KONKNNI ZANNAR –
PADRI VASCO DO REGO, S.J.
- Jose Salvador Fernandes
Padri Vasco do Rego hacho zolm Janerachê 8ver, 1925 vorsa Gõyant zalo.
Tacheam ghorcheamnim tachea kallzant avoy-bhaxecho môg vomplo.
Agostachê 5ver, 1945 vorsa, tannem Jezuchê Sobhent (mhonngê Jezuitanchê
Sonvsthent) provês kelo. Jezuchê Sobhent tachem xikop ani akarnni
Mum’boi, Shem'baganur, Bellganv, Moddganv ani Louvain (Belgium) xaramnim
zali. Louvain-ant to Padri zalo (15-08-1955). 1963 vorsa Raiturchê
Siminarint Atmik Guru ani Devvidyecho Profesor mhonn tachi nemnnuk zali.
Siminarint Purtugez bhas chodduch choltali. Oxê poristhitint, Padri
Vasco-n fuddariponn gheun, siminaristam modem Konknni bhaxecho pormôll
posraylo ani aplim bhaxonnam tannem Konknnintlean kelim. Hea khatir
tannem Konknni bhaxecho zata titlo boro obheas kelo, ani bhas bori korun
to xiklo. Aplea Konknnichea vavrant tannem Monsenhor Sebastião
Dalgadochea koxancho bhorpur vapor kelo. Borabor Konknni Ponnddit, Prof.
Joaquim Antonio Fernandes ani Pri. Crescencio Monteiro, hancho adar ghetlo.
Dusri Vatikani Vixvsobha zatôch, Misachê sevadhormik ritichem ani yer
dharmik vidhinchem Konknnintlean bhaxan’tor toyar korchea mollar Padri
Vasco-n kelolo vavr omolik ani tokhnnay korunk favo toslo. Tannem,
Misachea ani yer sevadhormik ritinchea somarombak chodd gorjechim ani
Kristi dhorm gayonantlean xikovpa-sarkim bhov faideachim, ani puxkoll
yer bhoktigitam rochunk suru kelem, ani apnnem rochloleam zaiteam gitank
tannem nad-ui bosoyle. Atancho ‘Gayonancho Jhelo’ tannench yevjilo ani
aplim novim ani kãi adlim bhoktigitam aspaun uzvadda haddlo. Magir
anink-ui bhoktigitam rochun toxench yeramnim-i rochloleam kãi
bhoktigitamnim Gayonancho Jhelo to vaddoyt gelo. Sumar 10-12 vorsam
uprant tachem dhoniponn ani soglli zobabdari tannem Gõychea
Dhormprantachea Sevadhormik Somitichea hatant dilim. Oso to
vaddoun-choddoun, tantum atam 513 gitam asat. Tantlim 333 odik gitam
Padri Vasco-n rochlolim asat, ani tantleam 46 gitank tannench nad
bosoyle. Tea bhair tannem anink-ui gitam rochleant, punn tim Gayonanchea
Jheleant nant.
Romi Misa-Gronth: Zaito vêll sarun ani khub tras kaddun, anink eklea
Mongllurchea Padri-bhava vangdda, odhikrut Latin bhaxentlea
Misa-Gronthachem bhaxan’tor korun, tannem 1150 chhaploleam panancho
atancho Konknni Romi Misa-Gronth toyar kelo. 1981 vorsa to chhapun ailo.
Ami ugddas dhôrcho: tea kallar tachê lagim “Computer” naslo, tôr ek-ek
pan tannench boddboroun kaddchem poddlem, ani magir tannem
chhapkhanneantlo-i vavr topasun kaddlo.
Romi Vachpam-Gronth: Misachim thoddim vachpam kãi padri-bhavamnim
onnkarun toyar kelolim aslim. Dusrim tannem onnkarlim. Tim tannem eka
Padri-bhavachea adaran som'padit kelim, ani oxê ritin, 1983 vorsa, 1895
panancho Konknnintlean Romi Vachpam-Gronth toyar zalo.
Povitr-Sobheche Sonvskaranchea somarombachim pustokam toyar korchem
bhovuch mhotvachem kam' yeram borabor tannem kelam. Gõycheam Igorzamnim
Dharmik Ritinchi bori xikovnn posraunk ani bhov-korun Misachi toyari
korunk adar zaunchê khatir “Amcho Sevadhorm” nanvachem masik Padri João
Batista Viegas, tednancho Sevadhormik Kendracho Sekretar, hannem
yevjilem ani Dhavo Pius Gonvllik Vidyamon’dira thaun som’padlem. Hea
kamachê survatek, hem mhoineallem dorjedar zaunk, taka Padri Vasco-cho
zaito molacho sohokar aslo.
Thoddim vorsam fattim, ak’khem Povitr Pustok toyar korchea kamant Padri
Vasco-cher boroch bhar poddlo. Novea Korarantleam thoddeam pustokanchem
tannem bhaxan’tor kelolem khorem. Punn atam Padri Caetano da Cruz
Fernandes hachea vangdda tannem tokos gheun ak’kho Novo Korar topasun
kaddlo. Grik bhaxechê ani bhaxan’torachê nodren sudarunk tannim dogãinim
khubuch tras ghetle.
Toxench, Adlea Koraracheam-i kãi pustokanchem tannem bhaxan’tor kelam.
Zalear, yeramnim bhaxan’tor kelolim Provadianchim pustokam heam dogam
Padri-bhavamnim topasun ani sudarun chhapunk toyar korun dovorlim.
Padri Vasco-chea nanvar bhov thoddim, punn mol-mhotvachim boroylolim ani
onnkarlolim pustokam asat. Borea Jezuchê Bajilikent to Reitor astanam,
Sam Francisk Xavieracheam novenank ani porbêdisak manddloleam
orthabhorit vixoyancho ani provochonnancho sar diun yer Padri-bhavank
vanttlolim panam ektthãi korun Sonvsarak Jezu Diat, hem pustok magir
chhapun kaddlem. 1991 vorsa tachem Stotram nanvan onnkar uzvadda ailo.
“Nazaretcho Jezu” (Char-ui Xubhvortomantlem guntlolem ek kothon) hem
tachem pustok 2001 vorsa uzvadda ailem. Ani tench pustok 2003 vorsa,
Padri Mathev Almeida hannem “Nazaretkar Jezu” nanv diun Konknnichê
Devnagori lipientlean toyar kel’lem uzvadda ailem.
1974 vorsant to Konknni Bhaxa Monddollacho (KBM) Up-Odheokx aslo.
Tannem Konknnintlea Gulab ani Dor Mhoineachi Rotti masikancher
zannvayechim vachpiank chintunk-niyallunk lavpa sarkim borovpam keleant.
Tea xivay, Renovação and yer masikancher ani vortoman-potrancher tannem
Purtugejintlean, magir
Inglejintlean-ui borovpam keleant.
Hea tachea sogllea vavrak lagun Igorzantli Konknni ani Romi lipient
borounchi Konknni promann zaunk suru zali. Konknni bhaxek hea Padrin
dilolem hem vhoddlem ani molachem dennem mhonn az sogllim mandun ghetat.
1979 tem 1995 meren to Borea Jezuchê Bajilikent vhoddil (Reitor)
nemlolo aslo. Tednam chodd gorjechem sudarop korunk to khub koxtt korun
vavurlo. Tea vellar Bhagevont Fransisk Xavieracheam novenanchi, tachê
relikechê dakovnnechi (1984-85 ani 1994-95) manddavôll bhoktin, xistin
zaunk ani ti orthabhorit korunk Padri Vasco-n kelolo vavr soglleancheach
monant ghôtt riglolo asa. Devachê khorê bhoktichem vatavoronn rochun
haddunk tea vellar taka zaitench soschem poddlem.
1964 Vorsa, Raiturchê Siminarint astanam, Moddganvchê Loyola xallent
Padri Vasco-n Konknni
mullavi xalla suru korpacho nirnnoy chalik laylo.
Sod’deak to Konknni bhaxentlem adleantlem adlem masik, ‘Dor Mhoineachi
Rotti’ hacho Mai 2009 vorsa thaun som’padok mhonn urben, zotnayen ani
mogan azun vavr korta.
Sorvank, kherit bhaxen, goribank, onathank, rostea-degek poddlolelank,
Devacho môg onnbhovunk ani bhogunk diunchea hetun, 1961 vorsa, Marsachê
19ver, tachê sfurtin Pune xarant Ishaprema-Niketan (Devachea Mogachem
Ghor) ekê garajint ugôddlem. Uprant hea Ishaprema-Niketanache don
fantte Gõyant suru kele - 1966 vorsa Bardesachea Asgonvam, ani dusro
fantto 1972 vorsa Tisvaddechea Vhoddlea Gõyam.
Padri Vasco do Rego-n kitlimxinch vorsam kallachi goroz mhonn
tollmollin Romi lipientlean Konknni mãy-bhaxechi ji seva keli, ti
Dalgado Konknni Akademin (DKA) mandun gheun, 2005 vorsa taka
protixtthecho Poilo "MONS. DALGADO PUROSKAR" bhettoylo.
---------------------------------------------------------------------------
Protect Goa's natural beauty
Support Goa's first Tiger Reserve
Sign the petition at: http://www.goanet.org/petition/petition.php
---------------------------------------------------------------------------
