Eibarren hondakinen kudeaketan hobetzeko Garden izeneko talde bat sortu da, eta talde honek mozio bat aurkeztu eta talde politiko guztiek plenoan onartzea lortu du aste honetan. Mozioak hau dio:
ETXEETAKO HONDAKINEN GAIKAKO BILKETA. Udal honek, etxeko hondakinak gaika zuzen eta eraginkortasunez bereizteak eta biltzeak duen garrantzi handiaz jabetuta, hauxe onartu du: 1).- Hiritarrek gizalegezkoa den zeregin horren inguruan duten informazioa, kontzientziazioa eta erantzukizuna hobetzen lantzea. 2).- Gaur egun arte eskuratu diren emaitza horiek hobetzeko bidean jarriko lituzketen ekintzak modu berezian babestea. 3).- Helburuen plangintza bat planteatzea 30 eguneko epean, baita plangintza horren funtzionamenduaren eta exekuzioaren jarraipena ere. Garden-en aurkezpen dokumentua eibar.org-en publikatuta dago: http://eibar.org/albisteak/hondakinen-kudeaketa-hobetzeko-garden-taldea-sortu-da Apustua, 5. kontenedorearen aldekoa da, eta kritika eta proposamenak egin dizkiote Mankomunitateari, beste bideak hasi aurretik (errausketa edo/eta atez-atekoa izango dira) informazio eta kontzientziazioa bultzatu daitezen. Poztekoa iruditzen zait GARDEN izeneko talde honen sorkuntza, eta nik ere nahi nuke dena 5. kontenedorearekin konponduko balitz, baina horretarako lan asko egin beharko da oraindik, denborak esango du. Hondakinen inguruan ernegatzen nauena, dagoen literatura da. Nik inguruan entzundakoak, besteak beste: - Norbait gure birziklatutako gaiekin aberasten ari dela. - Birziklatutako guztiak nahasten dituztela berriz Mankomunitatean - Kontratatu dezatela zaborrak banatzeko jendea eta abar. Eta uste dut hor arazo larri bat dagoela erakundeen aldetik, ez dituztelako gauzak ganoraz azaldu, ez dutelako nahikoa landu komunikazioa (eta baliteke kudeaketa bera ere) Jarraituko du gaiak urte askotarako. Gari
_______________________________________________ Harpidetza eteteko, bidali mezua hona: [email protected] izenburuan jarriz 'unsubscribe' (horixe bakarrik, komatxo barik) Ondoren konfirmazio mezua jasoko duzu harpidetza-etetea berresteko.
