រដ្ឋលេខាធិការក្រសួងការពារជាតិវៀតណាមធ្វើទស្សនកិច្ចកម្ពុជា ដោយ សុខ សេរី 2010-09-13
ប្រទេសកម្ពុជា និងវៀតណាម មិនត្រឹមតែពង្រឹងកិច្ចសហប្រតិបត្តិការ គ្នាក្នុងវិស័យនយោបាយ និងការទូតប៉ុណ្ណោះទេ ប៉ុន្តែភាគីទាំងពីរ មានកិច្ចព្រមព្រៀងទ្វេភាគី ក្នុងវិស័យយោធាទៀតផង។ RFA/Sok Serey លោក វូ ទៀន ចុង (Vu Tien Trong) វរសេនីយ៍ឯកពិសេស និងជានាយក វិទ្យាស្ថានទទួលបន្ទុកទំនាក់ទំនងពិសេស នៃក្រសួងការពារជាតិ វៀតណាម (កណ្ដាល) ធ្វើសន្និសីទកាសែតនៅទីក្រុងភ្នំពេញ កាលពីថ្ងៃទី ១៣ កញ្ញា ២០១០ មន្ត្រីជាន់ខ្ពស់ក្រសួងការពារជាតិកម្ពុជា និងវៀតណាមបានឯកភាព គ្នាទ្វេភាគី ពង្រឹង និងបន្តកិច្ចសហប្រតិបត្តិការជាមួយគ្នា ក្នុងវិស័យយោធា ដើម្បីរក្សាសន្តិសុខនៅក្នុងតំបន់ និងនៅតាម ព្រំដែនប្រទេសទាំងពីរ ប្រឆាំងនឹងអំពើឧក្រិដ្ឋកម្មឆ្លងដែន និងការ បណ្ដុះបណ្ដាលមន្ត្រីយោធាកម្ពុជា នៅក្នុងប្រទេសវៀតណាម។ ការឯកភាពនេះបានធ្វើឡើងនៅក្នុងអំឡុងពេលធ្វើទស្សនកិច្ចរបស់ រដ្ឋលេខាធិការក្រសួងការពារជាតិវៀតណាម លោក ង្វៀន ជីវិញ (Nguyen Chi Vinh) នៅក្នុងប្រទេសកម្ពុជា ចាប់ពីថ្ងៃទី១២ ខែកញ្ញា ដល់ថ្ងៃទី ១៣ ខែកញ្ញា គឺបានជួបជាមួយលោកនាយករដ្ឋមន្ត្រី ហ៊ុន សែន រដ្ឋ មន្ត្រីក្រសួងការពារជាតិ លោក ទៀ បាញ់ និង លោក នាង ផាត រដ្ឋលេខាធិការ ក្រសួងការពារជាតិកម្ពុជា នៅក្នុងទីក្រុងភ្នំពេញ។ ក្រសួងការពារ ជាតិកម្ពុជា និងវៀតណាមបានចុះហត្ថលេខាទ្វេភាគីរួចម្ដងទៅហើយ ក្នុងការសហប្រតិបត្តិការនេះ កាលពីខែកុម្ភៈ ឆ្នាំ២០១០ កន្លងទៅ នេះ។ វីរឯកពិសេស នៃក្រសួងការពារជាតិវៀតណាម លោក វូ ទៀនចុង (Vu Tien Trong) និងជានាយកវិទ្យាស្ថានរបស់ក្រសួងការពារជាតិវៀតណាម ទទួល បន្ទុកទំនាក់ទំនងការបរទេស បានមានប្រសាសន៍នៅក្នុងសន្និសីទកាសែត នៅឯសណ្ឋាគារ Inter-Continental នៅក្នុងទីក្រុងភ្នំពេញ តាមរយៈអ្នក ប្រែសម្រួលជាភាសាខ្មែរថា ៖ «ក្នុង នោះមានការជួយឧបត្ថម្ភ ក៏ដូច ជាបណ្ដុះបណ្ដាលធនធានមនុស្ស។ ជួយខាងសម្ភារ ហើយក្នុងនោះជួយគ្នា ក្នុងការសង្គ្រោះមហន្តរាយ ចំពោះភូមិភាគតាមព្រំដែន។ វៀតណាម-កម្ពុជា មានចុះហត្ថលេខាដើម្បីរក្សាឲ្យខ្សែព្រំដែន ឲ្យមានខ្សែព្រំដែន សន្តិភាព»។ មន្ត្រីអ្នកនាំពាក្យក្រសួងការពារជាតិកម្ពុជា លោកឧត្ដមសេនីយ៍ឯក ឈុំ សុជាតិ បានមានប្រសាសន៍ប្រាប់វិទ្យុអាស៊ីសេរី នៅថ្ងៃទី១៣ ខែ កញ្ញាថា ៖ «ការធ្វើទស្សនកិច្ចរបស់អនុរដ្ឋមន្ត្រី ក្រសួងការពារ ជាតិវៀតណាម នៃប្រទេសវៀតណាម មកកម្ពុជានៅក្នុងរយៈពេល២ថ្ងៃនេះ បានបង្កើននូវទំនាក់ទំនងល្អប្រសើរ រវាងកិច្ចសហប្រតិបត្តិការរវាង ក្រសួងការពារជាតិទាំង២ ដែលយើងធ្លាប់បានធ្វើកន្លងមក។ ហើយពិសេស វៀតណាមបានសន្យាជួយបណ្ដុះបណ្ដាលវិស័យធនធានមនុស្ស។ សំខាន់គឺការ ហ្វឹកហ្វឺននាយទាហាន និងការបណ្ដុះបណ្ដាលនាយទាហាន ដើម្បីពង្រឹង វិស័យការពារជាតិ និងការថែរក្សាសន្តិភាពនៅតាមខ្សែបណ្ដោយ ព្រំដែន»។ ដំណើរទស្សនកិច្ចរបស់រដ្ឋលេខាធិការក្រសួងការពារជាតិ នៃប្រទេស វៀតណាមមកកម្ពុជានាពេលនេះ នៅគ្រាដែលប្រទេសវៀតណាមកំពុងតែរៀបចំ ធ្វើជាម្ចាស់ផ្ទះលើកដំបូង នៃកិច្ចប្រជុំថ្នាក់រដ្ឋមន្ត្រី ក្រសួងការពារជាតិអាស៊ាន ឬហៅកាត់ថា ADMM (Asean Defense Minister Meeting) នៅក្នុងទីក្រុងហាណូយ (Hanoi) ចាប់ពីថ្ងៃទី១២ តុលា ដល់ ថ្ងៃទី១៣ តុលាខាងមុខឆាប់ៗនេះ។ មានប្រទេសចំនួន៨ ជាដៃគូរជាមួយប្រទេសជាសមាជិកអាស៊ានចំនួន១០ ប្រទេស ក្នុងវិស័យយោធានោះ ក្នុងនោះមានដូចជា ទី១ សហរដ្ឋអាមេរិក ទី២ ប្រទេសចិន ទី៣ ប្រទេសរុស្ស៊ី ទី៤ ប្រទេសជប៉ុន ទី៥ កូរ៉េខាង ត្បូង ទី៦ ប្រទេសឥណ្ឌា ទី៧ ប្រទេសអូស្ត្រាលី និងទី៨ ប្រទេស ញីវហ្សែឡេន ជាដើម។ ប្រទេសកម្ពុជាមានគម្រោងការបញ្ជូនរដ្ឋមន្ត្រីក្រសួងការពារជាតិ លោក ទៀ បាញ់ នៅក្នុងកិច្ចប្រជុំខាងមុខនោះដែរ៕ -- You received this message because you are subscribed to the Google Groups "Cambodia Discussion (CAMDISC) - www.cambodia.org" group. This is an unmoderated forum. Please refrain from using foul language. Thank you for your understanding. Peace among us and in Cambodia. To post to this group, send email to [email protected] To unsubscribe from this group, send email to [email protected] For more options, visit this group at http://groups.google.com/group/camdisc Learn more - http://www.cambodia.org
