Episode 39 Maung ngalawan Macan Kacatur ki Jumsa nu ngacir bari dituturkeun ku balad2na; Ki Jumsa nu memang pang kesitna, ti heula nepina; ari anak buahna mah kapandeurian pisan. Ki Darga nu keur ngobrol tiluan nya eta jeung Ki Wira sarta Joyo Sembodo, ngarasa kaget nempo Ki Jumsa datang bari haruhah harehoh; terus we nanya :”Aya naon sia teh mani haruhah harehoh kitu ? Diudag jurig !?” “Ah jurig wae mah geus lila sieuneun ku uing; .........hoh hoh hoh....... eta aya jelema garagah ti.....i........Ci beron eh ....... Cirebon, ku kula sabatur batur dicegat; wahhhh.......heh ........heh........ heh........ maranehna ngaramuk ! uing teu kuat nya untung masih bisa salamet !” Ki Jumsa bari hah heh hoh nyoba nerangkeun. “Memangna aya sabaraha urang eta sudagar nu ngaraliwat teh !?” Ki Darga nanya . “Loba!” walon Ki Jumsa. Tapi kakara sakitu, kaburu murudul anak buah Ki Jumsa nu lalumpatan ka dinya bari ahirna ku cape2na ting kalusruk; bari haruhah harehoh. Keur kitu burudul anak buah nu sejenna daratang, lantaran ngadenge aya sora2 nu jiga raribut; barang nyaraho yen Ki Jumsa gagal; geeer we pada nyeungseurikeun; Si Jumsa samar cabak; bari era. Terus nu ting lalumbruk ditanya ku nu sejen; bari haruhah harehoh; eta nu ngalumbruk nyaritakeun saujratna, bari teu puguh dengekeuneunana ! Tapi nya kaharti oge ku sarerea; yen Pamuda nya eta Ki Cakramana; geus bisa ngelehkeun Ki Jumsa sabalad balad. Atuh geeerrr wae pada moyok, pada ngajejeleh ! “Ke ke ke heula !” Ki Wira nu pangkolotna , nu tangtu loba pangalaman nimbrung; jadi maranehna ti Cirebon ?” “Enya” walon Ki Jumsa heureut pisan. Moal kituh nu disebut 5 Macan Cirebon mah ? Cek Ki Wira neruskeun. “Lima Macan Cirebon ?! Tokoh nu kumaha deui eta teh ?!” Si darga jeung sababaraha urang anggota nanya meh bareng. “Enya tah manehna nyebut2 Macan tadi oge ! Memang limaan deuih” Cek Ki Jumsa mairan. HANCA
