សម្តេចនាយករដ្ឋមន្ត្រី ហ៊ុន សែន ដឹកនាំគណៈប្រតិភូ ទៅប្រជុំ នៅបូរី ញូយ៉ក ថ្ងៃទី២៤ កញ្ញា
cen.com.kh ភ្នំពេញ: ក្រសួងការបរទេសកម្ពុជា បានប្រកាសជាផ្លូវការអំពីដំណើររបស់ សម្តេចនាយករដ្ឋមន្ត្រី ហ៊ុន សែន ដែលនឹងត្រូវដឹកនាំគណៈប្រតិភូ ជាន់ខ្ពស់រាជរដ្ឋាភិបាល ទៅចូលរួមកិច្ចប្រជុំថ្នាក់ដឹកនាំអាស៊ាន និង សហរដ្ឋអាមេរិក លើកទី២ នៅថ្ងៃទី២៤ ខែកញ្ញា ឆ្នាំ២០១០ នៅទីក្រុង ញូយ៉ក។ សេចក្តីជូនព័ត៌មាន របស់ក្រសួងការបរទេស ចុះថ្ងៃទី១៦ ខែកញ្ញា ឆ្នាំ២០១០ បានបង្ហាញថា ដំណើររបស់សម្តេចប្រមុខរាជរដ្ឋាភិបាលកម្ពុជា ទៅកាន់តុប្រជុំ នៅសហរដ្ឋអាមេរិក នាពេលនេះ តបតាមការអញ្ជើញរបស់លោក បារ៉ាក់ អូបាម៉ា ( Barack Obama ) ប្រធានាធិបតីសហរដ្ឋអាមេរិក។ ក្នុង កិច្ចប្រជុំនោះ មេដឹកនាំអាស៊ាន និងសហរដ្ឋអាមេរិក នឹងធ្វើ ការផ្លាស់ប្តូរទស្សនៈគ្នា លើបញ្ហាអត្ថប្រយោជន៍រួម សំខាន់ៗ ក្នុង តំបន់ អន្តរជាតិ និងបញ្ហាកង្វល់មួយចំនួនទៀត ព្រមទាំង កិច្ចសហប្រតិបត្តិការរវាងអាស៊ាន និងសហរដ្ឋអាមេរិក។ សេចក្តីជូនព័ត៌មានដដែល បានលើកឡើងថា គណៈប្រតិភូនឹងអមដំណើរ ដោយលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និង សហប្រតិបត្តិការអន្តរជាតិ និងមន្ត្រីជាន់ខ្ពស់ដទៃទៀត នៃ រាជរដ្ឋាភិបាលកម្ពុជា។ សេចក្តីជូនព័ត៌មាន ក៏បានបន្ថែមថា សម្តេចនាយករដ្ឋមន្ត្រី ហ៊ុន សែន នឹងជួបប្រជុំទ្វេភាគីជាមួយលោក អាប់ភីស៊ីត វេចាជីវ៉ា ( Abhisit Vejjajiva ) នាយករដ្ឋមន្ត្រីថៃ នៅក្រោយកិច្ចប្រជុំថ្នាក់ ដឹកនាំអាស៊ាន-សហរដ្ឋអាមេរិក លើកទី២។ ក្រៅពីនេះ លោកឧបនាយករដ្ឋមន្ត្រី ហោ ណាំហុង នឹងដឹកនាំគណៈប្រតិភូ អញ្ជើញចូលរួម ក្នុងកិច្ចប្រជុំពេញអង្គថ្នាក់ខ្ពស់ ស្តីពីគោលដៅ អភិវឌ្ឍន៍សហ្សវត្ស និងសម័យប្រជុំនៃមហាសន្និបាតអង្គការសហប្រជាជាតិ លើកទី៦៥ ដែលនឹងប្រព្រឹត្ត ចាប់ពីថ្ងៃទី២០ ដល់ថ្ងៃទី២២ ខែកញ្ញា ឆ្នាំ២០១០ និងពីថ្ងៃទី២៣ ខែកញ្ញា ដល់ថ្ងៃទី១ ខែតុលា ឆ្នាំ២០១០ នៅទីក្រុងញូយ៉ក។ សេចក្តីជូនព័ត៌មាន បានបញ្ជាក់ថា លោកឧបនាយករដ្ឋមន្ត្រី ហោ ណាំហុង នឹងថ្លែងសន្ទរកថា នៅក្នុងកិច្ចប្រជុំពេញអង្គថ្នាក់ខ្ពស់ ស្តីពី គោលដៅអភិវឌ្ឍន៍សហស្សវត្សរ៍ នៅថ្ងៃទី២១ ខែកញ្ញា ឆ្នាំ២០១០ និងក្នុងសម័យប្រជុំនៃមហាសន្និបាតសហប្រជាជាតិ លើកទី៦៥ នៅថ្ងៃទី ២៨ ខែកញ្ញា ឆ្នាំ២០១០។ សេចក្តីប្រកាសរបស់អគ្គលេខាធិការអាស៊ាន កាលពីថ្ងៃទី៦ ខែ កញ្ញា ឆ្នាំ២០១០ បានបង្ហាញថា លោកប្រធានាធិបតីអាមេរិក ប៉ារ៉ាក់ អូបា ម៉ា បានអញ្ជើញថ្នាក់ដឹកនាំអាស៊ានទាំង ១០ ប្រទេស រួមទាំង អគ្គលេខាធិការអាស៊ាន ដើម្បីចូលរួម ក្នុងកិច្ចប្រជុំថ្នាក់ដឹកនាំ អាស៊ាន-អាមេរិក ជាលើកទី២។ កិច្ចប្រជុំអាស៊ាន-អាមេរិក លើកទី១ បានធ្វើឡើងនៅប្រទេសឹង្ហបូរី កាលពីខែវិច្ឆិកា ឆ្នាំ២០០៩។ សូមរម្លឹកថា កាលពីថ្ងៃទី១ ខែកញ្ញា ឆ្នាំ២០១០ សម្តេចប្រមុខ រាជរដ្ឋាភិបាល ហ៊ុន សែន បានប្រកាសពីលទ្ធភាព ដែលអាចនឹងជួបចរចារវាង សម្តេច ជាមួយនឹងលោកនាយករដ្ឋមន្ត្រីថៃ អាប់ភីស៊ីត វេចាជីវ៉ា នៅក្នុង កិច្ចប្រជុំអាស៊ី-អឺរ៉ុប នៅទីក្រុង ប្រ៊ុយហ្សែល ប្រទេសប៊ែលហ្ស៊ីក នាដើមខែតុលាខាងមុខ។ សម្តេចនាយករដ្ឋមន្ត្រី ហ៊ុន សែន បានលើកឡើងពីលទ្ធភាពនៃការជួប ទ្វេភាគី រវាងសម្តេច និងលោកនាយករដ្ឋមន្ត្រីថៃ អាប់ភីស៊ីត គឺអាច ធ្វើទៅរួច ដោយមិនមានបញ្ហាអ្វីនោះទេ។ ជំនួបទ្វេភាគីរវាង ថ្នាក់ដឹកនាំទាំងពីរ មិនមែនពិភាក្សាត្រឹមតែបញ្ហាជម្លោះព្រំដែន ប្រាសាទព្រះវិហារ ដែលអូសបន្លាយជាងពីរឆ្នាំមកហើយនោះទេ គឺមាន ការពិភាក្សាទាំងលើបញ្ហាពាណិជ្ជកម្ម សេដ្ឋកិច្ច និងវិនិយោគទុនផងដែរ ៕ -- You received this message because you are subscribed to the Google Groups "Cambodia Discussion (CAMDISC) - www.cambodia.org" group. This is an unmoderated forum. Please refrain from using foul language. Thank you for your understanding. Peace among us and in Cambodia. To post to this group, send email to [email protected] To unsubscribe from this group, send email to [email protected] For more options, visit this group at http://groups.google.com/group/camdisc Learn more - http://www.cambodia.org
