Saparantos manahna buleud, Abimanyu teras wae maju, teu aya kagimir; atuh ger wae diraponan. Tapi ngan sakilat sakilat Abimanyu mentang2keun jamparingna; puluhan prajurit binasa. Dursasana nu harita aya di dinya kacida keuheul jeung sirikna ka Abimanyu teras wae milu ngaraponan ngepung ka Abimanyu. Abimanyu teu gentar teras ngalayanan Dursasana. "Hahahahaha ! Manyu2X ; poe ieu kapaksa Kaula nyabut nyawa andika, Manyu ! Ulah sambat kaniaya." Dursasana susumbar. "Ah ulah waka gede omong, Paman. Buktikeun heula, yeuh tarima panah ti Kula."Abimanyu ngawaleran, bari mentangkeun jamparing. Nyata Dursasana kadesek, teu yasa ngalawan Abimanyu; sapada harita dada Dursasana kapanah, teras kapiuhan na karetana; diantep we ku Abimanyu lantaran emut yen Bhima tos sumpah bade ngalediskwun sadaya Putra Drestarastra ku anjeunna nyalira. Lajeng Abimanyu ngayonan deui para Prajurit nu teras ngambreg; Abimanyu estu aya ditengah lautan manusa musuh; tos kinepung buaya mangap. Tapi teu gentar teu sing, malah lambeyna imut, lantaran ngabayangkeun ayeuna anjeunna nuju nandingan Ramana Arjuna; perang nyorangan ngalawan sadaya prajurit musuh. Keur kitu jol Pamuda Kaep Raspati, pujaan para Prajurit Astina. Nya eta Raden Laksamana Mandrakumara, putrana Duryodhana. Barang sumping ladinya; para prajurit sarurak ngabagean Pahlawan Rumaja nu pang kasepna. Terus sadaya pada tibf corowok yen Abimanyu bakal mati lastari ku Laksamana. Enggal wae ieu dua Runaja Putra teh tarung silih panah; nyata Laksmana oge gagah sareng jago panah. Tapi lami2 mah Laksmana teu kiatan akhirna dadana kapanggang ku panah Abimanyu jero pisan; dugi ka ngajungkel ti na karetana; barang diburu, nyata Laksmana tos tiwas. Amarah para Prajurit Astina; ngaramuk bela pati. Abimanyu teras ngalawan bari tetep teger; tos teu kaetang seui nu binasa ku panah Abimanyu. Jaya Bang Winga Winga ! Amarahna Suyudhana kagiri giri; enggal muru ka Abimanyu bari manahan; tapi Abimanyu teras kalem ngalawan; Suyudhana oge kadeek tos ripuh pisan.Enggal wae Salya ngiring nyerang; Abimanyu ngantunkeun Suyudhana nu enggal dicandak ka nu aman, ku Krepa; ari Abimanyu bari waspada ku kepungan prajurit, teras silih panah sareng Salya Mandaraka. Satadina Prabu Salya rada nganggap enteng ka Abimanyu, tapi barang tos diperangan; nyata Abimanyu punjuling ngapapak,awak manusa tandangna Dewa. Salya kadesek pisan ku Abimanyu; malah tos sababaraha panah narancep kana jasmani Salya; atuh kapaksa Salya oge mundur. Karna masih ragu2 rek maju, lantaran kahiji Abimanyu masih anom keneh; kaduana sosorangan dikepung musuh; asa harianeun ngalawan hiji Pamuda di na kayaan kitu. Keur kitu corowok teh Duryodhana:"Eh sadaya Pahlawan, tong diantep eta si Abimanyu; sok koroyok we, ulah make mikir aturan deui ! Manehna geus maehan anak Kaula Lasmana Mandrakumara ! Kula hayang males pati !" Drona enggal wae nyarios ka Karna, yen mun rek nalukkeun Abimanyu; nu pangheulana nyaeta kudu kusir jeung kudana heula; kakara didinya si Abimanyu lumpuh. Teu tata pasini deui Karna mentangkeun jamparing. Sapada harita sumitra kusir kareya Abimanyu binasa; teras kadali kudana; ath ngan sakedap Abimanyu tiguling ti na karetana. Atuh ayeuna mah Abimanyu teh teu tiasa gerak deui; da kudana tos binasa; kakara bade ngangkat gondewa tos potong dipanah ku Resi Drona. Kakara bade mesat pedang, ieu ge tos parotong dipanah ku Resi Drona. Abimanyu memang tos niat bajoang dugi ka mati; teu sieun teu gimir; teras nyandak roda kareta dianggo cakram ! Tapi bade dibaledogkeun tos amburadul dipanah ku Karna.Tos kitu Putra Dursasana kadinya manahan dugi ka Abimanyu tigugulitik; salirana tos ranceb ku panah. Teras wae dileyekan ku Putra Dursasana; Abimanyu nu nuju sakarat masih keneh tiasa ngarawel sampean Putra Dursasana atuh der we papuket gelut. Atuh Putra Dursasana teh kageteun pisan cocorowokan tulung2an. Ger wae atuh Abimanyu dironom ku ratusan prajurit. najan sakumaha kuatna oge lami mah Abimanyu teu kiat deui teras lastari ngemasi pati. Sadaya parajurit Astina barungaheun pisan enggal wae sasenjata sasenjatana nojosan Abimanyu nu tos jadi mayit. Dursasana nu tos jagag deui enggal cocorowokan bari igel2an muter disakuriling mayit Abimanyu. Abimanyu hawato pisan mayitna tos teu puguh rupa deui. HANCA
