---------------------------------------------------------------------------
Sign the Petition requesting The Honble Minister of State for Environment
and Forests (I/C) to maintain the moratorium on issuing further
environmental clearances for mining activities in Goa
http://goanvoice.org.uk/miningpetition.php
---------------------------------------------------------------------------
Amche 'self-styled'
Som’padpi !
Bor. Jose Salvador
Fernandes
Don’parcho tea Hotelant jevunk boslolom. Jevonn jevun purnn zaunkuch na. Mhoje
koddchean Konknni borounk xikpeacho mhaka fon ailo.
“ Romi lipientlean purnn utor koxem boroitat?” Tannem mhaka vicharlem.
“Konknni veakoronnachea (grammatical) ani xud’dhlekhonachea (correct
spellings) nemak dhorun tuka Konknni xikoun kabar zaupache dis lagim pavleat;
ani tum mhoje thaim ‘purnn’ utor koxem boroitat hem atam vicharta?” Jezvit
padrim bhaxen, tachea proxnak hanvem proxnacheach rupan zap diupacho proyotn
kelo.
“Tunvem mhaka xikoilam mhunnon hanv zannam, punn Konknniche Romi lipientlean
porgottnneo uzvadda yetat tanchea thoddea som’padpeank Konknnichi veakoronnik
bandavoll ani xud’dhlekhonache nem’ mat favo tea promannan khobor nant oxem
mhaka dista.”
Monant mhonnlem, haka khuinche borpavollint kosli tori chuk mell’llea. Na
zalear, ho oso boroupi nhoi.
“ Kiteak mhonnta tum? Konknniche khuinche porgottnnent tuka kitem chukichem
mell’llam?” Hanv.
“Marsachea mhoineant uzvadda ailoleo thoddeo uzvaddavnneo hanvem vachleat.
Thoddea porgottnneanchea ogrlekhantlea chukinchea utranchi hanvem volleri korun
tuka ‘e-mail’ korun dhaddlea. Vell kaddun tea utrancher matxe nodor marchi.
Borem fon dovortam,” oxem mhonnit tannem aplem uloup bond kelem ani fon-ui bond
kelo.
Monant mhonnlem, ogrlekhamnich kiteak? Thoddea porgottnneamni dor eklo apnnak
zai te toren boroita hachi mhaka khobor aslich. Punn Konknni xikteleak ti
chukichi borpavoll kiteak vachunk diunchi oxem mhonnit, khub dis hanvem taka
Konknnintlea porgottnneamni jeo veakoronnik ani xud’dhlekhonacheo chuki astat
te vixim kainch sangunk na. Punn xevttim, tannench teo sodun kaddleo!
Jevlom, ani soroll eke cyber-café-int gelom, ani mhojea xikpean dhadddlolea
utrancho printout kaddun ghetlo. Tantum mhaka torii, zaitivont, ami……
kaddinant, mollavnni, sonstha, xhanneponnachem, fuddareannchim, nirmaan, lokank
uskavop kiteak zatale?, kaim zanna lagim, khottor, proytn, dor mhoineank,
hatunt, bobattt, votten, adi… utram vachunk mell’llim.
Konknniche Romi lipientlea thoddea porgottnneanche som’padpi, aplea
porgottnneank itlo-titlo kall zalo mhunn ugtea dobajeamni golleacheo xiro
fuloun sangtat, ani tich gozal aplea porgottnneantlean, dor don vollim uprant
motteponnan boroitat. Konknniche Romi lipientlea porgottnneamni khorench
Konknni bhas samballun dovorpacho motto vavr kela hem sot, ani tache vixim
konnakuch il’lo-i dubav asonk favona. Punn ami he gozali poltoddi vochun-ui
thoddo vichar korpachi goroz asa. Konknni bhaxecho vavr ani udorgot fokot
porgottnneank itlo-titlo kall zalo, bhas samball’lli mhonntat tacheruch adarun
asa? Te bhaxechi veakoronnache, xud’dhlekonache nodrentlean ani her bhaxik
angamni udorgot korunk naka asli? Satollim, mhoine, vorsam sorot vetat tea
pormannem Konknni bhas sogllea angamni sudraun sudronk naka asli?
Aiz uzvadda yeupi Konknniche Romi lipintleo thoddeo porgottnneo vachunk
boslear, tea porgottnneamni ekuch utor sabar pavtti veg-veglle ani chukiche
ritin boroilelem vachunk mellta. Som’padpeanchea ogrlekhamni tor panttembhor
veakoronnacheo chuki, tea bhair xud’dhlekhonacheo chuki astat teo sodduch.
Dusrea utramni, thokos gheun Konknni bhas eke ritin boroupachim ani tichi
bhaxik nodrentlean udorgot korpachim panvlam porgottnneanchea som’padpeamni
ubarlelim matui disonant.
Khorem mhollear, hache fattlean eka poros odik karonnam asat. Amchea Konknni
porgottnneanche thodde som’padi apunn apnnakuch ‘shabishanv’ mhunn mandtat ani
toxe vagtat-ui. Eka som’padpeak favo purti tori ji bhaxik zannvay asunk zai ti
tanche modem na mhunn tanche ogrlekh ani tanchea porgottnneantlim her boroupam
vachtoch rokddench kollta. Bhaxik nodrentlean tori bhaxecho dorzo vaddoupachi
ani samballpachi eka khorea ani niz som’padpeak tank asonk zai. Ti amchea
thoddea som’padpeam bhitor na mhunn sangunk koslich bhirant na. Khorem sangunk
bhirant na mhunnonuch, hache poilim hanvem dog zann som’padpeank he vixinchi
gozal soroll sangli. Ekleak boroun sanglem. Tacho porinnam’ kitem zalo? Apunn
je porgottnnecho som’padpi asa, tacher tannem mhojim boroupam uzvaddaupachinch
bond kelim, ani tantuntlean Son’varachim Sungttam boroupa khatir mhaka vatt
ugti zali. Dusrea som’padpeachi gozal oxi. Tachea ogrlekhant zaiteoch chuki
asleo –
bhaxik ani xud’dhlekhonacheo. Nemank dhorun teo sarkeo koxeo-kat borounk zai
asleo tem man bagoun hanvem taka sanglem. Zalear tannem mhaka inglezintlean
kitem sangchem ? An editor is always right, even he is wrong! Chuk sudarpacho
hachea monacho inbox khuim tori suttun poddla zaum-ie oxem monantlea monant
mhonnit ogich ravlom.
Eka kallar Konknni bhas sonkoxttant asli tednam ami bhas samballunk vavurtanv
mhonntalim tem khorem ani borem asa. Punn atam bhas samballpacho ani ti
samballta- samballta ticho bhaxechea nodrentlean vikas korpachi goroz asa. Ho
vikas korun bhas fular haddtana, teo porgottnneo vachpeank bhaxechi ruch
diupachi ani tankam sarki bhas xikoupachi goroz asa. Fokot nibond boroupacheo
spordha ghoddun haddleo mhunn bhaxechi udorgot zaina ani konn bhas xikona.
Tankam ti xikounchi poddta… porgottnneanchea madheomantlean….tea khatir
poile-voile suvater porgottnneanchea som’padpeank bhas sarki yeunk zai…
bhaxecher tankam probhutv (mastery) aslear tea von borem.
He nodrentlean, amchea goroz tea manest som’padpeamni bhas xikun gheupacho vell
ailolo asa oxem mhaka dista. Konknni bhas ek rupan borounche khatir hea manadik
som’padeamni sangata yeun vichar ani bhasabhas korpachi-i goroz asa hem-ui
titleach mhotvachem. Na zalear….aiz amkam khobram-potrancher ani her
madheomancher vachunk mellta toxem ghoddot bhunn bhirant asa. Padrim thaim
ghoddlele khub vorsam adle chukichem bhogsonnem atam Bhagevont Bap magunk lagla
khoim. Konknni bhaxentlean atam zatelea chukam khatir fuddarache pillgen mafi
magpachi palli yeunchi nhoi mhunn, amchea som’padeamni apleo porgottnneo
bhaxeche nodrentlean atanch nittayer ghalear, Konknni maye vangdda Konknni
mon’xancho-i jiv suu zatolo.
GULF-GOANS e-NEWSLETTER (since 1994)
>http://www.yahoogroups.com/group/gulf-goans/ http://www.goa-world.com
________________________________
>
>www.colaco.net www.v-ixtt.com
>http://www.goa-world.com/goa/music/live.htm
>Promoting Tiatr & Tiatrists since 1994
>http://tiatracademy.blogspot.com/
>Gulf-Goans e-Newsletter presented by goa-world.com team
>http://www.yahoogroups.com/group/gulf-goans
>http://aitaracheokaskuleo.blogspot.com/
>GREET YOUR LOVED ONES IN GOA
>http://www.goa-world.com/expressions/
>http://www.asiawaves.net/india-fm-radio.htm
>
________________________________
>
________________________________
