Shkëlqimi, ngritja dhe rënia e Imer Selmanit…
*Dritan SKENDERI * http://lajmpress.com/opinion/3010.html Nuk është e rastit që këtë shkrim e fillova me parafrazimin e veprës së njohur të Dritëro Agollit, sepse edhe sot në periudhën post-komuniste hasen dhe frymojnë persona sikur shoku Zylo, personazhi që shoqëron romanin e Agollit. Imer Selmani, figura e të cilit u quajt “fenomeni Obama” këto ditë të fillim vitit fare qartë u pa se nga një shkëlqim dhe ngritje që pati po bie dhe shfaq fytyrën e vet të vërtetë, pra po na del në sipërfaqe tamam Imeri i vërtetë. Me një fjalë velloja e tij me të cilën e kishte mbuluar fytyrën e vërtetë, ra dhe në shesh doli fytyra e tij e vërtetë. Ç’është e vërteta Imer Selmani nuk shquhej dhe as që shquhet për ndonjë alamet politikani dhe për këtë fjalët janë të tepërta... Mjafton të kujtojmë se si deputet ai ishte zgjedhur me mbushje të kutive nga Agim Krasniqi&Company dhe jo për meritë të tij... Në kohën e participimit të PDSH-së në Qeveri ai udhëhiqte postin e Ministrit të Shëndetësisë dhe kjo periudhë nuk ka ndonjë arritje kushedi se çfarë, po edhe nëse karakterizohet në një farë mënyrë e suksesshme, kjo i atribuohet subjektit nga ku vinte PDSH-së dhe jo mendjes apo kapaciteteve të tij... Pas “shkëlqimit” në postin e të qenit Ministër i Shëndetësisë, filloi vetëkënaqësia e tij dhe nga këtu, tamam si shoky Zylo, filloi të aspiroj për ngritje dhe avancim të mëtutjeshëm, duke synuar majat e piramidës së pushtetit. Nisur nga kjo, ai fill pasi u zgjodh deputet i radhëve të PDSH-së nga AgimKrasniqi&Company, bëri hapin e parë të tij drejt “ngritjes”- u shkëput nga PDSH-ja dhe formoi subjektin e vet që çuditërisht e pagëzoi Demokracia e Re (sipas simotrës serbe Nova Demokratija dhe asaj greke Neo Demokratija, thua edhe kjo rastësi, apo...) dhe nisi guximshëm të hapëroj në skenën politike të shqiptarëve të Maqedonisë. Duke qenë i dehur nga “të arriturat” dhe karizma që fitoi si Ministër, arriti që një pjesë të deputetëve të pakënaqur nga PDSH-ja t’i merr në krahun e tij dhe kështu të bëj deputetë pa marrë pjesë fare në zgjedhje. Mirëpo, hovi i tij me kaq nuk kishte të ndalur. Qartë shihej se synimi i tij ishte kapja e majës së piramidës... Në zgjedhjet presidenciale të vitit 2008, meqë subjektet shqiptare nuk arritën gjuhë të përbashkët për një kandidat të vetëm për president, me mjaft mjeshtëri shfrytëzoi këtë boshllëk dhe u shfaq si i vetmi kandidat shqiptar në zgjedhjet presidenciale, dhe për rrjedhojë, meqë nuk kishte asnjë kandidat tjetër shqiptar, shumica e popullatës shqiptare ditën e votimit ia dhanë votat atij, kjo për faktin se ishte shqiptar dhe jo për diç tjetër. Shton kësaj edhe ca vota që mori në Maqedoninë Lindore ku u votua nga popullata maqedonase (thua edhe kjo rastësi apo..) mori flatra dhe synimet e tij më dukeshin açik... Por, po t’i hedhim një shikim në retrospektivë personalitetit të tij, do të vërejmë se backgroundi i tij del i mjegullt dhe mjaft çalues... Me një fjalë: Në CV-në e tij shkruan se studimet për mjekësi i ka filluar në Prishtinë dhe i ka mbaruar në Shkup në periudhën e qeverisjes së parë të PDSH-së (1998-2002) gjë që shumëçka le nën hije... Më pas i është rrekur biznesit dhe ka arritur një mirëqenie ekonomike, por edhe kjo anë e tij është e mbuluar me vello misteri... Përndryshe, në Maqedoni dhe më gjerë është e njohur publikisht se është mik i ngushtë me kryeministrin aktual maqedonas Nikolla Grujevski. Njihet si njeri karizmatik, që as sot e kësaj dite nuk ka arritur qartë të definohet se i përket spektrit të majtë, atij të djathtë apo të qendrës së djathtë. Përveç kësaj, ai loz edhe në dy karta: Thirret në emër të çështjes shqiptare në Maqedoni e nga ana tjetër trumbeton me të madhe se subjekti i tij është qytetar dhe nuk rresht duke u mburrur se për të kanë votuar edhe maqedonas, turq, boshnjakë, vllahë, romë etj. Rënia e “Obamës që Maqedonisë” filloi të vërehej fill pas mbajtjes së Kongresit. Është e njohur publikisht se sa herë është shtyrë Kongresi dhe mezi që është mbajtur. Këto ditë, doli në shesh fytyra e tij e vërtetë: U shfaq tamam Imeri i vërtetë i cili të kujton aparatçikët e kohës së Partisë Komuniste ku çdo mendim a zë ndryshe anatemohej që në start dhe më pas pasonin spastrimet staliniste, gjegjësisht ndrydhja e ideve pluraliste dhe përjashtimi, tamam siç bëri këto ditë Imeri demokrat, ku në fakt shpalosi figurën e tij të vërtetë e të qenit një njeri totalitar dhe me ide staliniste. Imer Selmani i përket të kaluarës që e mbylli në mënyrën më të turpshme dhe një herë e përgjithmonë ra për mos t’u ngritur kurrë. Epo, ç’t’i bësh, kështu e ka fundin çdo lakmonjës që kurrë nuk di se çka në të vërtetë do dhe si thotë populli nuk llogarit se ku ia qet mushka drunjtë...
-- Ju merrni këtë mesazh sepse jeni të anëtarësuar në grupin "Fjala e Bukur" në Google Groups. Për të dërguar në këtë grup, dërgo email në [email protected] Për t'u ç'anëtarësuar nga ky grup, dërgo email në [email protected] Për më shumë mundësi, vizito këtë grup në http://groups.google.com/group/fjalaebukur
