Fottaxeo Nakat! Kaposidad Aslear ‘Dhirio’ Chalu Korat Nodixim udok piyevnk ail’le kodden khub disamni eka boil ani reddeachi bhett zali. Reddo sodam porim uxar naslo. Gaborlolo distalo. Boilan taka vicharlem. BOIL: Khub tempan mure? Bhiyelolea porim dista. Zalam kitem? REDDO: Avois!! Tukach khobor nam tor? BOIL: Tuje bhaxen hanv chodd heddtam? Xet kospak ani zotak bandttat mhaka. Ani mhojem kam’ kitem? REDDO: Hei-ii. Hem soddun di atam. Adle bhaxen porot hero zavpacho vell lagim pavla tuzo. Zon’varanchea bhuzancher bondunk dorun, Gõyche Vidhan Sobhent, Waghan mottean denkor ghatla BOIL: Ranantlo vag Gõychea Vidhan Sobhen? Kiteak ailolo? Gõy luttolea netancho, takai vas ailo kitem re? REDDO: Boil to boiluch tum. Ranantlo vag nhi re papia. St. Andre motdar songhantlo amdar Vishnu Surya Naik Wagh BOIL: Leitão nanv aikololem. Wagh poile pavtt aikotam. Ek sang. Porvorim ranant, Waghan motten denkor koslo ani kiteak ghatlo? REDDO: To mhonnta, redde-boilancheo dhirio Gõykaranchi ek porompora. Dekhun, teo portean suru korunk, atanchea BJP sorkarak ulo marla. BOIL: To poiloch nhi osleo fottaxeo marpak. Lok Sobechea pott-vechnnuke 2007 vorsant, Khasdar Francisco Sardinho-baban, apun Lok Sobhechim eleisanvam jikhlo zalear, Gõyant redde-paddeancheo dhirio bond asat teo porot suru korunk porvongi ghetolom mhunn Saxttichea motdarank fottaxeo marun babod utor dil’lem. Redde-padeanche dhoni ani poromporik dhiriancho khell umedin pollovpi, tannem dil’lea utrachi vatt polloit astana, Febrer 6ver, 2009 Gõychea Vidhan Sobhen, anik ek Kurtorecho Amdar Reginaldo Loureco-n, poromporik Gõycheo dhirio soglle nem’- kaide pallun lokacho avddicho khell portean chalu korcho mhunn, ek, dhom’ naslolem khasgi bil (a private member’s bill) vidhan sobhent bhitor kaddlolem. REDDO: Boro asa mure tuzo komputtor. Zaiteo khobro sugur keleat tunvem hea pornnea komputorant. Thoddi bhov gineanachi tokli aslolo boil tor tum. BOIL: 1997 vorsant Suprim Korttan, Prevention of Cruelty to Animals Act, 1968 kaido laun, poromporik dhirio kaidean bond kel’leo asat. Zalear, Unchlea Neayaloyan dilolo hukum, Wagh-ak zanniv astana, tannem koxe toren tazeo fotaxeo marunk zatat? REDDO: Fottaxeo aikotole pixe re? Ani people for animals mhonntat te tonddant bott ghalun oge bostole? BOIL: Tech lok nhi mure te? Gõyant gorvam marpak ani mas khavpak bond korpi? REDDO: Zait ghoddie. Punn kitem-i zaum re boila. Dhiriam tempar tuka borixi pend, gonv, ani her ruchik gottsanichem poddtalem. Atam poi tuka. Funk marlear soklak poddtolo. Hem soglem borem-borem amchem jevonn bond poddunk, konn tori ghuneavkari asa. BOIL: Maneka Gandhi mhonnta tum? REDDO: Konn ti? Hanv vollkona tika. Hey…heyiiii… Xetan sogloch dhull zala mure. Konnacho boil re tea tornatte gayechea pattik lagla? BOIL: Like father like son. Cheddo to mhozo. Hem kainch nhoi. Mhoje dhanddge pirayer hanv uzo kortalom. Voir ganvantlea lokak, Rambo mostela mhonn kolltalem. REDDO: Punn atam kiteak zaina tor tujean? BOIL: (Lojun) Kapão kela. Lino B. Dourado
