On 12/29/06, Suteja Amijaya <[EMAIL PROTECTED]> wrote: Sabot Mang Juha paciweuh, si Jay nguliwed, gorobas, berebet lumpat teu nolih tincakeun. Malah teu inget meueus meueus acan yen eta jalan teh brasna ka astana gede. Astana, anu karek katingali ti jauh ge si Jay geus langsung muriding sa awak-awak. *** Abong jajaka (meureun!) kurang. Enya kurang sagalana kurang. Karek sababaraha kedapan lumpat ge geus hah heh hoh. Panon burial buncelik. Sungut calawak, bari sakapeung letahna nu semu belel elel-elelan, sela gugusina hideung balas nikotin nu ukur ditanceban huntu babaraha guruntul. Badis anjing budug sanggeus kabur nyingkahan panggebug. Napasna ngahanju leuseuh ku mengi nu sataun ngaranjah paru-paru, da bongan kamarna indekos teu gableg kasur. Nya lamun sare teh kapaksa we ngampar samak pandan saheulay nu geus karancang balas pandan dipake ubar sisidueun. Lamun sisidueun pandan dibetot dilamot tuluy ditapelkeun dina tarang jenongna nu pulas hideung, lain balas sujud. Unggal peuting sare ukur ngarengkol tara dibaju. Baju bogana nu ukur sasetel digantungkeun dina paku nu nanceb di palangdada kamar, keur pakeeun deui isuk ngaprak ngajajah dayeuh. Hiliwir angin peuting nu moncor tina liang bilik langsung nembag awak nu ukur kahalangan ku harudum sarung lalayu sekar, warisan uyutna. Ladangna... nya mengi tea.
Dada nyeunghap turun naek. Bari dongko ngarasakeun semegna ambekan. Sakedapan mah teu sadar keur di mana manehna ayeuna. Geur rada longsong, kakara luak lieuk neangan rungkun. Cai bajigur tilu gelas geus maksa hayang kaluar tina selang uretra sanggeus kemihna teu sanggup nampung. Komo sanggeus kageujleg ku lumpat sakalumpat-lampet sieun dititah mayar bajigur jeung hui boled mah. Beuki angot ginjal meres bajigurna. Malah lain wae bajigur, hui boledna ge geus ngulikbekkeun kadut, bunghak. Gasna geus kukusialan, maksa hayang geura kaluar. Lain nu diteang lain deui nu katingali. Nu ngadarungkuk lain rungkun, tapi ngajejerna gundukan taneuh makam, jeung taringgulna tutunggul. Tangkal samoja gagayabag badis bet men dahanna katebak angin peuting nu ngadadak seah. Ngagelebug nyieuhkeun ci hujan nu tadi girimis. Bulan meletet tukangeun hearna mega hideung nu laun-laun ngulawu. Kabeneran purnama, 15 mulud. Cungungung, hawar-hawar anjing babaung. Marengan ngingkrikna sora Jangkrik. Enya ngadadak, peuting nu tadina simpe bet rame ku rupa-rupa sora. Sora anjing pagaliwota jeung sora jangkrik, ditembalan caricangkas. Rey... bulu saawak-awak cengkat. Puriding. Ingetan ngalayang, inget carita ninina keur leutik. Cenah astana sayangna jurig. Ditambah deuih ayeuna bulan mulud, bulan siluman ngala bati ti manusa nu muja maranehna. Cenah ayeuna buta hejo neang wadal. Cenah ayeuna kuda belang ngajemput wadal. Si Jay beuki culang cileung, Hayang lumpat tuur nu ti tadi geus ngaroroncod balas cape, beuki ngeleter. Boro lumpat ngisedkeun suku ge geus teu wasa. Saawak-awak leuleus, lir dipupul bayu, sieun ku nu can karuh. Sieun ku cenah. Dina punduk asa aya nu ngadaplok, tiis. burih beuki ipis. Keur ngarasakeun kasieun. Plak, punduk aya nu nepak. Koceak Si Jay ngajerit. Karasa calana jins nu belel, napelkeun haneut kana pingping. Mimiti puhu, haneut terus mudun. Nepi ka mumuncangan jadi nyecep, tiis. Leng, turaleng dunya ngadadak sagala hideung, hawar-hawar kadenge nu nyentak, "BAYAR HEULA SIAH!!" -- ::daluanggebisatinabincurang::
