ngerepan, tepi ka sorana merekpek, geus kitu irama nakolna teh ngajarangan deui kira kira lamun didetikan mah 5 detik, 10 detik, 15 detik ...40 detik ..samenit ..jep weh jempe. "Ah meureun enggeus nakol bedugna teh", pikir kuring, nu siap-siap rek ngareungeukeun nu khotbah, naha make basa Jawa atawa Indonesia. Na atuh, Dur ...deui wae bedug teh ditakol deui, kuring tepi ka ngarenjag. Dur ...dur ..dur bedug ditakol ngerepan deui, geus frekuensina kerep pisan, kakara ngajarangan deui, tepi ka intervalna aya 2-3 menitna. Ari sugan teh geus rengse, na ari pek teh dur deui wae, ngerepan terus ngajarang deui, kakara rengse, eureun. Kuring nempo arloji hayang nyaho sabaraha menit "proesesi" nambeuh bedug di lembur urang Jawa teh, euleuh geuning lumayan lila, aya kana 10 menitna da jam kuring nunjukkeun ampir jam 12 pas. Irama nakolna kira-kira ngerepan-ngajarangan-ngerepan-ngajarangan-ngerepan-ngajarangan .... Rada aneh oge, sanajan irama nakolna ampir sarua jeung di lembur kuring, tapi di lembur kuring mah (baheula) teu lila kitu. Tapi duka upami di lembur sejen di tatar Sunda mah. Nu jelas, ayeuna, di Bandung atawa di lembur kuring di Sumedang geus tara ngareungeu deui sora bedug. Baktos, WALUYA
