Bainchi Kholai Pollevn Baint Udki Marchi Bhurgeaponnar hanv ani mhojea boroborchim vanddeantlim bhurgim Sam Juanv Porbechi vatt polloit astalim. Ken’na kai Junachi 24vis tarik yevnxi distali. Vaddeantle vhoddil tea disa bhouch umedin ani moujen Sam Juanvchi porob vaddeantle baint udki marun somarombhtale. Iskol aslolean, sodanch survatecho monorojonn amkam chuktalo. Punn eka vorsak, Sam Juanvchi porob, Aitarak aileli. Amchea vaddeant Lourdinho Irmanv aslo. Vesaien to ek dorji. Zhantte pirayeak lagon tachi dixtt komi zait vetali tea khatir to chodd kopdde xinvonk ghenaslo. Punn, vorsachea vorsa Sam Juanvche porbe nim’tan vaddeantlea sogllea bhurgeank sobit lugtanchim rongit fulam bosoun mhatteak ghalunk kopelam xinvtalo. Sokallchea sumar 10 vorancher Lourdinho Irmanv eka panttulean kopelam ghalun khursa sorxim ailo. Taka pollevn vaddeantlea bhurgeancho zomo tache sorbhonvtim zalo. Tannem bhurgeank kopelam vanttlim ani unnem poddloleank thoinchea thoim xinvon dilim. Vaddeantlo ek-ek voddil, zhaddachim panam ani fullam aslolim kopelam mhatteak ghalun khursaxim yevnk lagle. Ek-eklo yeta mhonllear 11.30 vazlolim. Dhol-tas ghevn Camil, ani tache fattlean khodd’de Caitan saxafon ani Thomas trumpet ghevn monorojonank toyarechi vaitt polloit ravtale. Vaddeantle sogott malgodde khursaxim ube zale ani magnnem-rozar korun Sam Juanv yeo re Saiba------ muzgachea tallar kantar ghaun somarombhak survat zali. Laginch aslole Carasialo ghora baint, Santachea nanvan aslolo Juao-van baint poili udki marli ani bainche kholayek vochun ek soreachi botl vhoir haddli. Soglea bhurgeamni tallio pettoileo. Carasialache ghorkarnin, somarombhachea kharbarea thaim onsam, ponos, ani bhurgeam khatir foren chokleti ani thodde duddu dile. (Carasialo tarvotti aslo.) Saguad mellcheli survat, bori zaloli. Dusri palli,amchea ghora tekhun aslolea ghorabean, ghorvam rakpachem kam’ kortolo Baptist-achi asli. (Tachem nanv, Sam Juanv Baptist-ak zoddop zatalem mhunn kai?) Baptist, baint udki marpak bhouch huxar aslo. Tambeachim aidonam anik kosleo-i mollacheo vostu baint chukun poddlear, tim baintlim vhoir kaddpak lok taka apoitalo. Sumar 10 tem 12 mintam to udkan buddun ravtalo mhunn, hanv aikon zanno aslom. Tannem baint udki ghetoch Sam Juanv baint poddlo saiba, hattik dorun vhoir kaddat taka. Hem muzga tallar kantar suru zalem. Bhurgeam bhorim Lourdinho Irmanv ghaupachi bouch umed dakhoitalo. Ani hanv asa titloch fors ghalun mottean ghaitalom. Hanvem aikololem. Mottean ghaitolea bhurgeank subeij chokleti melltat mhunn. Portean-portean Sam Juanv baint poddlo saiba ami ghait aslim. Baptist-an baint udki marlear panch mintam odik zalolim. Hattak dorun vhoir kaddtat taka…..ghaun-ghaun ami bezarlolim. Baint poddlolo Sam Juanv vhoirich pavuna zalo. Soglle gombhir zale. Akant ailo. Soglleanchea tonddam bhavlim. Muzgamni vazoipachem bond kelem. Santano, anik ek huxar penvpi, Baptist-acho husko dakhoilo ani toch zaun baint udki ghevnk toyar zalo teddnam, tech vellar Baptist hatant tin batleo ghenv baintlo vhoir sorlo. Don soreacheo zalear eke botlin xembor rupiachi nott asloli. Soglleachea tonddar uzvadd poddlo. Bhurgeamni, Baptistak nettan tallio pettoileo. (Uprant amkam kollun ailem, botlin aslole xembor rupia bhair kaddpak Baptist yotn kortalo mhunn) Sam Juanv ghunvtta toso ghunvtta, Sam Juanv sorea magota. Boroch torad zalolo lembddo Forsun kantar suru kelem. Hangasorlem thoim ani thoinchem hagasor irleaxea sorea khatir to lobaddponna korta mhunn, taka lembddo Forsu nanvan voddkitale “Shuu--uu! Vog’gi rav re. Sam Juanv sorea mhagota vo tum magot re?”, Onkol Timotin vicharlem. Bhurgim kakad ghalun bhouch hanslim. Vaddeantli ekui baim chukoinastona udkeo marun thoddo vell moujen sarun donparchea 2 vorancher Sam Juanv portean vaddeantlea khursaxim ektthaim zalo. Onkol Fernandon, sanjechea sat vorancher khursaxim ladayin astoli mhunn sanglem. Ladayini uprant, lokan diloleo khavpa vostu, soro ani duddvanchi vantnni kortole mhunn jahir kelem. Chokleti dilolelo teo mat, somarombhak haiir aslolea bhurgeank, vattun dileo. Amkam poddloleo chokleti kha-it hanv, xezarchem Effie ani Ida cholot ghora vetana Clementinachi avoy Filomena, aple dhuvechea kensak dorun baddea cheddvachi thokli churchure nastona oxi-toxi zoddpaitali. Tigelem dharun kortub pollevn ami tegaim thoktaklim. Te vatten Lembddo Forsu pasar zatalo. Effie-n taka vicharlem. “Aga tiva, Filomen aunti, Clementinank kiteak marta re?” “Nokoi tum baye? Agostinho-an, Clementinache baint udki marli ti” oxem sangun to vochot ravlo. Clemintinache baint udki?Hanv chintnanim poddlom. Aiz Sam Juanv. Agostinho-an baint udki marlear, cheddvak kiteak marop? Porbecho dis. Aiz tor soglle, baint udki martat. Oxem chintint ghorache sopna (stairs) choddtana mhagelea avoychea utranchi bas zali. Poir tedus Clementina amgher ailolem ani mhoji avoy taka sango. “Bhurgo boro baye. Punn tum, ajun kolej xikta thoinch asa. Favo tea vellar favo teo vostu. Ajun tuji idad zali nam….”, avoychim utram monant gholoit tichexim pavllo. “Heddgo ailo? Itlo vell? Jevllo tum?”, ekar ek avoyn vichar kele “Zannam maim…” “Kitem zanna kai mhontta?”, mhaka fuddem ulounk dinastona tinnem proxn kelo “Aunti Filomen, Clementinachea kensank dorun borich martali” “Teo khobro tuka nakat. Chol jev. ”, mhojer dhengso ghatlo “Ani zannam maim Clementinank kiteak marlem tem? Lemddo Forsu sangtalo…” “Kitem sangtalo to bebddo?”, avoyn motte dolle korit vicharlem “Agostinho-an, Clementinache baint udki marli mhunn…” Mhoje avoyk tea vellar kosli tiddok choddli ti khobor nam. Sam Juanv ghunvtta toso ghunvtta kantara porim, mhaka patt korun asloli mhoji avoy ekdanch mhoje dixen ghunvlli ani mhojea kansular ek mottean vazoilem. Lhan kombe pilam bhaxen hanv ghunvlom. Kansulear poddlolem thapott somzupak, Clementina ani Agostinho-chem takhtin kazar zalolem tea disa, mhaka kollun ailem. Lino B. Dourado
