PBKS - "Sholluu" Siah Pir! Ku Roni Suarsa Kahirupan di Saudi, mun ningali tina bagbagan agama, asana teu pati aneh mun sakirana kuring saeutik nyaruakeun jeung kaayaan dilembur, palebah balatakna masjid, mun adan nya reang surup kana waktuna, saeutik mereun bedana, palebah cunduk waktu solat, di urang mah rehe da nu sibuk ibadah mah nya maranehna nu rajeun datang ka masjid keur nedunan solat, di Saudi mah teu kitu, solat teh sora imam diasupkeun kana sepeker, jadi ti mimiti cung solat nepika uluk salam parat para tatangga sabudereun masjid nyaho jeung ngadenge, utamana ka para awewe nu teu diwenangkeun ka masjid pikeun solat jamaah.****
** ** Kitu deui dina palebah solat taraweh, matak teu betah kanu tara solat, sora speaker masjid reang ti unggal juru tilawah qur’an, nu lilana sok nepika mang jam-jam.**** ** ** Tapi sagalarupa, ari ku didasaran ku ageman nu sarua mah geuning teu matak jadi halangan keur kuring sabalad-balad, samalah ku alpukahna ieu kaayaan ngajadikeun kuring sabalad-balad saladar, nu asalna remen solat sa hayuna, jadi rubah ku solat jamaah unggal mangsa, asa ngeunah kacida, tumaninah tiis ceuli mun tos rengse ngalaksanakeun kawajiban kalayan jamaah mah.**** ** ** Ngan sanajan kitu, teu ngabibisani mun dina rap na kahirupan sapopoe saluareun urusan ageman, geuning rada karasa komo ninggang di urang nu boga kereutan bengeut asia, katurug ngaran urang Indonesia mah saeutikna rada kapangaruhan ku kalangkang hibar yen urang Indonesia surupna kasab jadi jongos, eta ku lantaran eyeubna urang-urang nu ngumbara ka Saudi ngadon jaradi dengeun jeung supir anu sasatna digawe ngan ukur di Utah etah atawa dititah wungkul. Eta kaayaan karasa pisan ku kuring sabalad-balad mangsa karek datang ka Saudi.**** ** ** Untungna ku kaparigelan atikan jeung pangalaman dina widang pakasaban, nya lumayan oge martabat teh rada menyat, komo deui ninggang di urang-urangmah nu sagoreng-gorengna kalakuan boh mangsa keur gawe atawa saluareun gawe geuning aya deui nu leuwih rucah jeung bisa disebutkeun leuwih goreng leuwih males batan urang-urang, sabatae atuh angkatan kuring saparakanca teh aya onjoyna dina urusan pagawean samalah dipercaya pisan pikeun nyepeng kaluuhan ngawulang putra pribumi nu marales tea, saeutikna geuning (sanajan teu ngaku ari kudu jadi alpukahna ku lantaran sikuring wungkul mah) kaayeunakeun Indonesia teh geus lain wungkul pengekspor pembantu jeung supir, tapi geus oge kana tahapan ekspor tanaga ahli dina widang teknik sewang-sewangan.**** ** ** Apan para ahli Indonesia teh eyeub tibaheula oge? Nyaeta atuh, mereun, baheula mah urang-urang teh resep ngotok ngowo di lembur, ceuk paribasa deuk hirup deuk paeh nupentingmah ngumpul ngariung diimah, tah kaayeunakeun mah rada aya onjoyna make aya kadaek lintar ti lembur, lumayan geuning salian ti nanjerkeun palakiah oge nanjeurkeun ngaran. Samalah teu pati era teuing mun dibandikeun jeung nagara tatangga mah ayeuna, sagalana salepel sa propesi, nuhun Gusti geuning dawuh Anjeun teh nyata kacida, nyaeta, Anjeun teu samena-mena ngarobah kaayaan hiji kaom lamun teu aya ketak niat deuk ngarobah ku sorangan mah.**** Sanajan kaitung tinggaleun, tapi nunjukkeun grafik nu ngajaul apung-apungan, kabukti ayeuna sababaraha nagara mereketkeun maneh neang tanaga ahli khusus ti urang Indonesia, ieu totonden yen urang Indonesia geus nyimpen nyambuangkeun hiliwirna kembang kahadean ku alpukahna para lanceuk lanceuk kuring nu geus tiheula ngumbara.**** ** ** Ngan kadangkala sok ngarenyu, lucu, antara hayang seuri, ambek nu nyedek, mun pareng panggih jeung jalma arab nu anyar, masih keneh tepika ayeuna sok nyangka ka kuring sabalad-balad teh supir. Kaayaan ieu mangaruhan salah saurang batur kuring nu nyimpulkeun yen manehna cadu kudu bisa basa Arab ceunah, mendingan teu bisa weh, kamana mendi teh cukup we ku basa Inggris, enya eta ge sok aya pangaruhna, da heeuh kalolobaan supir jeung pembantu mah apanan bisana teh basa Arab da pagaliwota langsung jeung nu jadi dununganna. Tapi sakuringeunmah nya teu kitu oge, lulumayanan mempeung gaul jeung urang Arab, nya sabisa-bisa we dijalanan, basa Arab nya kudu, inggris komo deui da memang pagaulan sapope teh ku basa Inggris, lumayan oge geuning ari rada caang kana basa Arabmah, dina mangsa keur cacarita ka urang arab rada ngarti ninggang di urang arab badui nu teu bisa basa sejen iwal ti basa indung sorangan mah.**** ** ** Aya kajadian lucu nu dialaman ku batur kuring, harita kuring saparakanca jalan-jalan ngurilingan salah sahiji kota, sakumaha ilaharna di arab mun geus celengkeung adan, pasti kabeh totokoan jeung kagiatan bisnis lainna pada tutup salila mangsa solat tepika rengsena, saangeusna pasti dibuka deui, ieu geus jadi aturan nagri Islam siga di Saudi, nu bedegong ngalanggar aturan pasti keuna hukuman nu kuring teu pati apal nepika ayeuna oge, naha didenda atawa kumaha.**** Hiji mangsa pas celengkeung adan, batur kuring ngadon dariuk di tolotoar hiji toko bari arudud ngilu gabung jeung jalma-jalma non muslim, ceuk angkanan ke we ceunah solatmah di imah da kagok. **** Di satengahing lalakon, lar liwat pulisi agama (di Saudi mah aya pulisi agama, tugasna dina urusan agama, salahsaijina ngabuburak urang Islam nu kulayapan sangkan solat ka masjid) bari cecelengkeungan dina toa speaker, “Sholluu…sholluu…” ceunah, nu artina, solaat solaat… hartina nitah solat ka kaum muslim.**** Teu puguh jujutanana si eta pulisi bet curiga ningali bengeut batur kuring (teuing kumaha caritana), pedah mereun kereutan bengeut batur kuring teu siga non muslim pedah aya janggotan saeutik kitu? Wallohu a’lam, laju eta pulisi teh nanya, “sholluu !!!”, diwalon ku batur kuring, “thank you sir”, si pulisi malik nanya: “inta muslim?” ceunah ka batur kuring, palebah ngadenge kecap “muslim” mah tangtu ngartieun tah batur kuring teh, terus ngajawab ku unggeuk. Na atuh teu antaparah deui eta pulisi ngagusur batur kuring bangun nu ijid pisan (keurmah batur kuring keur udud nu sasatna diharamkeun ceuk maranehna mah katurug-turug teu solat deuih), bari diteruskeun ku panitah “lau inta muslim, ya lah sholluu !!!” (lamun maneh muslim, solaatt kadituh!!!) bari sesentak.**** ** ** Batur kuring sasat asa dibentar guludug mereun, dibuburak siga tibum ngarubuhkeun warung tolotoar, karek ngarti yen hartina *sholuu* teh nyaeta kecap solat dina wangun kecap parentah, saanggeus kajadian eta kuring saparakanca pating cakakak seuri, naha bet dijawab “thank you” atuh nya, marukanna deuk disuguhan dahareun mereun, tah eta balukarna tina teu ngarti basa dengeun (arab) teh.
