Sorgar Vochunk Zai, punn…
"Mhaka morunk zai. Hanv mhojea jivitak ubgela/ubgelam. Mhojem jivit be-upeagachem ani kantanleachem zalam. Hea sonvsarant mhojem kainch na. Mhojem jivit infernantlea ujea porim baztta. Soglle vattani mhojer odruxtt ani koxtt. Hanv jivo/jivem asun kosloch faido nam. Melear odik borem." - Zaitim zonnam oxe toren uloitolim ami aikolam. Mogacheano, mhaka jivit ditolea Rochnarak argam ditam. Hanv mhojea jivitacho mog kortam. Mhaka prithvicho (earth) mog ani he prithvicher jiyetolea mon’xanchi apurbay mhaka asa. Dor ek mon’xachi onek torechi avodd mhaka posond lagta ani khaxallponni tanchem khubuch xanneponnan bhorloli jivitachi chal mhaka zalear odik novem-novem kitem tori xikun zaitea onnbhonvlunk melltta. Ani hech khatir mhojea jivitacho mog kortana mhageleo kornneo dusrea mon’xank khorenich avoddtat toxeo zanvchea pasot hanv chodduch dhean mhojea jivitache chalir dovortam. Hi prithvi kitli sobit? Panchvi zhaddam, dongor, somdir, varo, pavs thonddi, gormi, suknnim ani zon’voram hem sogott billion vorsam mon’xakullak di’it ailam ani ticho mhaka mog. Kiteak mhagelo azo-azi, xamai-xepai, avoy-bapui hea prithvicher aplem jivit thoglam. Tannim aplea jinecho mog he sundor prithvir ravun kel’lo dekunuch, hanv zolman ailam. Doryak suktti-bhorti, prithvicher kallok-uzvadd oxench amchea jinnent voir-sokoll zatolean ami ekdanch nirxelolea painddin paim ghalunk favo nam. Zoxem doryak suktti yeta teddnam thoddea vellan bhorti yetoli hem ami zannant, ani kalloka uprant uzvadd zata ho amcho bhorvoso amkam dir dita ani hem amchea jivitacho ek bhag zaun ghela. Zalear, az amchea jinnicher yetolea sonkextank fuddo korchea bodla, bhavart naslolo monis morunk kiteak sodta? Hea prithvir hanv jivo aso meren mhaka dusrea mon’xeanchi vollok korchi, tanchea vangdda misoll zaun keddna-i tanchea dukh-sukh aikochem asa. Xanttichi polltodd marun tanchem bhorim anond bhogcho ani vixech korun tanchim bhavnna xikun mhoje votten zatoch, hi prithvi ek suropayechem moiddan mhoje jinnent asa toxem tanchem zauche khatir hanvem khub vorsam jiyechem asa. Punn thoddo lok apleach jivitak xirapun itlea meklleaponan asloli prithvicher kiteak ubgeta? Mornanchi vatt pollevn ravtolea lokak voimkuntachi (paradise) sukh veginch chakchelem asta kay? "Zonn eklean morun sorg pollevnk zai." Oxem mhoji sorgest avoy mhaka sangtali. Soglleankuch sorgar vochunk zai, punn; morunk mat konnank naka Lino B. Dourado http://aitaracheokaskuleo.blogspot.com/
