Ass,wr,wb, Mamak Ambo Mak Boes di Kutub Utara dan dunsanak di Palanta, seperti nan ambo sampaikan di pembukaan album foto ambo tu bahaso itu baru sebahagian (belum semua foto ambo up-load) dari foto2 pado acara Batagak Pangulu di kaum/suku kami tu. Kebetulan nan alah di up-load tu foto2 nan banyak nuansanyo berpakaian urang ka baralek (memang aktualnyo kami baralek sakali lai, basandiang jo rang rumah untuak nan kaduo kalinyo), tapi itu sebagian kecil dari seremonial acara Baralek Batagak Pangulu tu Mak.
Dapek ambo utarakan (bukan selatan) disiko agak saketek (maaf indak komplit bana), urut2an ceremonial Batagak Pangulu nan biaso balaku di kampuang kami Sulik Ayie (antah ko lah dinagari lain, mungkin agak babedo). Urutan tersebut adolah : 1. Setelah Pangulu adat nan terdahulu mangkat (maningga), seluruh anak-kamanakan nan ado di kampuang mangadokan musyawarah mancari sia ka paganti Pangulu nan sadang kosong tu. Biasonyo musyawarah ko diadokan wakatu acara pulang basamo sasudah lebaran. 2. Sasudah calon didapek, mintak kesediaannyo untuak memimpin kaum, disuku kami, ambo nan ditunjuak mintak wakatu agak satahun untuk sosialisasi pengenalan diri ambo ka anak-kamanakan baiak nan ado di kampuang maupun di rantau. 3. Sasudah sosialisasi jalan dan pendekatan diri ke KAN dan anggota2 nyo, mako diaturlah jadwal prosesi acara pengangkatan dengan Ketua KAN dan Datuak Suku nan ado di Kampuang. 4. Acara nan dikampuang, biasonyo kito buek menjelang dan sesudah Lebaran, sebab disitu banyak anak-kamanakan kito nan pulang ka kampuang dari rantaunyo masiang2. Acara-acara nan dikampuang dibuek dibagi lagi dalam beberapo tahapan yaitu : a. Rundingan urang nan saparuik, aratinyo rapek anak kamanakan nan sarumah gadang dalam menghadok' i alek dan persiapan apo2 sajo nan diparalukan. b. Rundingan jo Pangulu dan Datuak Niniak nan sakaropok jo kito mancari kato nan saiyo. Paralu ambo jalehkan di Sulik Ayie terdiri dari 4 (ampek) suku dan dari satiok suku itu dibagi lagi menjadi beberapo Datuak Niniak nan saka ropok, biasonyo ado nan 3, 6, 8, 9, 13 dan lain-lain. c. Pancakauan, adolah rundingan sekaligus acara pelantikan manjadi Pangulu oleh Suku kito. Ambo adolah salah satu Datuk Andiko di Karopok urang Nan sa-8 dari Suku Limo Singkek. Pado acara ko bakumpua sagalo Pangulu nan ado di Suku Limo Singkek, jumlahnyo 38 urang Sekedar informasi : Struktur dan Jumlah Pemangku adat di Sulik Ayie - Suku Limo Panjang, Urang nan Ampek Jinih = 4, Datuk Ninik = 3, Datuk Andiko = 19, Total = 26 - Suku Limo Singkek, Urang nan Ampek Jinih = 4, Datuk Ninik = 4, Datuk Andiko = 30, Total = 38 - Suku Simabur, Urang nan Ampek Jinih = 4, Datuk Ninik = 4, Datuk Andiko = 18, Total = 26 - Suku Piliang, Urang nan Ampek Jinih = 4, Datuk Ninik = 4, Datuk Andiko = 17, Total = 25 TOTAL Urang nan Ampek Jinih = 16, Datuk Ninik = 15, Datuk Andiko = 84, seluruhnyo= 115 Pado tahapan Pancakauan ko seseorang sudah resmi menjadi Pangulu di kaum nyo dan didalam Suku nyo, dengan dilakekkannyo baju kebesaran Pangulu dan Sumpah Pangulu. Istilah dikampuang kami "Gadang Garundang di Kubangan" d. Perjamuan, adolah acara rundingan sekaligus pengenalan kapado saluruah Pangulu di ampek suku nan ado (115 urang) dan urang kampuang, acara ko dimulai dengan bararak sakuliliang 4 koto nan ado di Sulik Ayie (+/- 5 KM bajalan kaki) dikawal oleh Datuak Ninik dan Datuak Suku kito diiringi rombongan urang rumah kito dengan pakaian suntiang sarato Junjungan Bungo Sirih nan pado acara kami tu ado sebanyak 11 Bungo Siriah, bararak sepanjang 100 meter panjangnyo arakan. Salamo perjalanan diselingi dengan gua talempong dan gandang. Arak-arakan ko berakhir di Rumah Gadang dan langsuang diadokan perjamuan. Dimano syarat untuak Datuak Andiko harus potong kambiang, mako kambiang alah dipotong ditambah dagiang sapi secukupnyo untuak dihidangkan diperhelatan tu. Urang nan makan hampia sanagari termasuk para pangulu tadi. Istilah dikampuang kami "Gadang Buayo di Muaro" Foto2 nan alah di Up-load tu banyak pado sesion iko, jadi banyak nan bapakaian urang baralek. e. Hari berikutnyo, Naiak ka ateh Balai, Balai disiko bukan pasa tapi adolah Balairung sari, tampek seluruh Pangulu / anggota KAN bermusyawarah dan mufakat. Disiko diresmikan Pangulu nan alah diangkek dek Suku nyo manjadi anggota KAN nagari Sulik Ayie, tagak samo tinggi duduak samo randah jo pemangku adat lainnyo. Istilah dikampuang kami "Gadang Paus di Lautan" f. Ceremonial terakhir adolah bajalan bakuliliang masuak ka Balai/Pasa nan di Sulik Ayie biasonyo pado hari Jumahaik, disiko kito memperkenalkan diri ka masyarakat bahaso kito alah diangkek manjadi Pangulu adat, sahinggo sasudah acara tersebut indak ado lai warga nan ado dikampuang indak tahu samo kito bahaso kito alah diangkek jadi Pangulu. Acara ko diakhiri dengan sumbayang Jumahaik di Musajik Raya Sulik Ayie dengan tetap memakai baju kebesaran Pangulu. Total wakatu nan ambo habiah kan untuak acara ko di kampuang adolah 2 (duo) minggu. Sabalun ambo maninggakan kampuang, dek karano sacaro fisik Pangulu indak barado di kampuang mako diangkek parangkat pangulu lainnyo nan akan maurus urusan keseharian anak-kamanakan nan ado dikampuang dengan maangkek : seorang Datuak Okie (Datuk wakil atau panungkek), seorang Mamak Rumah nan akan maurus urusan rumah tanggo anak-kamanakan, Bundo Kanduang nan akan maatur urusan ibuk2 dan nan gadih2 sarato seorang Bendahara suku nan akan maatur keuangan suku. Sahinggo sewaktu kito maninggakan kampuang, urusan anak-kamanakan alah tuntas, kito di rantau cukuik sakali sabulan manalipon (HP kini alah on line di Sulik Ayie) ka salah seorang nan kito angkek tadi. Dan satiok tahun paralu diprogramkan pulang ka kampuang paling tidak satiok Konperensi/Pulang basamo nan duo tahun sakali. Itu sajo penjelasan ambo tentang ceremonial Batagak Pangulu di Kampuang kami Sulik Ayie. mungkin indak samo dinagari lain. Kurang jo labiahnyo ambo mintak maaf, ka Tuhan ambo mintak ampun. Wassalam, HM Dt.Marah Bangso (48 +) Pangulu di Suku Limo Singkek Kubang Sulik Ayie - Solok Sumbar ----- Original Message ----- From: "boes" <[EMAIL PROTECTED]> To: <[EMAIL PROTECTED]>; <palanta@minang.rantaunet.org> Sent: Thursday, May 26, 2005 5:57 AM Subject: Re: [EMAIL PROTECTED] Batagak Pangulu Dt.Marah Bangs > Datuak Marah Bangso, > > mancaliek poto nan dialbum ko, ambo heran juo. > apo batagak Pangulu/datuk di adaik awak itu acara saroman alek perkawinan? > artinyo di duduakkan basandiang Datuak jo urang rumah? ba itu? atau > ado acara silek atau randai; kato bajawek/papatah patitih; rabah jawi/kabau > duo tigo dst dst. > iyo, diambo alun panah manghadiri acara batagak pangulu ko, jadi maklum se > ambo batanyo ko eh. > > wassalam, > boes > > > ----- Original Message ----- > From: "HM Dt.Marah Bangso" <[EMAIL PROTECTED]> > To: <palanta@minang.rantaunet.org> > Sent: Wednesday, May 25, 2005 12:33 PM > Subject: [EMAIL PROTECTED] Batagak Pangulu Dt.Marah Bangs > > > > Batagak Pangulu Dt.Marah Bangs > > Ass,wr,wb. > > > > Barikuik ko sebahagian foto2 pado acara batagak Datuk Marah Bangso tahun > lalu. > > > > Wassalam, > > HM Dt.MB _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________