Timanan diudag ku tukang bajigur rék lumpat kamana deui iwal ti kadinya? Kaayaan astana nu pikasieuneun, hieum jeung geueuman, maklum astana heubeul ti jaman Walanda kénéh. Salian ti tatangkalan nu leutik, geus puguh tangkal Samoja mah, loba pisan tatangkalan nu gedé kayaning Jati, Mahoni jeung Caringin nu geus jaranggotan diselang seling ku eurih.
Di kéncaeun si Jay katénjo aya gundukan taneuh beuereum, diluhurna loba kembang rampé saleger kénéh makam anyar. "Alah siah! Karék inget ayeuna téh malem Juma'ah Kaliwon!" gerentes si Jay jero haté. Keur jempling-jempling téh cungungung sora anjing leuweung ti kajauhan. Puringkak bulu punduk si Jay muringkak...belesat!...gorobas! Asa aya nu luncat di tukangeun. Si Jay culang-cileung bari angger muringkak bulu punduk miiiiawww "Bedus! Ucing geuning!...Husss nyingkah kaituh!" ceuk si Jay. Si Jay leumpang gesat-gesut ngajauhan makam nu anyar téa cungungung deui sora anjing leuweung "Auuuuugggggg .waawww " Si Jay ngagurubug, bari puriding muriding saawak-awak. Teu karasa si Jay ngalieuk ka tukang ka makam anyar téa Keur anteng neuteup, ujug-ujug aya haseup kaluar ti makam beuki lila beuki jelas ngajanggelek lalaki tengah tuwuh, maké péci, kaos belél, calana pangsi, aya sarung dibeungkeutkeun na cangkéng mamawa bongsang eusina jeruk Naha jurig téh ciga tukang dagang jeruk..? Ngan éta beungeutna pikasieuneun, panonna bolotot beureum, letahna ngelél ngalayang nyampeurkeun si Jay . Tuur si Jay nyorodcod, awak ngadégdég, rék lumpat tapi suku asa beurat kacida haben cicing didinya, biwirna renya renyu mapatkeun babacaaan teu karasa wér kiih na calana. Jurig beuki ngadeukeutan, si Jay karék inget ka papatah Akina, mun manggih pikasieuneun kudu maca Ayat Kursi derekdek si Jay maca éta ayat karék gé satengahna "Jang, kuring gé apal étamah, ayat Kursi lain?..cik atuh nu rada panjang Al-Baqarah heug sing puguh panjang pondokna nyaa " ceuk jurig bari nyéréngéh pikasieuneun. Atuh puguh si Jay beuki teu pararuguh, ampir wéh ngudupruk kapiuhan keur kitu téh kadéngé sora,"CUT!!!" bray! makam nu tadina poék jadi caang, loba jalema nu kekeprok, patingpucunghul ti kajauhan Sihoréng keur syuting pilem. Sutradara nyampeurkeun ka Si Jay bari sasalaman,"Aéh, haturan Kang punten yeuh tos ngarépotkeun " "Dupi ieu téh nuju acara naon Kang?" ceuk si Jay can leungit ngadégdégna. "Nuju syuting pilem." Tembal Sutradara. Si Jay langsung curinghak, bari ngomong jero haté, "Wah, kuring bakal boga honor yeuh asssyiiik lumayan, rejeki mah timana wééé " "Mmmm abdi kénging honor atuh nya Kang?" ceuk si Jay teu éra-éraeun. "Wah, perkawis honor mah da teu aya perjangjian ti anggangna, ieu mah adegan "spontanitas" Janten, hapunten wé nya Kang gentosnamah Akang tiasa lebet kana pilem." Si Jay langsung leuleus tapi manéhna panasaran, bari nanya deui,"Punten, Kang judul pilem ieu téh naon?" "HANTU JERUK GARUT"ceuk sutradara bari ngaléos Si Jay teu beakeun mikir, bari kerung "Da, mun teu salah mah, nu ayeuna ramé di gedong pilem téh Hantu Jeruk Purut" manehna nuluykeun lalampahanana, mapay jalan satapak ngajugjug ka hiji lembur (éh, ieu mah lagu nyaaa .) ro2. wilujeng warsih enggal 2007. --- In urangsunda@yahoogroups.com, "Suteja Amijaya" <[EMAIL PROTECTED]> wrote: > Sabot Mang Juha paciweuh, si Jay nguliwed, gorobas, berebet lumpat teu nolih > tincakeun. Malah teu inget meueus meueus acan yen eta jalan teh brasna ka > astana gede. Astana, anu karek katingali ti jauh ge si Jay geus langsung > muriding sa awak-awak.