Kalchi Nari Surokxit Asli, Punn Aichi Nam!
Kalchea Gõyant sanjechea tinsani velar, koslich bhirant nastona ekmuli
bhonvunk, Gõyche ostorek ugto marg aslo. Punn, aichea Gõyant disa uzvaddan khun
ani bholatkar zatat te Gõychea disaleancher vachlear, Gõychi nari surokxit nam
mhunn kollta. Adlea surokxit Gõyant, ganvchea tintear bosiveli dhenvun,
kallokacho kosloch bhem nastana kalchi ostori ghorchi vatt eksuri choltali,
kiteak; cholun vetole vatter, soglech ganvche vollkiche melltale, ani ghora
meren pavounk thodde adhar ditale. Punn, aichea Gõyant rosteancher on-Gõykar
subeij zalolean ratchea vellar rosteancher ganvkar disonant ani kallokacho
faido gheun cholun vetole eksuri ostorecher, ken’na ani kosi ghuri ghalop
(attack) zait tem mat sangunk zaina. Dekhunuch, surya dharer vechea adim bail
mon’xen ghora bhitor aslear, odhik borem zait.
Aplea lagim kitlem porian bhangar-xingar asa tem lokak kollche khatir, kalchi
ostori apnna thaim aslolem bhargar dasti vinnem hatak-golleak choddoitali,
punn aichea ostorechea golleak lhanxi bhangarachi sorpoli dislear, golleantli
sorpoili natak zavnchem zavn, thodde khepek jiv porin luksonank pavo sarko
zata.
Choddxe ostoreank hatak-golleak bhangar ghalpachi umed asta. Thoddeo ostoreo
bhitorli mustaki ghalunk visrot, punn apnnalea angar bhangar choddoilea viret
ghorantlim bhair sorchinant. Chorank odd (attraction) zata toxe bhangar
ghalchem nhoi mhunn, khubdam pulisanchi xiddkavnni asta, punn ti monan laun
gheta konn? Jedna chorancho hat bhangaracher veta tednam mat roddunk bostat.
Ani az Seemak, ghora pavunk vell zal’lo. Tigelo ghorkar Suresh soglloch
kachabull zavn, vontir humkovtolea godielicher portean-portean nodor
firaitalo. Ani tatuntlean Aii, ken’na yetli kai mhunn bhurgim vicharun
sottaitalim. Moddganvchea Kadamba bos stendar sanjechea 6 voranche sodam bhaxen
bosir choddlear, ganvche tintear pavunk 40 minutam lagtalim ani bosiveli
dhenvun bhitorlea rostean cholun ghora pavpak,15 minutam zai aslim.
Sanjechim 7.40 voram vazlolim. Suresha-cho jiv golleamxim pavill’lo. Ofisant,
kamacher vell zalo vo 6 voranchi bos chukli zalear soroll fon korun apnnalea
ghorkarak, ti kollit kori. Punn az toxem ghoddunk nam. Laginch aslole igorjichi
ghantt vazli ani ratchim 8 voram zalim mhunn Sureshak kolit kelem. Ghanttichea
avazar tagele kallzache lubddub (heartbeats) ghantti itlea netan vazunk lagle.
Monan vorixtt chintnamni ghuntter kelo. Ani tatunt gusmolun fugar zavnche adim,
ek tori naka sokoilo ‘dose’ ghevnchem oxem Sureshak dislem ani jevnnache
kuddint vochun kazu urrakache botleak hat mat tannem ghatil’lo. Itlean…….
“Aiiiiii…….”, Salant bosun TV polletelea bhurgeancho avaz, tachea kannar
poddlo. Hatant ghetil’li urrakachi bolt, porot zagear dovorli. To salant ailo.
Kedov meren bailechea uskean tollmolltolo ghorkaracho jiv, apnnale bailek
pollevn khuxi zaunchea bodla tika pollevn, ek ragabhorit vag koso zalo ani
soroll tannem tika vicharlem
“Tuka kitem dislem? Mhojem moronn zalem? Hanv somplo? Golleantlem mangalsutr
khoim xen’noilem? ”
Seemachea nagddea golleak pollevn Sureshan ekar-ek vichar kele. Tannem
vicharlolea pronsnank zap di-nastana Seeman apnnalea polkean (blousant) hat
ghalun, kurpetichea bhitor lipoun dovorlolem mangalsutr, bangarachi kanknna ani
her vostu kaddun Suresha mhorean aslolea mezar dovorleo. Oxe toren vostu
lipovpachem kharan, Sureshan vicharchea adinch, tinnem taka sanglem.
“Bos tintear pavil’li ten’na tuka fon korunk sodi hanv. Bosiveli dhenvlim
ten’na mhaka kollun ailem mhagelo mobile fonachi bettri ‘dead’ zali
mhonn. Pormesvorachem nanv ghevn ghora vattek laglim hanv. Az bosint sogot lok
konn eklo Shirodecho Mahanand Naik mhonnlolea mon’xachi gozal kori. Tannem 9
choliam thaim ixttagott zoddun tankam lognachi as dakhoun tanchem bhangar-duddu
lutun nnovui zonnank jivinch kapleo khoim. Adim tintear thavn ghora yevpache
vattek amcho ganvkar melltalo. Atam rostear ratcho on-Goykaruch (vach: gantti)
dista. Bosint ghuttmuttun kortolea tea marrekar kunni Mahanand-achi gozalichi
yad zali. Bhieli hanv. Beg-begim mhageleo bhangaracheo vostu kaddleo ani
kurpetin lotleo. Bailanchi sugur tizori hi. Xi baye! Kitlo dharun kallzacho
monis re to. Ani Gõychi pulis kitem kortali kai? Ekach mon’xan 9 ostoreancho
kunn korit porian? Atam Gõyant bail-mon’xek khoinsoruch surokxea nam……ani nhoi
mhunn apnnalea kudd
ghorant.” Tichea mhorean aslolea Sureshak matso dukhlun tinnem mhonnlem.
“Age. Oxi kiteak dukholtat ge mhaka? Taplixi?”
“Mhojea polkean hat ghalun, tumi sonspotat kitem?”
“Polletalom, kurpeti bhitor chukun bhargarachi vost bha urlea kai mhunn”
“Puro, puro. Chance genakat. Mhageleo vostu sugur astat.”
Lino B. Dourado
