សាលាឧទ្ធរណ៍ កំណត់ពេលបើកសវនាការជំនុំជម្រះប្រឆាំងលោក សម រង្ស៊ី រឿងដកតម្រុយបង្គោលព្រំដែនកម្ពុជា-វៀតណាម នៅថ្ងៃទី៥ ខែតុលា cen.com.kh ដោយ : លីហូវ (ថ្ងៃទី 2 កញ្ញា 2010)
ភ្នំពេញ: ទីបំផុតទៅ តុលាការសាលាឧទ្ធរណ៍ បានសម្រេចកំណត់ពេលបើក សវនាការជំនុំជម្រះ លើសំណុំរឿងលោក សម រង្ស៊ី ដកតម្រុយបង្គោលព្រំដែន កម្ពុជា-វៀតណាម ក្នុងខេត្តស្វាយរៀង នៅថ្ងៃទី៥ ខែតុលា ឆ្នាំ២០១០។ ក្នុងដីកាកោះ ចុះថ្ងៃទី៣០ ខែសីហា ឆ្នាំ២០១០ ដែលទើបផ្សព្វផ្សាយ ដល់អ្នកកាសែត នាថ្ងៃទី២ ខែកញ្ញានេះ លោក ង៉ែត សារ៉ាត់ ព្រះរាជអាជ្ញា អមតុលាការសាលាឧទ្ធរណ៍ បានបង្គាប់ឲ្យលោក សម រង្ស៊ី ចូលទៅកាន់ តុលាការសាលាឧទ្ធរណ៍ នាព្រឹកម៉ោង ៨ ថ្ងៃទី៥ ខែតុលា ឆ្នាំ២០១០ ដើម្បី ជំនុំជម្រះ ពីដំណើររឿង ធ្វើឲ្យខូចខាតដោយចេតនា ( តម្រុយបង្គោល ព្រំដែនកម្ពុជា-វៀតណាម ) និងការញុះញង់ឲ្យមានការរើសអើងជាតិសាសន៍ ។ សូមរម្លឹកថា ការកំណត់ពេលបើកសវនាការជំនុំជម្រះ នៅតុលាការ សាលាឧទ្ធរណ៍ លើសំណុំរឿងក្តី លោក សម រង្ស៊ី និងអ្នកភូមិពីរនាក់ទៀត ដកតម្រុយបង្គោលព្រំដែនកម្ពុជា-វៀតណាម នាពេលនេះ គឺជាលើកទី៣ហើយ បន្ទាប់ពីសវនាការនោះ បានលើកពេលជាបន្តបន្ទាប់ កាលពីថ្ងៃទី៦ ខែកក្កដា ឆ្នាំ២០១០ ដោយសារតែកាលណោះ អវត្តមានកសិករជាប់ទោសទាំងពីរ។ ចំណែកនៅថ្ងៃទី៩ ខែសីហា ឆ្នាំ២០១០ តុលាការសាលាឧទ្ធរណ៍ បានប្រកាស លើកពេលសវនាការម្តងទៀត ដោយសារតែ កសិករជាប់ទោសទាំងពីរ មិនមានមេធាវី ការពារ។ កាលពីថ្ងៃទី២៧ ខែមករា ឆ្នាំ២០១០ តុលាការខេត្តស្វាយរៀង បានសម្រេច ផ្តន្ទាទោសកំបាំងមុខលោក សម រង្ស៊ី ឲ្យជាប់ពន្ធនាគារចំនួន ពីរ ឆ្នាំ នៅក្នុងបទ ធ្វើឲ្យខូចខាតដោយចេតនា លើតម្រុយបង្គោលព្រំដែនកម្ពុជា- វៀតណាម លេខ ១៨៥ នៅស្រុកចន្ទ្រា ខេត្តស្វាយរៀង និងការញុះញង់ឲ្យមាន ការរើសអើងជាតិសាសន៍។ ចំណែកកសិករពីររូបទៀត គឺលោក ព្រំ ជា និងអ្នកស្រី មាស ស្រី រស់នៅ ស្រុកចន្ទ្រា ដែលដីស្រែរបស់ពួកគេ ត្រូវបានបោះបង្គោលតម្រុយព្រំដែន នោះ ក៏ត្រូវបានតុលាការ សម្រេចផ្តន្ទាទោស ឲ្យជាប់ពន្ធនាគារ មួយឆ្នាំ ម្នាក់។ តុលាការខេត្តស្វាយរៀង ជាប់ព្រំដែនវៀតណាម ក៏បានសម្រេចផាកពិន័យ ជា ប្រាក់ពីលោក សម រង្ស៊ី និងកសិករទាំងពីរ សរុបចំនួន ៦០ លានរៀល។ លោក សម រង្ស៊ី បាននិរទ្ទេសខ្លូន ទៅរស់នៅប្រទេសបារាំង ចាប់តាំងពី មានពាក្យបណ្តឹងរឿងព្រំដែនប្រឆាំងរូបលោក នៅតុលាការខេត្តស្វាយរៀង កាលពីខែវិច្ឆិកា ឆ្នាំ២០០៩។ លោក សម រង្ស៊ី ក៏ជាប់បណ្តឹងមួយទៀត ក្នុងសំណុំរឿងក្លែងបន្លំឯកសារ ផែនទី ដែលប្រធានគណបក្សប្រឆាំងរូបនេះ អះអាងថា បង្គោលតម្រុយព្រំដែន កម្ពុជា-វៀតណាម ដែលលោកដឹកនាំកសិករ ដកគ្រវាត់ចោល កាលពីថ្ងៃទី២៥ ខែតុលា ឆ្នាំ២០០៩ នៅខេត្តស្វាយរៀងនោះ បានបោះចូល លើដីកសិករខ្មែរ ។ សំណុំរឿងព្រហ្មទណ្ឌថ្មី ដែលអាចនឹងត្រូវផ្តន្ទាទោសលោក សមរង្ស៊ី ឲ្យពន្ធនាគារពី ៥ ឆ្នាំ ទៅ ១៨ ឆ្នាំនោះ នឹងត្រូវតុលាការក្រុង ភ្នំពេញ បើកសវនាការជំនុំជម្រះ នាថ្ងៃទី៨ ខែកញ្ញា ឆ្នាំ២០១០៕ -- You received this message because you are subscribed to the Google Groups "Cambodia Discussion (CAMDISC) - www.cambodia.org" group. This is an unmoderated forum. Please refrain from using foul language. Thank you for your understanding. Peace among us and in Cambodia. To post to this group, send email to [email protected] To unsubscribe from this group, send email to [email protected] For more options, visit this group at http://groups.google.com/group/camdisc Learn more - http://www.cambodia.org
