Satemenna, taun 88-an, waktu kuring ngantor di daerah Mayestik, kuring kungsi
ngocal-ngocal Bang Jejen, KH Zainudin MZ, nu harita keur nanjung karirna, nepi
ka dilandih Dai Sajuta Umat: Kumaha mun anjeunna ngajelaskeun kitab-kitab
mujarobat eta. Diedit deui, atawa ditulis ulang pisan. Paling heunteu dibere
catetan kaki. Nepi ka jelas asal-usulna. Jadi ilmiah, miboga dadasar nu jelas,
luyu jeung tradisi ilmiah jeung kasahihan nu nyampak dina sajarah paelmuan
jeung prak-prakan Islam beh dituna luyu jeung akidah. Pan dina tarekat ge
sanadna sok dijelaskeun? Malah, aya ijazahna. Paling heunteu, aya penjelasan nu
asup akal ngeunaan tradisi mujarobat ieu.
Lain nanaon. Nya lebar bae. Sanajan teu ngamalkeun, malah bisa jadi teu
percaya kana eusina, alatan teu jelas asal-usulna tea; keur kuring, kangaranan
elmu atawa kaweruh mah keukeuh bae kudu dimumule. Komo, siga nu katingali
salila ieu, sumebarna eta kitab teh kawilang rohaka. Kituna teh, sakumaha geus
digambarkeun di luhur, langsung ka grass root. Hartina, efektif pisan dina
mencerdaskan umat. Kitab-kitab lian, nu daria jeung puguh ajen ilmiahna,
can karuhan bisa kitu. Digegembol jeung digelarkeun ti mimiti golodog tajug di
luhur gunung nepi ka emper masigit di basisir. Bubuhan, eta kitab teh pan
kaasup kitab-kitab praktis. Sarupaning how to, paling kaasup chicken soup
for the soul, mujarab pisan keur ngupahan pasoalan nu disanghareupan ku jalma
loba nepi ka sakapeung dianggap leuwih sakti manan Quran sorangan.
Sanajan ngahayukeun, eta pangajak teh teu kalaksanakeun. Wuwuhan, anjeunna
sibuk nataku. Tableg di mana-mana. Bari, harita, salila Romadhon, hayoh karah
nyerat di Pos Kota. Kadieunakeun diembohan ku popolitikan. Atuh, rarancang teh
siga nu kapopohokeun. Rek dilakonan ku sorangan? Matak ngumaha ka kiai ge,
rumasa teu nyaho elmuna. Nyaho mah, ti iraha keneh ge geus dikeureuyeuh. Malah,
alatan ku nyaho tea, boa-boa kuring moal nepi ka ngacaprukeun perkara ieu.
Kungsi eta ge, taun 90-an, waktu ngantor di Velbaak, kuring ngocal-ngocal
deui perkara nga-ilmiah-keun kitab mujarobat eta. Harita mah ka babaturan
gawe, urang Surabaya. Ngocal-ngocal teh pedah bae manehna nahdliyin tulen
bari deukeut jeung Gus Dur. Wuwuhan urang Surabaya tea. Oge, sanggeus
diheureuyan perkara kamujaraban doa-doa nu aya dina eta kitab, manehna kungsi
ngudar rusiah kumaha bisa nepungan sumber-sumber berita nu hese ditepungan
kaasup nembus birokrasi Myanmar, mangsa Aung San Suu Kyi mimiti jadi tahanan
rumah. Ceuk manehna, salah sahiji resep-na, nya doa-doa nu aya dina
kitab-kitab mujarobat tea. Ngan, poho deui nu mana nu manana. Jeung teu
diinget-inget deuih. Harita, padu ngayakinkeun bae. Jeung, leuwih ngurihit
sangkan manehna nyieun buku nu ilmiah ngeunaan kitab-kitab mujarobat tea.
Siga ka Bang Jejen, pangolo kuring ka eta batur ge ukur diheueuhkeun. Ongkoh,
manehna boro-boro nulis buku. Pagawean di kantor ge meh teu kawadahan.
Kadieunakeun, mangsa Gus Dur jadi Presiden, manehna kapentes jadi salah saurang
juru bicarana. Atuh, pamenta ngeunaan nulis buku teh beuki teu kacumponan.
Sanggeus aya kana taunna kapopohokeun, kamari, tilu bulan rek puasa,
panyakit mujarobat teh mucunghul deui. Rumasa loba dosa, malah geus deukeut
ka murtad, mereketkeun maneh hayang susufian: Puasa teh embung diganggu
(heula) ku urusan dunya. Ti anggalna keneh geus tatan-tatan. Pagawean dikebut,
ambeh bulan puasa teu kudu gawe. Buku-buku nu sakirana bakal ngandelan
kaimanan, sukur-sukur dibarungan jeung nambahan kaweruh, dibeulian. Utamana:
Yasin jeung tahlil, nu dilengkepan ku tarjamahanannana jeung nu pangpentingna
-- aya... hurup latenna! Teuing ku naon, kuring bet ujug-ujug resep kana ieu
amalan.
Keur anteng ngaguaran buku-buku obral, kurunyung teh sobat heubeul: Kitab
mujarobat. Aya kana sapuluh bukuna. Teu antaparah deui: Kabeh dibeulian oge
sawatara buku-buku pinggiran lianna. Barang beuli teh nepi ka diselang heula
ngingkig ka ATM. Da, duit nu aya dina loket teu nyukupan.
Mau bikin perpustakaan, Pak?, ceuk budak nu ngaladangan.
Iyah, ceuk kuring.
Talatah manehna sangkan kuring bisa milih-milih eusi eta kitab mah teu
diwaro. Kuring ngingkig ngagiwing kitab nu geus dibeungkeutan. Aya kana opat
beungkeutna.
Gang Tengah, 17 November 2007.
Maman Gantra
Jalan Salemba Tengah 51,
Jakarta 10440.
0812-940-5441
---------------------------------
Never miss a thing. Make Yahoo your homepage.
[Non-text portions of this message have been removed]
PENTING..!
attachment akan dihapus & tidak diteruskan kepada seluruh member.
dilarang beriklan. pelanggaran atas peraturan ini akan dikenai sanksi berupa
pencabutan membership.
terutama bagi pengguna ms outlook/outlook express, dihimbau untuk selalu
mengupdate antivirusnya.
Yahoo! Groups Links
<*> To visit your group on the web, go to:
http://groups.yahoo.com/group/kisunda/
<*> Your email settings:
Individual Email | Traditional
<*> To change settings online go to:
http://groups.yahoo.com/group/kisunda/join
(Yahoo! ID required)
<*> To change settings via email:
mailto:[EMAIL PROTECTED]
mailto:[EMAIL PROTECTED]
<*> To unsubscribe from this group, send an email to:
[EMAIL PROTECTED]
<*> Your use of Yahoo! Groups is subject to:
http://docs.yahoo.com/info/terms/
