Ixttamno, Hanvem Goa Konknni Akademichea Upodheokx podacho tabo ghetla ani kamui suru zalam. Tumchea sohokarachi opekxa dhorun mukhar vetam. Tumcheo suchovnneo aslear jerul patthouncheo chodd korun sahitya ani Konknni bandnne vixim.
Mog asum. Vincy GOA KONKNNI AKADEMI-CHO VINCY QUADROS UP-ODHEOKX Goa Konknni Akademiche halinch zal'le Sabar Monddollache boskent Akademicho novo Up-odheokx mhonn Vincy Quadros hachi nivodd kelea. Tacho karyakall tin vorsancho astolo. Tachem nanv namnnecho sahityik Damodar Mauzo hannem suchoilem zalear DKA Odheokx Premanand Lotliker and KBM Odheokx Prashant Naik hannim onumodan dilem. Op-Odheokxache nivoddi uprant Akademiche karyakarinnicher Damodar Mauzo, Premanand Lotliker, S. M. Borges, Rajany Bhembre, Mahabaleshwar Sail ani Satish Dalvi oxa sov vangddeanchi ekmotan nivodd zali. N. Shivdas, Odheokx, Vincy Quadros, Up-Odheokx, voile sov vangddi ani Gõy Sorkarche Rajbhas Sochiv he Vavurpi Monddollache vangddi asat. Vincy Quadrosachea Up-Odheokx podachea nivoddicher Sorvsadarann Monddollachea zaitea vangddeamni khos porgottaili. Viucy Devnagri ani Romi lipi Konknni borovpeam modlo ek pul. Tannim donui lipimni khub borovop kelam ani aizmeren tachim chear pustokam prokaxit zaleat. Tache Kristanv ani Hindu oxa donui somazam kodden natem asa. Koslem-i kam zobabdaren korop ho tacho sobhav. Vincy tornnatte pillgecho protinidhi zaun aplea aplea karyakallant vavurtolo oxi ast vangddeamni hea vellar zal'lea aplea ulovpantlean uktaili. Quadrosan jyest vangddeamni apleacher dakhoil'lea visvasa khatir upkar manle ani aplea karyakallant apunn Konknni Akademiche ani Konknniche seve khatir bandil astolo mhonnpachem utor dilem. Konknni mogeamni taka boro yevkar dilo ani tachea hatantlean Konknnichi bori seva zaunk subhetsa dileo.
