Maca buku tareh Islam, dina eta buku kacaritakeun hiji riwayat Khalifah Umar Bin Abdul Aziz salah sahiji Khalifah Bani Umayah (682-720 M) katelah tina kawijaksanaanana. Hiji peuting manehna keur digawe sorangan bae di jero rohangan kantorna (istana) make lampu anu dieusian minyak zaitun. Kusabab katekunanana digawe nyieun catetan jeung surat-surat penting urusan nagara, kukituna henteu sadar manehna salah saurang anakna geus aya di jero rohangan kantorna. Anakna nangtung dihareupeun Khalifah ngadagoan kasempetan pikeun nyarita. Sabot Khalifah ngangkat sirahna ngarasa ruewas (kaget), sabab dihareupeun manehna geus aya anakna. Tuluy Khalifah nanya anakna "Aya keperluan naon jang datang kadieu neupungan bapa anu keur riweuh ku pagawean". Anakna tuluy nembalan "aya hiji urusan kaluarga anu kedah ditepikeun ka Bapa". Ngadenge omongan anakna, Khalifah nembalan "Mun kitu, dagoan sakedeng, rek dipareuman ieu lampu", manehna muru lampu minyak zaitun anu keur hurung, tuluy mareuman eta lampu. Sanggeus lampu pareum, Khalifah nitah anakna nyampekeun urusan kaluarga di jero rohangan gawe anu poek mongkleng. "Tah ayeuna nyarita, naon anu rek diomongkeun, ceuk Khalifah. "Tapi naha Bapa kudu mareuman ieu lampu, ieu rohangan jadi poek, sarta urang nyaritana jadi henteu merenah", ceuk anakna. Ngadenge kamuhandeur (kahariwang) anakna, Khalifah ngomong "Duh anaking, lampu ieu dihurungkeun make minyak zaitun anu dibeuli ku duit nagara. Sedeungkeun maneh datang kadieu lain ngomongkeun urusan nagara, tapi ngenaan urusan kaluarga. Sarta kusabab kaperluan eta, mangka urang teu meunang ngagunakeun fasilitas nagara. Kusabab nagara nyaeta boga kabeh rahayat, jeung urang henteu meunang ngurangan hak milik maranehanana pikeun kapentingan urang sorangan". Saterusna anakna kukulutus "waduh Bapa ieu kumaha sih, abdi teu bisa nyarita tina kayaan poek". Sanggeus ngadenge omongan anakna anu henteu bisa nyarita di rohangan poek, tuluy Khalifah ngagero saurang khadam (asisten/pembantu) anu diparentahkeun pikeun nyokot lampu milik pribadi ti imah Khalifah, pikeun digunakeun salila ngobrol jeung anakna. Henteu lila tuluy khadam datang kalayan mawa lampu milik Khalifah. Sanggeus rohangan caang, Khalifah nyarita : "Sok jang rek nyarita naon. Urang ngagunakeun lampu jeung minyak anu dibeli tina duit milik urang". Sakitu carita riwayat anu mere contoh tauladan anu dipiboga ku saurang Khalifah (Kapala Nagara) anu nyekel amanat tina kapamingpinana anu ngawasaan harta nagara anu sakitu gedena. Mun urang bandingkeun jeung realita kiwari di nagara urang, ti Pusat, Tingkat I, II nepi ka tingkat RT anu aya nyaeta zimat AZI MUNGPUNG. Tong boro ati-ati dina ngagunakeun fasilitas nagara, malahan anu aya fasilitas nagara DIPAOKAN!!!! Salam, I. Saprudin
