Kitab Mujarobat
Teuing ti iraha mula kuring kataji ku kitab-kitab mujarobat. Ngahaja kecap
kataji dina eta kalimah make tanda petik (poho deui, naon Basa Sunda-na
tanda petik?). Maksudna: Lain pedah kuring ngarti atawa sok ngamalkeun naon
nu aya di dinya. Tapi, eta bae ku asa araraheng eusina. Bari sagala aya. Ti
mimiti doa kawedukan nepi ka cara-cara solat istiharah atawa doa ngubaran
bisul. Kituna teh sok dibarengan ku isim, wafaq, atawa jimat tea. Karuhan,
kumaha prak-prakan ngamalkeun eta doa mah.
Geus kitu, tipografi jeung desainna kawilang unik rame jeung remen
pabalatak teu puguh. Mun dina koran atawa majalah mah, circus lay out tea
meureun. Jajauheun tina clean atawa minimalis, jilid buku-buku ieu remen
diilustrasian ku gambar-gambar ala Hidayah: Aki-aki atawa lalaki make sorban,
bari beungeutna jambrong ku kumis jeung jenggot. Diembohan ku parupuyan nu
haseupna ngelun atawa...keris, nu buburinyayan. Pokona mah, mere kesan
mistis. Wuwuhan elmu wali tea meureun.
Nu matak helok nepi ka kiwari: Lian ti loba pisan nu nulisna, bari eusina
sakapeung tumpang tindih atawa sarua pisan, umumna doa atawa amalan nu araya
dina eta kitab-kitab teh teu jelas asal usulna. Saha nu mimiti ngamalkeunnana,
kumaha bisa nepi ka nu nulisna. Mun tea mah meunang narjamahkeun, tina kitab
naon, saha nu nulisna, jste, jste. Karuhan dibarungan ku dalil-dalil nu nyampak
dina Quran atawa hadist mah. Paling disebutkeun, amalan para wali atawa
amalan orang-orang khowas. Teu aneh, mun sawatara di antara doa-doa nu aya
di dinya dipinuhan ku Basa Jawa.
Sanajan teu ngarti, teu weudeu kuring sok pirajinan ngumpulkeun eta
kitab-kitab aheng teh. Wuwuhan, siga buku-buku pinggiran lianna, oge
buku-buku agama umumna, hargana kaitung murah. Ongkoh, pola distribusi jeung
marketingna ge pan kawilang unik: Lian ti toko-toko buku agama, kitab-kitab ieu
teu arang digelarkeun di trotoar, di emper toko. Kaasup, di emper atawa buruan
masigit. Boh tiap-tiap aya pangajian atawa mangsa jumaahan. Kituna teh, lain
bae di masigit-masigit ahlul sunah wal jamaah atawa masigit-masigit
tradisional siga masigit Kemang Bangka, Cilincing, Kwitang, Kampung Bandan,
Marunda, atawa Luar Batang. Tapi, buruan Al Azhar atawa masigit Mabes Polri ge
teu arang kalentaban seuneu militansi tukang-tukang kitab eta. Malah, siga
halna buku-buku populer lianna, sarupaning kamus atawa majalah TTS, eta
kitab-kitab remen disodorkeun ka hareupeun irung mun sakalina urang naek
kareta ekonomi atawa beus. Kadieunakeun bae, nu dagangna leuwih nyakola: Lian ti
dibuka ku hutbah, nu sakapeung nyerep kana jajantung, eta buku teh sok
diteundeun dina lahunan urang, kaasup dina bangku kosong pisan teu
diasongkeun teuing kana tarang urang.
Kukituna, taun 90-an awal, sanggeus meh tujuh taun kuring balik deui ka
Jakarta, koleksi kitab mujarobat kuring aya kana belasna mun lain puluhan ge.
Siga ceuk tadi, kuring nganggap eta buku paling heunteu saheulaanan -- lain
salaku buku agama nu daria, nu ilmiah, nu jelas asal-usulna. Kuring leuwih
nganggap salaku buku sastra pinggiran jeung alatan wanda isim-isim nu aya
di dinya -- senirupa pinggiran bae. Legegna mah: Leuwih nganggap salaku teks
antropologi manan teks elmu agama.
Hanjakal, eta koleksi teh kaluli-luli. Sakumaha buku-buku kuring lianna, nu
dikumpulkeun mangsa bujangan. Ongkoh, satadina, meuli buku teh siga menak :
Bacaeun jaga. Mun geus loba waktu. (Atuh, pantes belet teh teu
anggeus-anggeus. Da, batur mah geus nepi ka mana, ieu masih ngadeluk dina buku
heubeul).
Inget-inget basa caah gede narekab Kampung Malayu (1996?), nepi ka Bukit Duri
jeung Lapangan Roos ngilu kakeueum. Eta ge dibejaan ku nu katitipannana: Buku
teh ancur kakeueum caah. Harita, rumasa boga imah jauh ti kota, buku-buku teh
dititipkeun di hiji kolot, nini-nini urang Padang di Bukit Duri. Itung-itung
manjangkeun silaturahmi. Kajeun teuing ucul duit saeutik, keur ngontrak kamar,
sakalina perlu tinggal muru kadinya, sakalian nyumput tina kasibukan sapopoe
nu arang pisan kalakonan.
Atuh, basa banjir gede ngeueum eta wewengkon, koleksi teh ngilu palid.
Euweuh nu kapuluk hiji-hiji acan. Araduy, wuwuhan kakeueum aya samingguna. Aya
kana dua petina. Ti mimiti Britanica, nu meunang hese cape ngiridit, nepi ka
tarjamahan hadis Buchori-Muslim jeung tarjamahan sawatara tafsir.
Maman Gantra
Jalan Salemba Tengah 51,
Jakarta 10440.
0812-940-5441
---------------------------------
Looking for last minute shopping deals? Find them fast with Yahoo! Search.
[Non-text portions of this message have been removed]
PENTING..!
attachment akan dihapus & tidak diteruskan kepada seluruh member.
dilarang beriklan. pelanggaran atas peraturan ini akan dikenai sanksi berupa
pencabutan membership.
terutama bagi pengguna ms outlook/outlook express, dihimbau untuk selalu
mengupdate antivirusnya.
Yahoo! Groups Links
<*> To visit your group on the web, go to:
http://groups.yahoo.com/group/kisunda/
<*> Your email settings:
Individual Email | Traditional
<*> To change settings online go to:
http://groups.yahoo.com/group/kisunda/join
(Yahoo! ID required)
<*> To change settings via email:
mailto:[EMAIL PROTECTED]
mailto:[EMAIL PROTECTED]
<*> To unsubscribe from this group, send an email to:
[EMAIL PROTECTED]
<*> Your use of Yahoo! Groups is subject to:
http://docs.yahoo.com/info/terms/
