Fikmin#SARKANJUT# Ku Ki Hasan
Geleber Dewi Utari hiber. Muru basisir sagara kidul. Teu kasawang ti anggalna, angin barat ngadius ka wetankeun. Siet nyingcet, nyingkahan rosana angin. Pung, ngajaul mumbul mapakan mega. Angin barat masih rosa. Najan gesit cungcat, cingcet, pluk!, endongna ragrag. Nu rusuh kapahung. Sanggeus angin leler. Seok, nu ngapung muter, nyerangkeun lebah pangragragan. Gajleng ka sisi talaga nu dikuriling embel oyag-oyagan. Jrut turun nyasar dasar talaga. Nyasaran endong kameumeutna. Nya ti harita, eta lembur katelah Kampung Sarkanjut.
