Sanak palanta yth : Sabalun datang bulan puaso , sabatuanyo banyak nan dilakukan urang dikampuang , lagi lagi sabuah tradisi ditampek ambo . Kabatulan tahun kapatang ambo pulang sabalun bulan puaso dan bulan tu disabuik juo bulan rowah kalau di Jawa . Mungkin mukasuiknyo untuak mangenang "aruah" urang nan alah maningga . Diadokanlah ziarah kubua sakalian mambarasiahkan kubua dari samak belukar . Nan indak biaso adolah disampiang kagiatan mambarasiahkan kubua tadi , ado pulo kagiatan mando'a dan makan - makan ditampek kuburan nantun , dikampuang ambo kegiatan tersebut disabuik balaho mungkin asa katonyo " Allahu " karano nan dibaco basamo adolah kato kato pujian nan lah di bahaso awakkan sarupo "oo allahhoo" , "oo dain " mungkin asa kato "din " dan "oo hayun" dari asa kato hayyun , yang dilantunkan sambia tagak dan dipimpin sorang rang siak . Karano pandam pakuburan dinagari awak adolah badasarkan suku nan ado , mako ado sajo kagiatan balaho satiok minggu sacaro bagiliran antaro suku nan ado sarupo suku piliang , suku sikumbang , malayu , kutianyie , supadang . Dan indak mesti nan hadir adolah kaum sapasukuan , tapi bisa juo dihadiri / maundang suku lain karano lah basangkuik pauik dan ado patalian darah dek karano parkawinan . Ambo manyadari kabiasaan ko indak ado dalam tradisi agamo Islam , mako dari itu dek panghulu kaum piliang lah diadokan musyawarah dan kasapakatan , bahwa balaho dikuburan tatap buliah dilakukan , tapi maadokan makan makan dilarang . Seharusnya semua suku melarang kegiatan ini karena jelas menyimpang dari ajaran islam khususnya makan - makan di kuburan . zul amry piliang
darul <[EMAIL PROTECTED]> wrote: Assalaamu'alaikum Warahmatullaahi Wabaarakatuh. Dt. Marah Bangso, Sanak Zul Amry dan sanak sapalanta. Lain padang lain bilalang, lain lubuak lain ikanno. Walalu itu bilalang atau iakan samo itu juo. Ambo ingin juo sato saketek satantangan tradisi manyambuik bulan suci Ramadhan, penghulu segala bulan. Nan didalamno ado suatu malam nan labiah baiak dari 1000 bulan. Di Canduang kampuang ambo, duo tradisi nan dikatangahkan dek sanak Zul Amry, badua, ado juo di Canduang, biasono iyo duo minggu sablun puaso sampai puaso tibo adolah saat badua tu. Berdo'a jo kerabat, maimbau urang siak karumah, mandanga ceramah ugamo, basalam-salam dan bamaaf-maafan supayo samo jo ati suci masuak ka bulan puaso. Balimau saroman nan dikatangahkan dek sanak Dt. Marah bangso pun ado juo, tapi iko bisano disore hari sabalun masuak bulan puaso, balimau basamo di pincuran nagari, atau di tabek. Dek kampuang ambo talatak dilereang, jadi iyo banyak pincuran. Balimau barati mansucikan diri jo mandi gadang. Supayo badan barasiah, hati barasiah mamasuiki bulan nan terhormat, bagindo dari sagalo bulan. Cuma arti kato balimau-ko iyo agak balain jo nan dikamukokan dek sanak Dt Marah Bangso. Dikampuang ambo arti balimau adolah mandi kramas kecek rang jawa. Atau samo jo mandi gadang. Sabok sasudah junub, wajib mandi balimau, alias keramas nantun. Jadi indak dek mandi pakai limau nan diartikan di Solok tu doh. Antah dima asa kato balimauko, ambo iyo indak tau lo doh. Tapi kalau dikecekan mandi balimau, urang lansuang atu itu adolah mandi seluruh badan. --------------------------------- Start your day with Yahoo! - make it your home page Website http://www.rantaunet.org _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ____________________________________________________