Ki Darga terus nyentak:”Heh enyaan jago sampeyan teh ! sok sebutkeun ngaran maneh, bisi paeh teu boga ngaran !” Jalma:”Ngaran kuring Jalma, ari masalah paeh mah lain urusan sampeyan; jeung can tangtu mun can waktuna mah.” Darga:”Eh Jalma ! tong sambat kaniaya, maneh bakal paeh di na poe ieu ku aing, tapi maneh untung budak ! Maneh paeh teh ku leungeun Kula, leungeun hiji pimpinan perkunpulan nu kasohor nya eta Maung Hideung ! Darga pimpinan Maung Hideung !” “Hahaha ! kakuatan ilaing teu sabanding jeung carawak corowok ilaing ! boa nu kajadian sabalikna.”Jalma nembalan bari seuri. Ki Darga oge sadar yen Jalma pasti geus ngelehkeun Ki Joyo Sembodo, terus we nyorowok:”Eh Wira! Gondo! Seta ayo recah ieu budak teh, ulah dilalajoan da lain lalajoaneun !” Ki Seta neunggeulkeun tongkatna dibarengan ku Cagak ti Ki Gondo; ari Ki Dada rapet ngadeukeutan Jalma lantaran manehna mah jago Silat tangan kosong ! Ki Wira geus ngulangkeun pecut senjatana; ari Ki Darga sorangan make tongkat haur koneng tea; kabeh nuju ka Jalma. Jalma ngan sakilat sakilat; bari nyingcet tina tongkat Ki Seta; ngadorong pikeun nakis serangan Cagak Ki Gondo; terus newak pecut Ki Wira jeung nadahan panumbuk Ki Dada; ari haur koneng ki Darga dicingcetkeun mani gesit pisan. Eta sababaraha gerakan Jalma teh dilaksanakeunana ngan sakilat2 ampir teu bisa katempo ku panon biasa; nyaho2 eta serangan limaan teh gagal we. Nenjo serangan mimiti bisa digagalkeun ku Jalma, Ki Darga beuki napsu, terus manehna nyecer ku haur koneng nojosan Jalma; Ki Wira jeung nu sejenna gancang marengan eta serangan; tapi teorina mah bareng nyerangna teh, tapi ari praktekna mah nya hiji2; tapi carepet pisan; tapi Jalma bisa ngabedakeun mana nu serangan nu pangheulana jeung nu pandeuri ! Tina hawa senjata atawa tonjokan, Jalma nu ceulina geus dilatih peka pisan, bisa ngabedakeunana, Jadi Jalma bisa nangtukeun nu mana nu kudu disanghareupan pangheulana, mana nu kadua katilu, jeung saterusna; tapi ku sabab cepet pisan, eta gerakan siga acak2an lima senjata ngahurup hiji; tapi kaciri Jalma teu kateter sama sakali; masih bisa ngimbangan Saenyana nu pangbahayana diantara nu limaan, nya eta Ki Dada, lantaran manehna loba nunggu, ku sabab teu make senjata, manehna ngincer terus, iraha jeung dimana Jalma meleng, atawa keur nyingcet ti senjata sejen, manehna nu mapakan Jalma ku tonjokan nu nya beurat nya cepet; akhirna Jalma nyieun kaputusan rek ngajungkeulkeun heula Ki Dada, engke nu sejenna bagilir. Na hiji waktu Jalma siga nu keuna kasabet pecut Ki Wira; nyebut aduh bari nyoloyong; Ki Darga , Ki Seta jeung Gondo meh bareng ngagerakkeun senjatana masing2; atuh Jalma kaciri ripuh, soloyong wae ngadeukeutan tempat Ki Dada. Lakadalah, cek hate Ki Dada, nya ayeuna siah ku aing dipiteskeun ieu si Jalma teh; teu antaparah deui Ki Dada ngaluarkeun sabagean gede tanagana pikeun ngajungkelkeun Jalma; tapi manehna jadi teu waspada ngan hayang nyerang wungkul, bari teu ngajaga, lantaran nempo Jalma siga kadesek pisan; manehna kurang ngajaga diri; Ngan ukur saramo jauhna eta peureup Ki Dada ti na angen Jalma nu rek dituju ku Ki Dada, Jalma ngagiwar, bari jebet ninggang persis ka na puhu ceuli Ki Dada; atuh ohek ! Ki Dada utah getih; terus we ngaguling, teu nyaho kapaehan, teu nyaho tiwas. Jalma harita keneh luncat ngajauhan tempat eta. HANCA
