Mhojem Svopon-3
"Broxtachar amkam naka!"
Jen'na hanv durdisnnyar "Just Imagine!", hi karyavoll polletam, ten'na mhaka
khup svopnam poddtat. He karyavollint hansun-khellun, dukhoynastona, kantto
kaddta, sot sangun dita.
Amche Vidhan Sobhent khup-xyo gomotichyo ghoddnyo ghoddlyat: eklo montri
dusryak "scams" kelyat mhonn arop korta. He sobhent ho vixoy bhorpur vhoyr
ayla: khoreponninch amchya Goyeant ani Bharatant khup broxttachar cholta,
hem asoll sot. Montri uttlyat, zalyar lok odik bovall korta. "Broxttachar
amkam naka", oxi chollvoll utpon'n zalya. Lok rostyar veta. Broxttachar
aslyar ek des fudde ttanch marina, durbollkayentoch urta.
Oxi poristhiti asa ki lokak vaz aylya, amcho des boro cholona, amchya
Goyeantuy toxench cholta. Montryam modim broxttachar asa, ponchayatant
broxttachar vosta.
Mhaka oxem svopon poddlam: lok uttot zalyar, Ejiptant ghoddlam, tem ghoddot.
Amche Montri soglem zannot, kitem ghoddta tachi bhesbori mahiti tankam asa.
Tanninch broxttachar nopoyt korcho, nazalyar lok chollvoll kortolo. Lok
tankam rit kixoytolo.
Jen'na Romak hanv xikunk gelom, poylem utor aykunk aylem tem hem: "sciopero"
(mhonnche "somp, haddtal", "strike"). Amchya Bharatant ani Goyeam poylem
utor bonvddekarank aykunk yeta tem hem: "broxttachar" ("corruption", ani
uprant, "scams").
Oxem kityak ghoddta zayt? Polleum-ya: Montri konn zatat ani kityak zatat?
Hem topaslyar borem zatlem. Boryanli bori nokri mhollyar rajkaronn. Poyxe
komaunk zata. Itle zatat ki "Swiss Bank"-ant ghalum yeta ani akhem jivit
bhogum yeta. Montrichya hatamni poyxe kruttamni yetat. Taka podvi asa, duddu
mellta, bhovxik nanv yeta.
Ponn ontoskorn na, zalyar to kitya-kitem kortolo. Mulyam na zalyar, to mati
khatolo, kityak kallo duddu posona. Kalliz samballunk zay, borem nanv
rakhunk zay, Goyencho fuddar somestanchya hatamni asa!...Amchim motam diyunk
xikum-ya!...
Ivo da C.Souza
