Ironisna, paling heunteu dugi ka taun 80-an, kalayan teu sadar, polisi
nancebkeun wanda kadaerahan atanapi identitas primordial eta dina dunya
kajahatan. Kelompok Palembang, misalna, dilarapkeun ka kelompok kriminal nu
gawena malingan eusi kamar hotel nu keur ditinggalkeun nu nyewana pedah
anggota eta kelompok memang asalna ti daerah Palembang. Kelompok Solo,
dilarapkeun ka kelompok kriminal nu ngahususkeun maneh ngarampog nasabah bank,
Kelompok Banyumas ka kelompok nu ngahususkeun maneh ngagangsir toko emas,
Kelompok Banjar(masin) dilarapkeun ka kelompok nu gawena malsukeun cek jeung
dokumen perbankan lianna, Kelompok Banten dilarapkeun ka pareman-pareman nu
ngageugeuh Sunda Kalapa, Kalijodo, jeung Luarbatang, sjte. Pon kitu deui
pers. Kantos kaered ngiring manjangkeun wanda primordialisme eta, ku mere
stereotype nu teu nguntungkeun ka hiji kelompok malah bau rasialis bari
diskriminatif pisan. Utamana nu nyangkut dulur urang, urang Tionghoa.
Kapungkur, mun maos
koran, urang sok mendakan singkatan nami tersangka kajahatan nu diembohan ku
kocap WNI. TSK, WNI, 47 tahun. Tara mendak, misalna: MGT, Sunda, kasep, 67
taun.
Tah, sadaya proses sosial-politik eta teh teu nyambung pisan sareng
modernitas atanapi udagan modernisasi nu satemenna, lain bae parok sareng
implengan para founding fathers, tapi oge sareng tuntunan agama. Boh dina
hartos kahirupan nu demokratis, paekonomian nu teu dibeungbeuratan ku ekonomi
biaya tinggi alatan seueur praktek korupsina, pendidikan ala Barat nu
membebaskan bari nyekrup jeung kabutuhan hirup anu nyata, dalah sikep
masarakat kana kasehatan jeung kabersihan, oge kabudayaan jeung aspirasi
kadaerahan nu mekar kalayan wajar. Perkara nu ahir ieu, katingali misalna
kumaha inohong-inohong Sunda di Jakarta cenah -- remen ngapilainkeun
kagiatan-kagiatan ka-Sunda-an, boh nu sipatna murni kasenian kabudayaan, boh
komo nu boga wanda politis pisan. Alatannana, sanes bae ukur pedah laleutik
burih. Tapi, nya inggis (naon bedana jeung leutik burih?) disarebat teu
nasionalis.
Intina, di zaman Orde Baru, aya sumanget sareng usaha nu kaleuleuwihi pikeun
nekenkeun kesatuan jeung persatuan bari mengpet isu-isu jeung aktivitas nu
sipatna kadaerahan. Antukna, mangsa reformasi meledug siga kiwari, isu PAD teh
ceuyahna meh audzubilah. Saeutik-eutik PAD, saeutik-eutik Sunda Pituin.
Saeutik-eutik Subang Asli, Garut Asli, Tasik Asli. Padahal, saha jeung naon nu
satemenna asli teh? Ongkoh, di mana teu asli ge, atawa lain papada Sunda pisan,
pan sarua WNI? Sarua manusa? Paling heunteu, siga ceuk tadi: Papada muslim.
Ceuyahna isu atanapi sentimen PAD teh sanes bae dirojong ku otonomi daerah.
Tapi, oge ditanggeuy ku teori atanapi analisis nu pakait sareng globalisasi.
Pan, disebatkeun ti 20-an taun kapengker, globalisasi teh bakal nyanghareupan
sawatara paradoks: Diantawisna ku mucunghulna (deui) lokalitas atanapi
lokalisme. Di dieu, budaya global bakal ditangtang ku budaya lokal sebat bae
kabudayaan daerah. Dibumbuan ku isu keberagaman, the other, post modernisme,
sjte, teori PAD teh siga nu diipukan, asa digedekeun hate. Ongkoh, aktivis
lingkungan mah tos ti dekade sateuacanna ngagorowokkeun think globaly, act
localy. Oge, Daniel Bell ngembrakkeun perkawis tumpurna ideologi, nu engke
nyambung sareng skeptisisme kana ide-ide jugala, dekontruksi, pembangunanisme,
kalebet kana ide sareng prak-prakan globalisasi, de-cocacola-ism, sjte. Nya,
pangipukan isu PAD teh beuki ceuyah bae. Da sanes bae ngagaduhan titincakan
politis atanapi sosial. Tapi, oge tintincakan teoritis atanapi
ilmiah pisan.
Tangtos bae, salaku aspirasi nu murni, nu kaluar tina kereteg hate jalma
loba, mucunghulna atanapi dianggena isu PAD eta teu lepat. Paling heunteu
iasa kahartos. Sanes bae perkawis demokrasi. Tapi, oge perkawis HAM. Tapi, naha
leres kitu: Eta isu satemenna aspirasi jalma loba? Kalih ti eta, di mana leres
ieu isu aspirasi jalma loba, naha leres kedah diaminan atanapi digegedekeun
pisan? Dugi ka janten salah sahiji kriteria dina nangtukeun calon bupati,
misalna? Intina, naha pantes elit-elit politik, nu logikana langkung pinter
sareng langkung ngagaduhan kadeudeuh sareng kaheman kana kahirupan jeung jalma
loba, tikelebuh kana kasasaban ku ngiring ngagunakeun ieu isu? Ieu sanes bae
bagian tina leadership. Visi atanapi idealisme. Tapi, ukur common sense. Akal
sehat. Pan, aya filosof nu nyebatkeun: Bebeneran teu ditangtukeun ku angka.
Oge, nu rada adigung: Demokrasi teu parok mun dilarapkeun di antara masarakat
nu (masih) bodo. Da, ukur kumaha ramena. Nu teu arang ukur
kumaha nu wani ngamimitian ngagorowok, nu sakapeung gorowokna teh padu bae.
Padu beda. Padu disebut wani.
Sapertos tos disabit-sabit di luhur, isu PAD sakapeung kaleuleuwihi nu
epekna urang siga jalma kurung batok atawa kurang gaul. Dina konteks Subang,
misalna. Urang remen nganggap urang Tasik, urang Majalaya, urang Cikoneng,
urang Salawu, urang Cibeber, urang Maja, urang Bongas, atanapi urang Padeglang
sareng urang Lampung pisan, nu tos lami bubuara di ieu wewengkon, bari saeutik
seueur aya kontribusina, sanes urang Subang. Padahal, pan papada Sunda? (Dalah,
pan urang Pantura ge sok rada diapilainkeun ku urang Kidul?). Paling heunteu,
sakali deui: Sami-sami warga nagara Indonesia? Malah, sami-sami papada manusa?
Kapentingan politik nu teu elegance, nu wungkul didorong ku nafsu kumawasa,
malah ukur ku asa aing (ego), remen ngiruhan akal sehat jeung kamanusaan.
Dina konteks Tatar Sunda, ku isu PAD eta, urang remen ti gujubar kana
nganggap yen Tatar Sunda teh ukur nepi ka pager sorangan atawa regol di lembur
sorangan. Di luar eta mah lain Tatar Sunda. Lain lembur aing. Lain urusan aing.
Antukna paaing-aing. Teu aneh, mun basa Wakil Presiden Jusuf Kalla nyodorkeun
heureuy nu teu payus, ngeunaan pabrik calon artis sinetron di wewengkon
Puncak, urang Sunda teu kadenge kemekna. Da, ku pikirannana, panginten, Puncak
mah lain Tatar Sunda. Tapi Tatar Cianjur atawa Tatar Bogor. (Urang Cianjur
atawa Bogor, nu caket ka Puncak, tayohna, teu wani ngagorowok ti payun. Komo
sosoranganan. Paur dianggap aneh. Antukna, nya...sepi. Untung aya ibu-ibu nu
ngacung, nu teu jelas Sunda lainna). Karuhan ka Jakarta mah, da dayeuh nagara.
Dugi ka seueur nu ngarasa minder, nganggap Jakarta lain lembur sorangan, lain
Tatar Sunda. Miceun runtah atawa make motor ge nya kuma aing we. Komo, sakalina
Sutiyoso rek nebus dosa, ku nyodorkeun konsep
megalopolitan, can nanaon, kabeh nolak. Teu ditingali heula kumaha-kumahana.
Maman Gantra
Jalan Salemba Tengah 51,
Jakarta 10440.
0812-940-5441
---------------------------------
Never miss a thing. Make Yahoo your homepage.
[Non-text portions of this message have been removed]
PENTING..!
attachment akan dihapus & tidak diteruskan kepada seluruh member.
dilarang beriklan. pelanggaran atas peraturan ini akan dikenai sanksi berupa
pencabutan membership.
terutama bagi pengguna ms outlook/outlook express, dihimbau untuk selalu
mengupdate antivirusnya.
Yahoo! Groups Links
<*> To visit your group on the web, go to:
http://groups.yahoo.com/group/kisunda/
<*> Your email settings:
Individual Email | Traditional
<*> To change settings online go to:
http://groups.yahoo.com/group/kisunda/join
(Yahoo! ID required)
<*> To change settings via email:
mailto:[EMAIL PROTECTED]
mailto:[EMAIL PROTECTED]
<*> To unsubscribe from this group, send an email to:
[EMAIL PROTECTED]
<*> Your use of Yahoo! Groups is subject to:
http://docs.yahoo.com/info/terms/
