Waalaikum salam, wr, wb. Uda Haji Zul Amry Bandaro Malin di Jimbaran Bali, Uda Bandaro Malin pulo nan ambo imbau, sungguahpun Uda Haji sorang nan taimbau, dek kito mangecek di palanta ko, mako ujuik imbauan ambo tu adolah kapado kasado sanak sudaro, handai tolan, Niniak Mamak nan gadang basa batuah, Bundo kanduang limpapeh rumah nan gadang, Cadiak pandai tampek batanyo kalau ka pai tampek babarito kalau ka pulang, Alim ulamo suluah bendang dalam nagari sarato urang sumando nan capek kaki ringan tangan, andan pasumandan, bako jo baki nan talingkuik dek palanta RN ko nan dihubuangkan dek kotak ajaib nan ado dihadapan kito dan jari tangan nan manari-nari diateh tust keyboard masiang2. Satantangan Sabaleh (11) syaraik manjadi Pangulu nan Uda Haji sampaikan dibawah cako, nampaknyo alun kasadonyo ado diambo, ambo bukan urang cadiak pandai (syaraik no.5), bukan pulo alim ulama, indak pulo saudagar kayo nan mandehnyo kayo bapak batuah (syaraik no.7). Nan ado diambo kini adolah syaraik no.1 sampai no.4. Syaraik No.6 sadang dipelajari jo Mamak2 sarato Datuak2 nan senior di kampuang, No.8 jo 9 sadang meng up-grade diri seperti nan diharokkan, No.10 alah dibagi tugas Datuak nan pai karantau sarato perangkat suku nan lain nan tingga dikampuang seperti : Datuak Okie (Wakil Datuak), Bundo Kanduang, Wali Rumah dan Bendahara suku (dalam hal ko tugasnyo mangumpua kan dana dalam rangka managakkan kembali rumah gadang nan alah runtuah) dan terakhir syaraik no 11 masih dalam tahap pembelajaran taruih manaruih agar menjadi urang nan saba dan lapang dado. Jadi sakali lai ambo pribadi maucapkan tarimo kasih dek ambo alah diberi bekal, maklumlah manusio di dunya ko indak ado nan samparono. Dan tarimo kasih juo ka dunsanak nan lain nan alah mendoakan alek batagak pangulu disuku kami tu berjalan dengan sukses. Hanyo Tuhan nan dapek mambaleh budi baiak dunsanak.
Wassalam, H.M.Dt.Marah Bangso (47 +) ----- Original Message ----- From: "amry1948" <[EMAIL PROTECTED]> To: <[EMAIL PROTECTED]> Sent: Wednesday, November 24, 2004 6:50 PM Subject: Re: [EMAIL PROTECTED] Batagak Panghulu (Kok dapek) Assalamualaikum wr.wb : Ambo juo mengucapkan : Salamek ateh pangangkatan / pengukuhan Sanak Haji Mulyadi manjadi Pangulu kaum Suku Limo Singkek Nagari Sulik Aiea , dengan gelar Datuak Marah Bangso. Tapiliahnyo sanak Mulyadi manjadi pangulu ibareknyo "lah satantang barih bana tibo paek " , aratinyo lah sasuai bana jo alua dan patuik sarato adek nan balaku . Walaupun ambo sacaro parsonal alun pernah batamu muko jo Datuak kito ko , tapi dari kiprah baliau salamoko dirantaunet , dapet kito simpulkan bahaso baliau ko alah mamanuhi syarat untuak manjadi pangulu diantaro sabaleh syarat nan ado : 1. Diangkek sacaro adek 2. Urang nan barasa dari kaum suku nan maangkek 3. Laki - laki 4. Punyo sako / gala pangulu 5. Bailmu 6. Tahu saluak baluak adat nagari 7. Punyo harato atau kayo 8. Randah hati , kasih jo sayang terhadap sesama. 9. Santun dan fasiah kalau mangecek 10. Tahu jo bidang tugasnyo 11. Lapang dado , sabar dalam batindak. Kok dapek , sasuai jo harapan Sutan Sinaro , tambahan dari ambo ciek lai , bahaso urang nan jadi pangulu tu saharusnyo iyo "Pamai'( apokoah istilah dalam bahaso Indonesianya , kalau tak salah begini urang nan jadi pangulu harus rajin menghadiri undangan dikampuang , antah baralek kawin , atau manghadiri urang kamatian maupun acara suka duka nan diadokan dek rang kampuang ) , Karano pangulu disamping mawakili pribadi dan kalurganya juga mawakili kaum . Kalau saorang pangulu indak pamai , mako tibo giliran beko maadokan alek dirumah anak kamanakan atau apolah namonyo mako dibaleh pulo deh pangulu suku nan lain , bisa - bisa langang alek jadinyo . Satantang M . Dt Marah Bangso indak manatap dikampuang , sabananyo indak manjadi masalah bana , karano dengan kalancaran sarana teknik komunikasi kiniko , jarak antaro Palembang jo Sulik Aiea taraso dakek , kalau ditampuah bisa babaliak hari . Sakali lai salamek manjalankan tugas , semoga sukses ! Wassalam : h . zul amry piliang bandaro malin. ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
