Pulisent bhorti zatanach bhroxttacharak survat
Ponnje: Gõychea pulis khateant bhorti zaunk dor umedvarak 10 tem 20
lakh rupya lonch (bribe) khavounche poddtat. He duddu fokot sado
konstable zaupa khatir zalear PSI, PI heo zuttiyeo gheun pulis khatean
bhitor sortolo zalear 25 tem 50 lakh rupia khavoun bhitor sorpak
mellta mhonnpachi gozal gomun ailea. Hea vixim hea protinidhin barik
mahiti ghetlea. Sado pulis vo PSI, PI ani unchlea podancher ek monis
itle sogott duddu mezun pulis khateant bhorti zata tem bhorlole duddu
porot zoma korunk to pulis teach disa thavn bhroxttachari margantlean
vavurta mhonn spoxtt zalam. Pulis khateantlea gupit sutramni hea
protinidhik gomlolea pormannem fattlea dha vorsank duddu mezun je konn
hea khateant bhitor sorleat te choddant chodd duddu mezunuch bhitor
sorleat vo sthanik rajkornni, amdar, montri hanchea sarkeachem fattboll
aslolean atam sid'dh zalam.
Dor novo pulis vo pulis odhikari hea khateant bhitor sorta ani bhitor
sorpa khatir konnak kitle duddu mezta te vixim nhoi mhonn ghor montreak
ek ek pautt khobor poryan asona. Fattlea dha vorsank pulis khateant
veg-veglle torecheo provurteo (character) hea khateant bhitor sorleat.
Ani chodd bhroxttachar vaddunk lagla, oxem khud hea khateantlean
nivrut zalole Gõyche promannik pulis odhikari Alex Razquinha, Lavu
Mamledar, Sontoba Desai adi sarkea odhikareamni hea protinidhik sanglam.
Bospagari pulis odhikari Lahu Mamledaran hea potrkarak sanglam tea
pormannem Gõyant BJP rajvottkechea kallant her sogllea bhroxttochara
borobor pulis khateantle bhroxttacharak chodd nett mell'lo. BJP
razvottke vellar hixob ani kont dovrinastana hozaramni vonttar mixeo
(mustache) poryan yeunk naslolea bhurgeank bhorti keleat oxem Xri
Mamledar sangta.
Xri Alex Rasquinha hachea pormannem 20 vorsam adim kall aslolo ani je
pulis hea khateant vavurtalet zaum ek sado konstable ani unchlo odhikari
poryan promannikponnan aplem kam' kortale.
Takach lagun hea odhikareak somaz toxench sorkara koddlean vhodd vhodd
puroskar ani inamam favo zaleant.
Punn aiz kal je torecho bhroxttacharacho rog hea khateak girasta tem
pollet zalear mhoje sarkhea eka promannik pulisak hea khateant
vavurtalom mhonn sangpak lojen man khala ghalchi poddta".
"Drug mafia, buddon mel'lea kodde duddvancho hafto adi sarke borech
bhxottachari gozali Gõyche pulis khatem korta.
Ani eka tempar ji dekh-rekh Gõyche toxench desache Ghor Montrlay (Home
Ministry) dovortali tem aiz khoinch disun yena. Hi ek khont korpachi
gozal.
Toxench Gõychea ani desantlea herui bhagantlea pulis khateamni noxtt
zaupak sorkaruch zobabdari oxem mhonnlear tantun kainch otitai aschi
na, oxem hoch pulis odhikarean hea protinidhik sanglem.
http://www.v-ixtt.com/client/details.asp?id=5004&cid=3
