Bharu-i Fottke, Bhitoru-i Footke TV-ir ail’li kosli tori khariavoll polletanam, Lapittachi daktti dhuv ekdam bhair sorun bolkavant bosun papor vachtolea bapaixim aili ani tachea hatak dhorun taka TV samkara ubo korun khollbollun mhonnlem.
" Dada choi, choi. Hea pikcheracho trailer polle. Zomni poddchea udkacher ekdom borem shooting kelam. Bori story asa khoim. Bazarant veta tedna, hadd ham?" 'BLUE' nanvamchea Hindi filmachi jahirat TV-ir choltoli pollevn, tagelea poran tem vikott haddche khatir bapai thaim magnnem kelem. Zaitea prokarachem vhodd toxem lhan jivem nustem tea filman distalem. Filmacho digdorspi Amerikek zolmololo Anthony D’Souza zalear filmachi istor Amerikeche Joshua Lurie ani Bryan M. Sullivan hannim boroilea ani Australia-chem 'pop diva' vo gavpin Kylie Minogue hea filman soirem kollokarn koxem ‘Chiggy Wiggy’ hea nach-kantaran distolean, Lapittachi bariksan vaddli. Porak khuxi korunk tem film vikott haddunxem dislem. 'Dusrea disa bazarant ghel’le kodden film vikott ghetlam vo nam hachi khatri ani yad korche khatir porache 3 pavtti tori fon. Chovtte pavtti fonachi ghantti vazchea adinch, lagsoruch aslolea eka VCD viktolea dhukanar Lapitt bhitor sorlo. Zalear? "Anink khoinsoruch tuka oslim mhellim filma mellunk nant? Amcheach shopar yeunk zai aslem? Tuka konnem sanglem hangasor amchea lagim pozddim filmamelltat mhunn? Jetan nhesla tum. Tujea nhespache kopddeank polelear, konnui tuka gentleman mhonntolo. Punn tujea toklen hollxik bhorlolem asa. Vaximbhor hanga sorlo. Khobordar dusre khepek amchea shopar disti poddlear." Kuddin kitlea voznanchi tem mat sarkem sangunk zai naslem. Punn, somplolo adlo 'wrestler' Andre the Giant itlea motayechi bail eka 'stool'-ar bosun, tichea dhukannar ailolea eka giraykak (customer) unchlo tallo kaddun mottean arodtali. Kastomaracho xant sobhav pollelear to ek mansugecho monis distalo. To kitem tori sangunk kori punn Andre the Giant anglotiche bailen, taka ek tori sobd ulounk chance dilo nam. Tichea khorkhos avazar tagelem mhukamoll bavun ghel’lem. Taka bouch loz zaloli mhunn, tacho dukhi sobhav dhakol kori. Tatuntlean tatunt thoinsor kam’ kortolea cholien, ugte gayear mitth rogoddlem. "Madam, hea zantte pirayer pavill’lea daddleank pozddim filma pollevnk koslo khiv yeta ti tankanch bhes bori khobor……… Fuddlem anink kaim ek aikunastana tannem lojen man khala ghalun dhukanantlo bhair sorun ghelo. Ani Lapitt taka polloit khuntt koso ubo urlo. CD shopar daddle-monis astat thoinsor lip-choriam vikrek adult films asat zalear sod korpak, ek veglli gozal. Punn, bail mon’xam thaim tosli vost magok vo vicharop ek chukuch. "Tuka kitem zai aslem",Lapitt thoinch ubo ravun tea mon’xa vixim chintalom tedna VCD lojache malkinin, taka vicharlem. "Tumchea lagim BLUE film asa?" "Kitem vicharlem tuvem?" Tiche dolle motte zait ani mukhammollacho rong boldit khorkhos tallean taka vichar kelo. "Tumchea lagim BLUE film asa kaim mhunn vicharlam" "Tuvum-i tache bhaxen bargo kombekar kitem? Blue film magtoleak tujea samkara nigttoch for kaddun dhanvdaun ghatla. Atam tuka kitem korchem? Arre tumkam zantteleank hea idadir pozddim filmam pollevnk kosli umedichi komri fullta re?" "Hey mam. Mind your language! Hanv pozddem film vo filmam vikott ghevn yeunk nam." "Nam tor, tum magtta tem blue filim koslem? Bargea?" "Madam. I told you to mind your language. Hanv kitem sangttam tem poilem aik. Halinch ek Hindi film BLUE nanvachem bhair sorlam ani tatunt mhozo avddicho Sanjay Dutt, Larra Dutta…" "Madam, madam", Lapitt uloitanam auchituch VCD viktolea dhukanar kam’ korpi cholien modench tond ghatlem ani fuddem uloili. Zannaim madam. Atam ugddas ailo mhaka. BLUE nanvanchem ek Hindi filim ghelea mhoineant thavn INOX theater-anim chalu zalam. Kedov ailolo customer ghoddie, tench filim vorunk ailolo dista. "Tuka khobor asli zalear mhaka kiteak sangunk naim"? Choliecher dhengxo ghatlo ani Lapitta islean polloit modur punn guneavkari talleann mhonnlem. "I am sorry Mister" "Polle madame. Tea sab-subea gentleman giraykacher tuvem gorjeviret tallo korjilo. Taka kitlem dukh zalem tem, tacho nirxelolo sobhav sangtalo. Dusre khepek film sonvsarachi bariksanichi nodor dovor ani bazarant koslim-koslim novim filmam yetat tacher lokx dilear az zala toslo chukicho somoz dusre khepek vattaunk zata" Lapittan tika sol’lo (advice) dilo ani koddsorun vetanam, tem Hindi film dhukonar ailem zalear fon korpak apnnalo ghorcho fon dilo. Char disam uprant sumar ratchea 8.45 vellar ghorantlo fon vazlo. Lapittache bailen to ghetlo. "Konn uloita? Konn? Asa to. Hanv? Nam , nam. Tagelem cheddum nhoi? Bail taji hanv . Kitem? Kitem mhuntlem tuvem? Blue Film? Tannem tujea lagchean pozddem film maglem? Ago tum tagelem konn zata? Poir tedus aikolole hanvem. Fonddem ganvant ek Sonstha kapoti (vach: condoms) vantt’ta mhunn. Ani atam, kedna thavn blue fimam vantpachi, sonstha sthaplea?" Khoim tori goir-somoz zala. Lapitt somzolo. Andre the Giant madamichea VCD shopar ghoddie BLUE filmacheo kopi pavlleo astoleo. Dekhunuch tigelo fon ail’lo asot. Baile lagcho fon ghevunk vocho. Tednam tichea khotkhottolea mendvar xiztolo rag odik khotkhotunk laglo ani fon bond korun ragan ulounk lagli "Amchea kazari jinent ek pavti tori oslim pozddim filmam ami polleleant? Saiba bhogos! Kedem vhodd pap? Ghorant vhaddtolim bhurgim asat. Deva, hea mhojea ghorakarachea gineynar uzvadd ghal. Arre tujer koslo denvchar bosla? Konn ti bemodiradik ostori hedea ratchea vellar tuka Blue Film vhorunk yeo mhonnta ti"? "Aghe Crystal-ache mama. Sogllem tuch uloitoli? Mhaka tori ulovpak chance asa?" "Tuka chance gheunk zai mhunn pozddim filmam magtta nhi re tum?" “"Mama please! Ferem, ferem korit ravum naka. Dada kitem tori sangunk sodta. Aikun ghe" Eka konxeak ogich bosun obeas kortolea Crystal -an mhonntlem. "Chup rav thoim daddachea pora! Tuka kitem somzota?" "Sozmotam mhunnonuch mhojem tondd ugoddlam nhi? Poir tedus tuka hanvem sanglolem lipun asloli ‘underwater treasure’ kannier ataplolem ek Hindi nanvanchem BLUE film bhair sorlam ani tem vikott haddpak hanvem daddak vinoilam" "Hammmm! Tem gho….oo? Hanv somzolim...."ani mhattem korpit bhirot geli. Lino B. Dourado
