Doryant Khub Nustem Asa! Adim...!Punn Nhoi Atam! Iontrbottinim vo trawler-an nustem marpan 50% tok’ke unnav poddlelean nusteachi vaddai dupott (double) zaun sadea Gõykarachea xit-kodiecher mar bosla. Bangdde, Gõykaranchem chaltem nustem ani tem ghevnk puttvotalem. Atam kitem kay mhonnlear vilaxi nog (luxury item) zala. Rane-vixonn-sungttamchi dor mollbak tenklea ani Gõykaranche xita boxer ‘kormott’ porian hea fuddem dischenam mhunn bhirant upraslea
Bambolim Voiziki Kolej Hospital, Moddganvchem Hospicio ani Mapxechem Asilo hea sorkari hospitalanim duentinchea jevnnam boxen fokot torkari dista (orxim torkari, bholaikek bori) Nustem ani masak (chicken-mutton) vaddai zalelean ghelea tin sumanam mas-nustem vo non-vegetarian jevonn duentik divnchem bond kelam mhunn Bholaikecho Sonchalak (Director of health service) Dr. Rajnanda Dessai hannem saglam. Dor disa eka duenti fattlean sorkar 20 rupia moddta te ekdom todde aslelean fuddarak 35 rupia korche mhunn mottean sunchnna kelea. Amdar-Montri asat te Gõy luttunk bosle zalear durbollachea hatar ani pottar kitlem meren poddtelem hachea vellean sumar kaddcho. Nizache kharvi vo nusteakar asat te rampnni vo zhalleo ghalun nustem marpi. Tancho ho purvozancho dhondo atam iontrbotti dhonianim zopt kela. Nustekar, deger ail’lem nustem zhalleo ghalun martale, punn halinchea vorsanim khorele nustem marpi nhoi aslele iontrbotti doryant modem vhorun mottem-mottem nustem marunk laglelean poramporik nustekaranchea dhondeacher mar bosla. Ani haka lagun kaim vorsam fattim iotrbottikar ani ramponkarachem kestanv pettlelem. June-achea vo pavsalleant nustem marpachem nizache nustekar bond dovortale. Nhoi doryeak vaddoll-modd asta mhunn (hi ek dusri gozal) punn hea tempar nustem gabolli (roe) doryant soddtali ani nusteachi vaddai vo lhan nustem vhodd zaunk sondi ditale. Atam iontbottichim vhoddleo zhalleo ani adhunik podd’dot vaprun nhoi nustea porank martat punn tech barabor nusteachea gabollicho ibadd korun novo jiv rochunk dinant. Ani oxe toren nusteachim vadd zavpak kottint zata. Gõy, bhonvddekarancho ek sorg zalelean hispa bhair hotelam ani lhan-vhodd khannavoli zaleat. Ani iontrbottivelem nustem bazarant pavchea adim mottem-mottem nustem panch noketri hotel ani khannamvolinim pavtti zata. Ani urlelem ‘kormott’ khavunk amchea oslea sadea Gõykaranchi lutta-futti ani zongddim. Ani sasumaink nustea viret xit-kodi cholonam zalear, zanvoim babak tenxonn! Ani todde disanim doryant nustem marpachi bondi lagu zat’li. Sorkaran atam tori dolle ugddun hi bondi iontrbottivale dhonni samballtat zalear koddok nodor dovorchi ani bondi moddtoleank nibor khas diun nustem marpachi porvongi roddh (cancel) korchi. Mhaka, amche purvozanchem oprub dista. Zori amche purvoz choddxe xikop naslele khore, punn tannim amkam khup vhodd girest ani orthabhorit daiz pillgiche pillgek samballun urta toslem bhanddar diun gele ani tem mhonnlear ‘opari ani mhonn’neo’. Tanchea opari ani mhonn’neanim khub xannemponn asa. Heo opari ani mhonn’neo aiche ani fuddle pillgek bhouch upeogi zatat ani zat’leo. Atam mhaka ek vhodd husko zala. Purvozanim apnnali tokli vaprun amche ginneanar uzvadd ghalpa sarkelem bhanddar dil’lem tem konn tori piddear korta. Ek-ek opar vo mhonn’ni amche kornneank ani sobavank lagu zata. Halinchea vorsanim doryant nusteacho unnav pollelear ani voili gozal dolleam mukhar dovorlear toddeo opari nustea vixim asleo teo fuddarak cholteleo kay? Mhaka vicharanchea somdirant bhuskayla. Dog-am mogeam (lovers) modim uzott pett’toch ani ti vhaddot vetanam eklean mhonnchem “You stupid, idiot go to hell. There are lots of fish in the sea.” Chol-choll. Bixead kosli? Doryant khub masli asa. Him utram ucharop choddxem, jem mon’xak subeij cheddvanchi vo cheddeanchi ixttagott asleleank sobounk mhonntaleat. Punn halinchea disanim doryantlea nusteacho unnav pollelear ani cholta ti poristhiti cholot ravlear toddea vorsamnim doryant nustem mhonnlelem urche nam vo dorya nustea viret zat’lo. Zalear, amche fuddle pillgek amchea purvozanim dovorlelea girest daizacho upeog korunk zat’lo vo nam? Ho prosn mhaka sottaunk lagla. Goddie tumi mhojea pixeaponnank hanstelim ani mhonntelim. “Doryant asa maso, mol korta piso” Lino B. Dourado
