*Vlera e muajit Muharrem dhe agjërimi i Ashuras *
Falënderimet dhe lavdërimet i takojnë vetëm Allahut të Lartësuar, i Cili e bëri obligim haxhin për ata të cilët kanë mundësi. Salavatet qofshin mbi të Dërguarin e Tij, Muhamedin salallahu alejhi ue selem, mbi familjen e tij, mbi shokët e tij dhe mbi të gjithë muslimanët deri në Ditën e Gjykimit. Nuk ka dyshim se muaji Muharrem është një muaj i vlefshëm dhe është muaji i parë i vitit të ri hixhri (të muslimanëve), një prej muajve të shenjtë, për të cilin Allahu i Madhëruar ka thënë: *"Tek Allahu numri i muajve është dymbëdhjetë (sipas hënës), ashtu si është në librin e Allahut prej ditës kur krijoi qiejt dhe tokën. Prej tyre katër janë të shenjtë. Kjo është fe e drejtë. Pra, mos e ngarkoni (me mëkat) veten tuaj në ata (katër muaj). Luftoni të gjithë idhujtarët pa dallim, siç ju luftojnë ata juve pa dallim, e dijeni se Allahu është me ata që ruhen (të këqijave)."* (Et-Teube, 36) Kurse Ebi Bekrete, Allahu qoftë i kënaqur me të, transmeton se Pejgamberi salallahu alejhi ue selem ka thënë: *"Viti i ka dymbëdhjetë muaj, prej tyre katër janë të shenjtë, tre muaj (të shenjtë) janë një pas një (e që janë): Dhulkade, Dhulhixhe dhe Muharrem, kurse muaji Rexheb është në mes muajit Xhemad dhe Shaban."* Buhariu 2958. Muaji Muharrem është quajtur kështu për shkak të vërtetësisë së ndalesës së luftës në të. Kurse fjala e Allahut thotë: *"Pra, mos e ngarkoni (me mëkat) veten tuaj në ata (katër muaj)."* Kjo ndalesë ka ardhur për shkak se mëkatet në këta muaj janë më të mëdha se në muajt e tjerë. Kurse Ibn Abasi në komentin e këtij ajeti ka thënë: "Mëkati në këta muaj është më i madh dhe gjithashtu edhe shpërblimi i ibadeteve në këta muaj është në i madh." Katade për fjalën e Allahut: "Pra, mos e ngarkoni (me mëkat) veten tuaj në ata (katër muaj)", ka thënë: "Me të vërtetë mëkati në muajt e shenjtë është gabim më i madh se në muajt e tjerë, edhe pse në të gjithë muajt mëkati është i madh, por Allahu i Lartësuar i bën të shenjtë cilët muaj të dëshirojë. Kështu, Allahu i Lartësuar i ka zgjedhur disa prej njerëzve (Pejgamberët), gjithashtu i ka zgjedhur disa prej melaikeve dhe i ka bërë të dërguar (për t'u dërguar Pejgamberëve shpallje) dhe ka zgjedhur vend më të mirë në tokë xhamitë, dhe ka zgjedhur prej muajve muajin e Ramazanit dhe prej ditëve ka zgjedhur ditën e xhuma, kurse prej netëve ka zgjedhur Natën e Kadrit, prandaj shenjtëroni atë që ka shenjtëruar Allahu. *Vlera e agjërimit në muajin Muharrem* Transmeton Ebu Hurejra, Allahu qoftë i kënaqur me të, se i Dërguari alejhi selam ka thënë: *"Agjërimi më i mirë dhe më me vlerë pas muajit të Ramazanit është muaji i Allahut, Muharrem, dhe namazi më i mirë dhe më me vlerë pas namazeve farz është namazi i natës."* (Muslimi 1163) Nuk ka ndonjë argument që tregon se Pejgamberi salallahu alejhi ue selem e ka agjëruar muajin Muharrem të plotë. Muaj të plotë ka agjëruar vetëm muajin e Ramazanit dhe ky hadith tregon për vlerën e agjërimit në këtë muaj, pra sa të ketë mundësi njeriu të agjërojë, aq më mirë, mirëpo jo të gjithë muajin. Kurse agjërimi i ditës së nëntë dhe të dhjetë të muajit Muharrem (ditës së Ashuras) është sunet i fortë. Transmeton Buhariu dhe Muslimi nga Ibn Abbasi, Allahu qoftë i kënaqur me të, i cili ka thënë: "I Dërguari salallahu alejhi ue selem erdhi në Medinë dhe i pa çifutët duke agjëruar ditën e Ashuras dhe tha: * "Ç'është kjo?"* Ata thanë: "Ditë e mirë, në të cilën Allahu e kishte shpëtuar Musain alejhi selam dhe Beni Israilët nga armiqtë e tyre dhe për këtë agjëroi Musai." Pejgamberi salallahu alejhi ue selem tha: *"Unë kam më shumë të drejtë për Musain se ju"*, dhe e agjëroi ai atë ditë dhe urdhëroi të tjerët të agjërojnë. Gjithashtu, transmeton Ebu Katadeja se i Dërguari salallahu alejhi ue selem ka thënë: *"Shpresoj nga Allahu i Lartësuar se agjërimi i ditës së Ashures është shkak për shlyerjen e mëkateve të vitit të kaluar."* Muslimi 1162. Preferohet të agjërohet një ditë para ditës së Ashuras, d.m.th. ditën e nëntë. Transmetohet se Ibn Abasi, Allahu qoftë i kënaqur me të, ka thënë: "Meqë i Dërguari i Allahut agjëronte ditën e Ashures dhe urdhëroi për agjërimin e kësaj dite, sahabët i thanë: "O i Dërguari i Allahut, ajo është ditë që e madhërojnë çifutët dhe të krishterët." Dhe i Dërguari salallahu alejhi ue selem tha: *"Vitin e ardhshëm, nëse do Allahu, do të agjërojmë edhe ditën e nëntë."* Mirëpo, kur erdhi viti i ardhshëm, i Dërguari salallahu alejhi ue selem kishte ndërruar jetë (Muslimi 1134). Vërejtje: Disa dijetarë kanë preferuar që të agjërohet edhe dita e njëmbëdhjetë, pas agjërimit të ditës së nëntë dhe të dhjetë, duke argumentuar me hadithin që transmeton Ibn Abasi, se i Dërguari salallahu alejhi ue selem ka thënë: *"Agjëroni ditën e Ashures dhe kundërshtoni çifutët duke agjëruar një ditë para dhe një ditë pas saj."* (Ahmedi 2418, Humejdi 485 dhe Ibn Maxhe 2095), mirëpo ky hadith është i dobët dhe nuk merret si argument. Allahu e di më së miri! Përgatiti: Eroll Nesimi 4.1.2009 www.klubikulturor.com --~--~---------~--~----~------------~-------~--~----~ You received this message because you are subscribed to the Google Groups "Fjala e Bukur - Grup" group. To post to this group, send email to [email protected] To unsubscribe from this group, send email to [email protected] For more options, visit this group at http://groups.google.com/group/fjalaebukur?hl=sq -~----------~----~----~----~------~----~------~--~---
