Bhroxttachar mhojer onit korta mhonn rag yena zalear,Bhroxttachara add
zhuzunk tuka tank aschi na
Bhroxttachar vaddla. Amchea bhitor suvicharacheo maddnneo choddleat.
Mhojean kaim korunk zaina oslo somoz ghott zata. Hanv edea vhoddlea
bhroxttacharacher koso zhuztolom ho proxn amche bhitorle soktecher
dobhav haddta. Eke vatten somaz oslea mon'xamni bhorta zalear dusre
vatten promannik monis bhroxttacharacher zhuzunk ubo zata. Hoch
promannik monis adhunik kallacho itihas nove toren boroytole.
Bhroxttachar mhojea jivitacher ek vhodd onit oxem ami zor ragan mandun
ghenant zalear bhroxttacharacher zhuzunk amkam tank aschina. Mhojea
'tax'-ache duddu dusro kiteak khata tacho tuka okman zaina zalear,
bhroxttachara add zhuzunk tujea bhitor uzo pettchona. Sorkari odhikari
duddvancho khorch nivollponnim dakhoina zalear, tum to magunk hok'k
gheuncho na.
India Against Corruption hi Bharotant ek nove torechi kranti suru zalea.
Bharotak bhroxttacharachea faskentlo suttun svontontr zaunk hem zhuz
chalu zalam. Dusman dista toslo na, to amche moddlo, amchea rogta
masacho ani amchea vorgacho haka lagun taka soddun kaddunk ek vhodd avhan.
Jan Lokpal Bill mhonnlear ek hatiyar Bharotak bhroxttacharantlo mekllo
korunk. Punn hem bill pas zaunk titlem sompem nhoi. Sorkaran hem bill
pas korop mhonnlear aplea sogllea bhroxttacharan bhorlolea kornneanchi
kheast bhogchi poddtoli. Amche amdar ani montri titlea sompeponnim hem
bill pas korunk tenko diunche nant. Khoinchea amdarak vo montreak apnnem
bhroxttachar kel'leachem sobhemazar kollit zal'lem zai? Osle amdar ani
montri amkam bhov thodde distti poddtat ani osle asle zalear Bharotachem
rup bhroxttachara viret zotolem aslem.
Jan Lokpal Bill pas zaunk kotthin zatolem mhunn mhoje ani tuje sarkilean
rostyar yeunkuch nhoi punn promannikponnacho nagrik koso ho amcho hok'k.
Amchea Bharotant bhroxttachara viret rajkoronn asunk amcho hok'k.
Amcho proytn nhoi fokot amchea bhitor aslolea bhroxttacharacher zoit
vhorunk punn amche bhonvtonim, to nopoit korunk Jan Lokpal Bill amchea
desant ani Goa Yukta Bill amchea rajyant jahir korunk hea chollvollin
bhag gheunk.
Stephen Covey ho famad borovpi mon'xachea jivitant char kherit anvdde
asat tachi khobor korta. Te char anvdde mhonnlear - dusreacho mog
korunk, zannvayen vaddunk, khuxalkayen jiyeunk ani fuddle pinddkek
sompoti totvam vorvim bhettounk (To love, to learn, to live and to leave
a legacy). Tor amchea fuddle pinddkek bhroxttachar bhorloli sonvskrutay
dovrunk raji zatanv? Vo bhroxttachara viret amchea purvozamni aplo jiv
poryan diun amkam svotontr keleant tacho obhimanacho amchi pinddka
ugddas kortoli. Osli sonvskrutay samballunk, Jan Lokpal Bill bhov
gorjechem zait punn tujea bhitor hea oniticher zhuzunk rag na zalear
tujea kallzant Bharotak bhroxttachara viret korunk uzo-i na zatolo.
http://www.v-ixtt.com/client/ogrlekh.asp
