សម្តេច ហ៊ុន សែន៖ បក្សប្រឆាំង ធ្វើតេស្តគណបក្សប្រជាជន ក្នុងរឿងសុំ អន្តរាគមន៍ជួយមេបក្សប្រឆាំង
cen.com.kh ដោយ : លីហូវ (ថ្ងៃទី 20 កញ្ញា 2010) ភ្នំពេញ: សម្តេចនាយករដ្ឋមន្ត្រី ហ៊ុន សែន បានចាត់ទុកសំណើរបស់ គណបក្សប្រឆាំង ដែលបានស្នើសុំដល់សម្តេច ជា ស៊ីម ឲ្យជួយអន្តរាគមន៍លើ មេបក្សប្រឆាំង សម រង្ស៊ី ថាជាការធ្វើតេស្ត មកលើគណបក្សប្រជាជន កម្ពុជា ដែលកំពុងដឹកនាំប្រទេស។ ក្នុងពិធីបើកសម្ពោធស្ពានព្រែកព្នៅ ឆ្លងកាត់ដងទន្លេសាប នា ព្រឹកថ្ងៃទី២០ ខែកញ្ញា ឆ្នាំ២០១០ សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា ថ្មីៗនេះ គណបក្សប្រឆាំង បានធ្វើតេស្ត ( មកលើ គណបក្សប្រជាជនកម្ពុជា ) ដូចជា ការស្នើទៅកាន់ សម្តេច ជា ស៊ីម ដើម្បី សុំអន្តរាគមន៍ ជួយប្រធានគណបក្សប្រឆាំង។ ប៉ុនែ្ត ជាការឆ្លើយតប សម្តេច ជា ស៊ីម បានអះអាងថា រឿងនោះ ( បញ្ហារបស់លោក សម រង្ស៊ី ) គឺជា សិទ្ធិរបស់តុលាការ។ ជាមួយនឹងប្រសាសន៍ដូច្នេះ សម្តេចនាយករដ្ឋមន្ត្រី ហ៊ុន សែន បាន បន្ថែមថា ប្រសិនបើមានសំណើបែបនេះ មកកាន់សមេ្តច នោះសមេ្តចនឹងចារ ត្រឡប់ទៅវិញថា អាអាយ៉ង គ្មានសិទ្ធិដោះស្រាយទេ។ ការលើកឡើងដូច្នេះ ដោយសារតែសមេ្តច ហ៊ុន សែន ចង់បញ្ចើតបញ្ចើ ចំពោះការរិះគន់ជាច្រើនកន្លងមក របស់គណបក្សប្រឆាំង ដែលតែងតែលើកឡើងថា គណបក្សប្រជាជនកម្ពុជារបស់សម្តេច ពិសេសរូបសម្តេចនាយករដ្ឋមន្ត្រី ហ៊ុនសែន ជាមេដឹកនាំ ដែលស្តាប់តាមបញ្ជារបស់ប្រទេសវៀតណាម។ លោក គង់ គាំ ប្រធានស្តីទីគណបក្សសមរង្ស៊ី ដែលជាម្ចាស់សំណើ បានលើកឡើងថា ក្រោយពីសម្តេច ជា ស៊ីម ប្រធានព្រឹទ្ធសភា និងជាប្រធាន គណបក្សប្រជាជនកម្ពុជា ដែលមិនមានអំណាច ដើម្បីអន្តរាគមន៍ក្នុងរឿង ប្តឹងផ្តល់លោក សម រង្ស៊ី រួចមក គណបក្សប្រឆាំងនឹងស្វែងរកអន្តរាគមន៍ ក្នុងរឿងលោក សម រង្ស៊ី ពីអន្តរជាតិ និងមេដឹកនាំសហរដ្ឋមេរិក ដើម្បី ជួយលោក សមរង្ស៊ី ឲ្យបានចូលស្រុក រួចពីការផ្តន្ទាទោស ក្នុងរឿងដក តម្រុយបង្គោលព្រំដែនកម្ពុជា-វៀតណាម ដែលលោក សម រង្ស៊ី អះអាងថា ការបោះបង្គោលព្រំដែននោះ បានធ្វើឲ្យកម្ពុជាខាតបង់ទឹកដី។ ក៏ប៉ុន្តែចំណុចនេះ ត្រូវបានសម្តេចនាយករដ្ឋមន្ត្រី ហ៊ុន សែន លើកឡើងថា មិនដែលមាន មេបក្សប្រឆាំងឯណា ដើរទៅដកបង្គោលព្រំដែនហើយ ស្វែងរកអន្តរាគមន៍ពីបរទេសនោះទេ។ ម្យ៉ាងទៀត នៅសល់តែពេល ៤ ថ្ងៃទៀត ប៉ុណ្ណោះ ( ថ្ងៃទី២៤ កញ្ញា) សមេ្តចនឹងជួប ហើយទទួលបាយ និងប្រជុំ ជាមួយលោកប្រធានាធិបតីអាមេរិក បារ៉ាក់ អូបាម៉ា។ អំពីជំនួបរវាងមេដឹកនាំអាស៊ាន និងអាមេរិក លើកទី២ នៅបូរី ញូយ៉ក ដែលសម្តេច ហ៊ុន សែន នឹងត្រូវជួបជាមួយនឹងលោកប្រធានាធិបតី អាមេរិក ក្នុងសប្តាហ៍នេះ ត្រូវបានសម្តេចនាយករដ្ឋមន្ត្រី គូសបញ្ជាក់ថា សម្តេចនឹងស្នើឲ្យអាមេរិក លុបចោលនូវប្រាក់បំណុល ( ប្រហែល ៣០០ លានដុល្លារ ) ដែលកម្ពុជា បានជំពាក់អាមេរិក តាំងពីសម័យ លន់ នល់ ដោយសមេ្តចបានចាត់ទុកថា ជាប្រាក់បំណុលកខ្វក់ ដូច្នេះបំណុល នោះ ត្រូវតែលុបចោល។ ក៏ប៉ុន្តែអំពីបញ្ហាកម្ពុជា-ថៃ មិនត្រូវបានសម្តេចនាយក រដ្ឋមន្ត្រី ហ៊ុន សែន លើកឡើងទេ នៅព្រឹកមិញ ខណៈដែលសម្តេច គ្រោងនឹង ជួបជាមួយលោកនាយករដ្ឋមន្ត្រីថៃ អាប់ភិស៊ីត វេចាជីវ៉ា នៅក្រោយ កិច្ចប្រជុំកំពូលអាស៊ាន-អាមេរិក លើកទី២ នាថ្ងៃទី២៤ ខែកញ្ញា ឆ្នាំ២០១០ នៅសហរដ្ឋអាមេរិក៕ -- You received this message because you are subscribed to the Google Groups "Cambodia Discussion (CAMDISC) - www.cambodia.org" group. This is an unmoderated forum. Please refrain from using foul language. Thank you for your understanding. Peace among us and in Cambodia. To post to this group, send email to [email protected] To unsubscribe from this group, send email to [email protected] For more options, visit this group at http://groups.google.com/group/camdisc Learn more - http://www.cambodia.org
