Ponnje: Bhroxttachar tujer ani tujea hanvkicher okman ani onit zata
mhonn tuka bhogona zalear tum tache add zhuzunk fuddem sorchoch naim,
oxem adli IPS odhikarin Xmti. Kiren Bedi hinnem Azad Maidanar Mayache
13ver bhovxik zomatin uloitana sanglem.
Xmti. Bedi "India Against Corruption" hea andolanachi sohokarin asa. Hem
andolan fanki Anna Hazaren suru kelam. Ami farik kortanv tea kor-ache
duddu konn khata tem gomosor hem andolan chalu astolem. Tednach tuzo rag
tuka bhroxttachara add zhuzunk boll ditolo. Hea vellar Devacho hat
amkam asa. Atam anik thambunk zaunchem na.
Gõyant 2012 vorsa Vidhan Sobhecheo venchnnuko zatoleot ani novo sorkar
sodrer yetolo tache mukhar Gõy Vikasa Yevzonn 2012 hi yevzonn ghalche
adim Goa Lokayukta Bilacho mosudo toyar korpak tinnem ulo marla. Hea
kama khatir boreantle bore vokil ani somaz vidneanxastri asloleanchi ek
somiti ghoddun haddchi mhonn Xmti. Kiren Bedin suchoilam.
Gõyant boro vavr korunk tornatteanchi chodd goroz asa. Hem kam'
cheddvanchea fuddariponna khal diunchem, tea vorvim Gõychim tornattim
Gõyantlea bhroxttachara add vavurtolim fuddari zatolim mhonn tinnem
spoxtt kelam. Tornatteamni 'graduation' korche poilim ek voros tori
somudayachi seva korpachi goroz asa mhonn Xmti. Bedi hinnem sanglem. Xri
Arvind Kejriwal spoxtt sangta tea promannem Bharotant motte veapar
dhonde ani udeog choltat ani bhroxttachareank sampddaunk kotthin zata.
Ponn lokacheanuch tacher chotray dhorum yeta. Dekhun Bharotachea lokan
Jana Lok Pal Bill toyar korunk zai ani duddvancho hixob nivoll
dakhovpachem tea billant lokan ghalunk zai mhonn sanglem.
Rajki pokx hem bill sompeponnim mandun ghetole mhonn bhulum nakat, chodd
sonkhea tem mandun gheunche nant, ponn lok rostear ailearuch odik boll
zatolem tem bill sorkaran mandun gheunk. Tori astana zatim dhormancho
ani rajki bhed ghalun futti ghalun amkam doxim korunk vavurtole. Ponn
ami sogllemani ekvottant ravpachi chodd goroz mhonn Xri. Arvind-an sanglem.
http://www.v-ixtt.com/client/details.asp?id=4531&cid=3
