សម្តេច ហេង សំរិន ការពារអនុប្រធានទី១ រដ្ឋសភា ពីរឿងមានទីប្រឹក្សាច្រើន
Cen.com.kh ដោយ : លីហូវ (ថ្ងៃទី 3 កញ្ញា 2010) ភ្នំពេញ: សម្តេច ហេង សំរិន ប្រធានរដ្ឋសភា បានការពារលោក ងួន ញ៉ិល អនុប្រធានទី១ រដ្ឋសភា អំពីការមានទីប្រឹក្សាច្រើន ដែលត្រូវបាន អ្នកតំណាងរាស្ត្រគណបក្សសមរង្ស៊ី ស្នើសុំឲ្យសម្តេចប្រធានរដ្ឋសភា ធ្វើ ការពន្យល់ពីការចំណាយថវិកាលើទីប្រឹក្សាលោកអនុប្រធានទី១ រដ្ឋសភា ដែលមានចំនួន ៧១ រូប ។ ក្នុងចំណារលើលិខិតរបស់ក្រុមអ្នកតំណាងរាស្ត្រគណបក្សសមរង្ស៊ី កាលពីថ្ងៃទី២ ខែកញ្ញា ឆ្នាំ២០១០ សម្តេច ហេង សំរិន បានលើកឡើងថា នេះ ជាឆន្ទានុសិទ្ធិរបស់គ្រប់ថ្នាក់ដឹកនាំ ដែលបានអនុវត្តស្របតាមនៅ នីតិវិធីច្បាប់ ។ ការឆ្លើយតបយ៉ាងខ្លី និងមានត្រឹមតែស៊ីញ៉េ លើក្បាលលិខិតរបស់ ក្រុមអ្នកតំណាងរាស្ត្រដូច្នេះ ខណៈដែលក្រុមអ្នកតំណាងរាស្ត្រគណបក្ស សមរង្ស៊ី ចំនួន ១៣ រូប បានស្នើសុំសម្តេចប្រធានរដ្ឋសភា ដើម្បី ការពន្យល់ពីការចំណាយថវិកាលើទីប្រឹក្សាចំនួន ៧១ រូប របស់លោក ងួន ញ៉ិល អនុប្រធានទី១ នៃរដ្ឋសភា ។ ក្នុងលិខិតចុះថ្ងៃទី២៧ ខែសីហា ឆ្នាំ២០១០ ក្រុម អ្នកតំណាងរាស្ត្រគណបក្សសមរង្ស៊ី បានលើកឡើងថា លោក ងួន ញ៉ិល អនុប្រធាន ទី១ រដ្ឋសភា សព្វថ្ងៃ មានទីប្រឹក្សារហូតដល់ ៧១ រូប ហើយរដ្ឋសភាត្រូវ ផ្តល់ប្រាក់ខែ និងប្រាក់កំរ៉ៃផ្សេងៗ ដល់ទីប្រឹក្សាទាំងនោះ។ រៀងរាល់ខែ ឮថា លោក ងួន ញ៉ិល ទទួលបានប្រាក់ឧបត្ថម្ភ សំរាប់ជីវភាពដល់ ទីប្រឹក្សាទាំងនោះថែមទៀត ដូចជា ក្នុងខែសីហានេះ រដ្ឋសភាចំណាយ ទឹកប្រាក់ជាង ១១២ លានរៀល លើទីប្រឹក្សាទាំង ៧១ រូបនោះ ដែលមានទាំង អ្នកតំណាងរាស្ត្រ ញ៉ែម ថ្ថាវី ដែលជាប្អូនថ្លៃរបស់លោក ងួន ញ៉ិល និង លោក ហង្ស វិចិត្រ ជាប្រធាននាយកដ្ឋានហិរញ្ញវត្ថុ នៃអគ្គលេខាធិការដ្ឋាន រដ្ឋសភាផង ។ ក្រុមអ្នកតំណាងរាស្ត្រគណបក្សសមរង្ស៊ី បានស្នើសូមឲ្យសម្តេច ប្រធានរដ្ឋសភា ពន្យល់ពីការចំណាយថវិកាដ៏ច្រើនសន្ធឹកសន្ធាប់ចំពោះ ទីប្រឹក្សារបស់ លោក ងួន ញ៉ិល អនុប្រធានទី១រដ្ឋសភា បើសិនជាការពិត ហើយចាត់វិធានការណ៍ច្បាប់ជាបន្ទាន់ ដើម្បីបញ្ឈប់ភាពមិនប្រក្រតីនេះ ។ ចំពោះការលើកឡើងរបស់ក្រុមអ្នកតំណាងរាស្ត្រខាងលើនេះ ត្រូវបាន លោក ងួន ញ៉ិល អនុប្រធានទី១ នៃរដ្ឋសភា បានលើកឡើងថា ទីប្រឹក្សារបស់ លោក មានយូរហើយ តាំងតែពីជំនាន់សម្តេចក្រុមព្រះ នរោត្តម រណឫទ្ធិ នៅ ធ្វើជាប្រធានរដ្ឋសភា ។ លោក ងួន ញ៉ិល បានបន្តថា ទីប្រឹក្សា ឬជំនួយការរបស់លោក ពុំមាន តួនាទីស្មើរដ្ឋលេខាធិការ ឬអនុរដ្ឋលេខាធិការទេ ។ ពួកគេ គ្រាន់តែជា ទីប្រឹក្សា ឬជំនួយការ សម្រាប់ពិភាក្សាកិច្ចការងាររបស់រដ្ឋសភា ហើយ រាល់ការតែងតាំងទីប្រឹក្សា ឬជំនួយការ សុទ្ធតែមានការឯកភាពពីសម្តេច ហេង សំរិន ប្រធានរដ្ឋសភាផងដែរ ។ ជាមួយនឹងការលើកឡើងដូច្នេះ លោក ងួន ញ៉ិល បានពន្យល់ថា ក្នុង ការសម្របសម្រួលនយោបាយ មានអ្នកនយោបាយខ្លះ មកចូលជាមួយគណបក្សប្រជាជន កម្ពុជា ហើយសម្តេចនាយករដ្ឋមន្ត្រី ហ៊ុន សែន បានផ្តល់បញ្ជីឈ្មោះជាង ៣០ រូប ឲ្យធ្វើជាទីប្រឹក្សារបស់លោក ។ ប៉ុន្តែចំនួនទីប្រឹក្សានេះ ត្រូវបានសម្តេច ហ៊ុន សែន ប្រាប់ឲ្យឈប់តែងតាំងទៀតហើយ ។ សូមរម្លឹកថា វិបត្តិទីប្រឹក្សា បានកើតឡើងនៅរដ្ឋសភា ចាប់តាំងពី អាណត្តិរបស់សម្តេចក្រុមព្រះ នរោត្តម រណឫទ្ធិ នៅជាប្រធានរដ្ឋសភា ដែល កាលណោះ នាំឲ្យមានការរិះគន់ ចំពោះការតែងតាំងទីប្រឹក្សារបស់សម្តេច ក្រុមព្រះ ដែលមានចំនួនប្រមាណ ៨០ រូប ៕ -- You received this message because you are subscribed to the Google Groups "Cambodia Discussion (CAMDISC) - www.cambodia.org" group. This is an unmoderated forum. Please refrain from using foul language. Thank you for your understanding. Peace among us and in Cambodia. To post to this group, send email to [email protected] To unsubscribe from this group, send email to [email protected] For more options, visit this group at http://groups.google.com/group/camdisc Learn more - http://www.cambodia.org
