Povitr Satolleant Povitr Disa Boska Apoitolean Mafi Magchi
Amcho Avaz satallear (Abril 21vi, 2018) LOKMOT vibhagant, ek sompadpi aplea
posrear koponaslolem likhan, hangasor (Amchea Avaz-ar) kopounk aila. (Ami
zannant, heach satallear Anthony Miranda babacho chappun ail’le lekhak, hangach
zap diunk zai. Tori astanam....) To boroita, ‘Amchi mokh vegllich asli ani ti
mhunnlear Konknni mogi mhunnon hanga thoim prochar kortat ani naka zal’le
dixabhul korpi xere martat tankam khoreponnim Konknnicho mog ani kallji kitli
asa tacho thau ghevpak’ – Hea sompadpeak itlo Konknnicho mog ani kallji asli
tor, poilea voilea svater tannem ‘Tallianchea Aitarak’ hi boska apounchi nasli
ani Kristi lokachim bhavnnam dukounchim naslim. Oslea vellar mhaka nnov vorsam
(2009) fattlea mhojea eka lekhachi ‘FUDDARI ZATA? DUREANK BORO ROSTO DAKHOI’
yad zata. Ho lekh hanvem GOA-WORLD. COM mavle thollar mhojea ‘Aitaracheo
Katkutleo’ vibhagant uzvaddak haddtoch kitem ghoddle tem zannam zaunk link
ditam (https://www.mail-archive.com/[email protected]/msg45477.html) vo
thoddea utramni vach:
{Borinch vorsam Kuwait-an nokri kortolean, thodde bhov Gõykar somudayechea,
klubanche, ani her sonsthechea fuddareank hanv porxim vollkhotam. Tannnim
kel’lea gupttea somajik vaurachi tokhnnai korta titlich thoddi zait. Dor eklo
fuddari aplea fuddariponnan ap-apnnachi kharia yesvont zaunk bhouch tokhos
geta. Dor vorsak aplea klubachea vo sonstheche nanvan khariavolli toyar korun
Kuveitt-che Gõykar somudayea mhoreant sador korun xebaski zhoddtat. Ani
tattuntli ek vhodd sonstha mhunnlear ‘Kuwait-India Football Federation’.
(KIFF-Hi ak’khea Bharoti 18 futtboll klubanchi ekvottik sonstha, punn he
vorixtt futtboll sonsthen Gõyche 16 klubancho aspav asa, ani 98% Gõykar
futtboll khellgoddi asat)
KIFF-ache hasrea khall futtboll tournament vorosbhor (Musolmanchea Ramzan dis
soddun) ghoddun haddat ani chalu vorsache 2009, Kuwait National Day vo
Kuveittche Raxttrik Disa Febrerache 25ver Curtorcares United 7 A-Side futboll
tournament ghoddun haddtat mhunn, ek jahir kollovnni (e-mail) mhaka pavlli.
E-chitt vachun hanv tothaklom. (E-chitt pavtti zaloli Febrerache 2rer) Tech
disa, mhunnchem; Febrerache 25ver Korezm suru zatalem. Gobracho Budhvar. Amche
jinnecho ek bhag. Upas ani jinzvar samballcho dis. Ani hea vhodd disa futtboll
tournament ghoddun haddop? Zait ghoddie khoim tori kitem chuklam vo tankam
khobor na astoli tea disa Xinz vo Gobra Budhvar poddta mhunn. Sodam porim,
vorsachea vorsa Febrer 25ver futtboll ghoddun haddttat te toren ‘Curtorcares
United’ hannim toyari kel’li asot. Punn, konnem tori tankam zagrutai diunk zai
asli nhoi? Kiteak? Choddan chodd khellgoddi Kristanv asat ani tankam to dis
upas-jinzvar korchelo asta. Ani hi sond gheun, mhaka e-chitt pattoun kollovnni
ditolea ‘Curtorcares United’ odheoxak, ek ugddas korun, (nikall koso kat
lagtolo hi mhaka zanniv nasun) havem ‘reply’ dhaddun dilo. Mojem mon korzolem.
Mhojea oslea lhan mon’xanchem konn aikotolo? Punn koxem zaum. Mhozo Kristi
kaido havem kelo. Hench mhaka pottlem.
Khoim kitem ghoddlem ani koxem zalem hi mhaka purai khobor na. Punn tea disa
Febrer 25ver Gobra Budhvarak, ‘Curtorcares United’-acho 7 A-Side tournament
rod’d (cancel) zalo. Uprant khatrechea mon’xa koddlean mhaka gomun ailem
KIFF-achea odheoxan zomat apoun koddok bhasabhas korun sogllea klubanim ekach
motan, tea disa khellunk noikar dilo. Hi ek vhodd khuxechi gozal. Kristi
dhormancho man rakllo mhunn KIFF-achea odheox ani vavurpi somitik xabaski dili.
Tujea sorbhonvtim aslole tuka suchnna kortole ani tea vellar tuvem bore toren
aikun ghetlearuch tum ek boro fuddari zata. Mhojea oslea lhan mon’xachi
sunchnna kannar dovorli mhunn Curtorcares United ani her 17 klubanchea
fuddareank ani futtboll khellgoddeank ani mogiank mhozo solam.}
Vhoi! KIFF vorixtt sonsthent, dusrea dhormanche ani zatiche vangddi asle ani
ajun asat. Ekvottan klub choloitat. Tannim mhojea oslea lhan mon’xachi suchnna
(fuddari nastonam) kiteak aikun zai asli? Ani hanvem Marsache 25ver, 2018
Konknni boska anik khoinchai disak vhorunk suchnna kel’li ti Kristanv
fuddarean, kiteak kannar gheunk nam?
Lino B. Dourado
Lapitt http://aitaracheokaskuleo.blogspot.com/
