Di wewengkon kabupaten Bandung kaler, di lamping kaler Gn Bukittunggul, wawatesan jeung wewengkon pagunungan Cisalak, Kabupaten Subang, aya tempat anu diaranan "Bukanagara". Ieu tempat teh khas palemburan di suku gunung,. model lembur-lembur atawa desa-desa di wewengkon Ciwidey atawa Pangalengan.
Ti taneuh Bukanagara ngarongheap sirah cai anu jadi sumber cai walungan sohor di Kota Bandung: Cikapundung. Tapi, sabagean sirah cai di wewengkon Bukittunggul ieu ngamalir oge ka tebeh kaler jadi sumber cai Ci Cupunagara tea. Sapotong ti walungan Ci Cupunagara ngaliwatan wewengkon Sumedang anu sabagian tina lokasina sohor sok diparake hiburan walungan taunan para menak Sumedang jeung masyarakatna: marak lauk tea. Lalampahan anjog ka Bukanagara lain perkara gampang sok sanajan ayeuna jalanna ka dinya geus diaspal. Babakuna mah kusabab jalan teh pungkal-pengkol jeung netek. Sabagian badan jalan masih mangrupa batu anu tarahal kusabab can diaspal atawa aspalna geus beak kaleled ku cihujan. Enya, hujan di wewengkon Bukanagara meh unggal poe, ma'lum di pagunungan daerah tropis tea. Ti mimiti mengkol ti jalan Cisalak-Tanjungsiang ka katuhu, jalan geus karasa matak eungap ka supur anu mawa mobil. Tapi, sagigireun ti panatang alam anu lumayan merlukeun sikep taki-taki salawasna dina mawa kandaraan, urang nalika nganjang ka Bukanagara baris disuguhan ku pamandangan alam anu bruh-breh boh ka beulah kiduol atawa ka beulah kaler. Ret ka tebeh kidul, lapat-lapat kebon enteh wewengkon Ciater kareret matak waas titingalian. Ana ngalieuk ka tebeh kaler lebak Cisalak jeung pasawahanana lapat-lapat katingal sarua matak waasna. Sapanjang jalan ka Bukanagara teu weleh aya pananya jero pikiran: kunaon eta tempat anu rek dijugjug teh diaranan "Bukanagara"? Kumaha sajarahna? Jeung kunaon walungan anu ka beulah kaelrna diaranan "Cupunagara"?. Can manggih jawaban. Basa ditanyakeun ka kang Beni anu mandu kuring ka Bukanagara, anjeunna oge teu tiasa ngajawab. Tinimbang nerangkeun asal-usul aran "Bukanagara" jeung "Cupunagara", Kang Beni malah nyaritakeun beja anu keur kuring mah mangrupakeun informasi anyar: Bukanagara teh tempat dieksekusina para tokoh PKI taun 65-an. Malah, saur anjeunna, ke di hiji pengkolan, bari katingal tutunggul makam Kolonel Untung. Saur kang Beni deuih, mang Ukra, pangebon ramana di Panaruban (ayeuna mah tos pangsiun, sareng bojona, bi Ukra, tos marulih ka lemburna di Cisalak), salah sahiji "jagal" eta eksekusi. "Tah eta kang jahul makam kolonel Untung teh", saur kang Beni bari nunjuk ku tungtung panonna, da pananganna mah tetep taki-taki dina setir, ka hiji batu anu nonjol tina hiji gawir handap dina hiji pengkolan. Ser karasa aya hawa anu beda, teuing hawa naon, basa si kuring ngareret kana batu - tembong tei siga jahul, balikta siga batu biasa wae - kl sagede dingkul nonghol tina taneuh anu rada nyanggereng sakumaha anu dituduhkeun ku kang Beni. Geuning teu mangrupa makam kuburan kolonel Untung teh. Tapi barang ras inget saha manehna jeung kumaha pandangan masyarakat umum jarita ka inyana ceuk dina sajarah nya pikiran teh bisa narima kalawan wajar lamun wangun kuburanana teu siga ilaharna kuburan jelema. Bari ngarengsekeun sesa lalampahan ngajugjug ka desa Bukanagara, kang Beni - da ngahaja ku kuring ditanggap - ngadongengkeun kumaha rincian tatacara eksekusi para tahanan G30S PKI anu asalna lain wae ti wewengkon Jawa Barat, balikta meh ti sakuliah Indonesia. Cag heula, cangkeul :) manar
