Yo sempre esset surprisat pri li old usation de 'temporan' con li signification de "tosti", e quelcvez mem de "anteyan". Yo nequande comprendet que 'tempor-an' posse significar tis.
== Parte 1/3: Exemples de 'temporan' == Vi *omni* exemples trovabil in Cosmoglotta til 1950. 1927: Ma ples supposir, que ti entusiasme evanesce, tande anc li social base de Esperanto va evanescer samtémporanmen. It va cessar viver. E si ne plu temporan, to va eventer quande li lingue vell esser oficialisat, obligatori. 1928: Li max acri objetion contra ti opinion deriva del participation de grand homes. Talmen esset plu temporan Cartesius e Leibniz, talmen es un Wilhelm Ostwald recomendatores del artificial mundlingue. 1928: Necos de novitá valorosi in su project posse defender li tro temporan publication: in contrari, li novitás til nu publicat on totmen ne posse laudar. 1928: It es ancor yun. Noi ha videt, ad u ducte li tro temporan specialisation in ancor debil e flexibil etá. Al ínpossibilitá adaptar se a changeat conditiones. 1929: Li max mult del temporan Esperantistes apartenet a ti ci tipe e it es mersí a lor fidelitá e self-sacrificie que Esperanto es u it es hodie. 1929: Noi esperat que li libre va posser aparir ja sat temporan ante li fine del annu 1929. 1930: Ancor es tro temporan profetisar del levul flanc un petrification o del dextri tel un dispersion del lingue international. 1932: Nu, post 25 annus, it ne es tro temporan publicar ti documentes secret! 1933: Fredirico Wilhelm III dit pri li ferrovia: «Yo ne posse imaginar to quam grand felicie, si on ariva in Potsdam quelc hores plu temporan». 1934: conspiration contra li roman procurator, in quel il esset invelopat e quel vell dar le li morte sur li cruce, si it esset decovrit tro temporan. 1934: Li munde apartene a tis qui leva se temporan. 1935: Omni patres qui have filies in li apt etá ne neglige interessar les temporan por nor excellent Occidental 1935: Ja sat temporan fat se sentir un altri tendentie, ti de rendir li númeres plu clar por li calculation. 1935: It es ti honorabil individues, quel save self, quande lor abonnament comensa e fini e quel, spontanmen, prolonga ti abonnament in témpor suficentmen temporan por que omnicos functiona glatt e sin frictiones. 1936: li assemblé general de CLUB OCCIDENTAL (...) ha resoluet, recomendar al Institute Occidental un max temporan edition de un nov, plu ampli adressarium de APIS. 1938: Bon nocte, seniores! Noi vole omnes ear in lette e deman continuar li via tre temporanmen! 1938: Quande in li matin temporan un tambur trumpetat por depart in li stradas scarp e lapidosi 1939: un bon organisat servicie de observation presc sempre successa alarmar sat temporanmen. 1939: Li locale del reunion va esser comunicat sat temporanmen al partiprendentes. 1939: Li vesperal repaste deve evenir temporanmen, adminim tri hores ante li cuchada. 1942: Necós simil evenit in li ancian munde in quel li civilisation ja temporanmen developat se. 1942: Talmen in India li industrie del «chales» de cachemir aparit tre temporan. Anc India tre temporanmen usat jute. 1942: E pro que li chirurgos havet ye ti die labores plu urgent por curar li viventes, ili pensat que it vell esser sat temporan ocupar se pri Antonio li secuent die. 1942: ili vell har fat to solmen pos 19 dies (ma tamen ancor plu temporan quam normalmen). 1943: E nu il ha abandonat nos mult tro temporan, ma noi ne va obliviar le! 1943: Ti suposition, quel por cert archeologos interim devenit firm conviction, es confirmat in ultra per altri plu temporan decovritiones == Parte 2/3: Exemples de 'ho-temporan' == Li facte que 'tempor-an' per se ne have li significacion de "tosti", es clar quande on vide it in 'ho-temporan', pri quel hay du exemples in Cosmoglotta: 1939: [Occidental] vell esser un digni idiomatic medie, apt por ínmediat intercomunication e comprension in scopes del ho-temporan e futur era. 1947: anc mult altri editiones -- manuales e nov propagatives -- posset esser realisat malgré li desfacilitás ho-temporan. == Parte 3/3: 'tost' e 'bentost' == Felicimen, in 1945 on mettet un poc de sense in li afere: Tost. Til hodie on ha traductet li idé de F «tôt», E «early», D «früh» per «temporan» quel logicmen significa: quo apartene al témpor. Un radica special sembla ci necessi e lu max bon sembla esser «tost», con su corespondente adjectivic «tosti». «Bentost» resta por traducter F «bientôt», E «soon», D «bald». -- Marcos Cruz http://alinome.net -- ne.alinome.net -=-=-=-=-=-=-=-=-=-=-=- Groups.io Links: You receive all messages sent to this group. View/Reply Online (#615): https://groups.io/g/interlingue/message/615 Mute This Topic: https://groups.io/mt/98757054/21656 Group Owner: [email protected] Unsubscribe: https://groups.io/g/interlingue/leave/5161842/21656/2010256328/xyzzy [[email protected]] -=-=-=-=-=-=-=-=-=-=-=-
