SON’VARACHIM SUNGTTAM: XEM’BOR RUPIANCHO TIATR! - IV - Jose Salvador Fernandes
Tiatr mollar itlo kall zaunk naslem tem atam ghoddunk survat zalea! Don mhoine fattim thaun tiatrache tikettichem mol xem’bor rupia zait meren, atam tiatr pollevpi lok chintunk poddla. Kitem chintunk poddla? • Itle tiatr zatat, tantuntlo khuincho tiatr pollevpa sarko asa? • Khuinchea tiatrak gelear, tikettiche duddu vosul zatole? • Tiatrak vetanam, ghorantlea kitlea zonnank vhorpachim? Tiatr pollevpi oxea nodramni atam tiatrancho vichar korunk lagla mhonntoch, tiatr pollevpi atam xanno zaunk lagla mhonnchem poddta. Itlo kall ho tiatr pollevpi, satolleantlean jitle-i tiatr zatale, title-i tiatr to chukoynaslo. Konnacho-i, khuincho-i ani koslo-i tiatr polleunk to dhanvtalo. Punn atam, tiatrachi tikett mharog zait meren, to utt’ta-bosta konnacho-i, khuincho-i ani koslo-i tiatr polletalo tem pollevpachem tannem atam tallunk survat kelea. Atam he gozalik lagun, tiatr mollacher khub kitem ghoddunk vatt ugti zatoli. Tiatr pollevpi unchlea tea tin konnantlean tiatracho vichar korunk lagla zalear, oxe poristhitint poile-voile suvater tiatr borovpiamni-digdorspiamni bhannar yeunchem poddtolem. Apunn tiatr boroytanam, apunn konna khatir boroyta, kitem boroyta ani kiteak boroyta hacho tannim khub kholayen vichar korcho poddtolo. Tiatr ho sahityacho anik ek prokar dekun, apunn tiatrachi borpavoll mhonn jem kitem boroyta, tem sahityache nodrentlean borich xizloli ani tizloli asunk tannim khub thokos ani zotnay gheunchi poddtoli. Eka tiatrachem pon’nas tok’ke zoit tiatr borpavollicher adarun asa mhonntoch, hi borpavoll tiatr machier chalik lagta tednam ti tiatr pollevpiank aple kodelik chittkaun dovorta te nodrentlean vichar korun tannim aple tiatr borounche poddle. Dusrem, tiatrachim her angam – digdorxon, kolakarachi bhumika korchi tank, songit, bizlechi vevostha ani ek tiatr, dorjedar tiatrachem rup dhorta toslo zaunk tiatr machier haddunk zababdari ghetlolea tiatr borovpiamni ani digdorspiamni khubuch thokos gheun vavurchem poddtolem. Karonn, az tiatr pollevpi tiatram vixim zago zala… khuincho tiatr polleuncho ani khuincho polleuncho nhoi tem vinchun kaddunk itlo kall cholonaslolem tachem monachem chokr atam ghunvunk lagla… to tiatram vixim vichar korunk lagla… Tiatrachi tikett xem’bor rupia kelea tantum, tiatr boroun ani digdorsun machier dakovpi soglleach tiatr borovpiancho aspav asa oxem nam. Kaim zonn tiatr borovpiamni aplea tiatranchi azun-ui tikett vaddounk nam… ti sot’tor rupiancheruch asa. Karonn ? Ghoddie, tiatr mollar tiatr borovpi ani digdorspi mhonn aplo zago khuim urta hi tankam khobor asa zaum-ie, ani taka lagun apunn aplea tiatrachi tikett vaddoynam tantum xanneponn asa oxem tankam dislam zait. Punn, atam urtelem tem rup dhortelem! Atam tiatrachi tikett xem’bor rupia zalea dekun, tiatr borovpiam mukhar tiatr mollar khorem avhan ubem zalam. Kalla promannem sogllem mharog zalam, ani tem tiatr mollar-ui lagu zata mhonn promannikponnan amchea tiatr borovpiamni tiatrachi tikett vaddoylea zait. Punn tiatrachi tikett choddoytanam, atam apnna mukhar ek avhan-ui ubem zatolem oso tannim vichar kel’lo zalear khobor nam. Punn tannim te vixim vichar korum vo naka korum, sot gozal ti hi – tanche mukhar tem avhan ubem zalam! Avhan, bori borpavoll toyar korpchem. Avhan, tiatrachem goroz toslench digdorxon korpachem. Avhan, kolakaramni kolechem khorem rup dakoupachem. Avhan, tiatrachim tim-tim angam tiatrak ‘Tiatr’ mhonn unchlea panvddear dovorpachem. Avhan, aplea tiatrantlean tiatr pollevpianchea monanchi vicharanchi bhuk bagoupachem. Avhan, tiatr pollevpiank khorea sahityachi ruch divpachem, ani ti ruch dita-dita tiatrachi anik-ui ruch nirmann korpachem. Avhan, tiatrantlean tiatr pollevpianchim monam-kallzam jikpachem. Avhan, tiatrantlean Konknni bhas-ui unchlea panvddear pavoupachem. Hea avhanak amche tiatrist khorea orthan tondd dium, ani tantum tankam zoit mellum! www.goa-world. com >>GULF-GOANS e-NEWSLETTER (since 1994) >>http://www.yahoogroups.com/group/gulf-goans/ http://www.colaco.net/ >>http://www.live365.com/index.live________________________________________________________________________________THOUGHT >> FOR THE DAY: If you're still looking for that one person who can change your >>life, >take a look in the mirror.
