Abd Gofar pok ngomong:”Kaula oge heran, kapan sampeyan Ki Tanu ti Rajawali bodas, tara aya hubungan jeung Kaula Abd Gofar sakulawarga. Aya naon tara2 ti sasari ngondang Kaula limaan ?” “Hahahaha, nya di na hal ieu mah Kaula menta dihampura; padahal ti Kuningan ka Cirebon, pan teu jauh2 teuing ? Kaula rumasa tambelar, kurang ngahargaan ka lima Macan Cirebon, tah atuh sugan ti ayeuna mah hubungan urang bisa lancar.” Tembal pimpinan Rajawali Bodas, nu disebut Ki Tanu. Nyi Ipah jeung Nyi Epon ditempatkeunana rada jauh meueusan, jadi teu pati kacirieun ku nu limaan; tapi waktu Abd Gofar keur ngobrol jeung Ki Tanu, Cakramana nempo aya Nyi Ipah, reuwas jeung kaget manehna rek nangtung , tapi dihalangan ku Abd Rauf, bari ngaharewos kudu sabar, tempokeun heula naon tujuan maranehna ngundang urang kadieu. Soal Nyi Ipah mah engke ge bisa diuruskeun. “Ah tong loba basa basi Ki Tanu, Sok sebutkeun naon pamaksudan andika ngundang Kaula Limaan ka ieu Markas sampeyan ?” Cek Abd Gofar, bari rada kurang sabar. “Hahahaha, Ki Abd Gofar, sabar. Sok ayeuna mah ngamimitian ku tarima heula susuguh basajan ti Kaula.” Tembal Ki Tanu kalem. Terus we marentahkeun ngaluarkeun kadaharan; atuh sapada harita meja di hareupeun 5 Macan geus pinuh ku kadaharan jeung inuman nu loba pisan. Nu limaan ge teu sungkan2 deui terus we dalahar kadaharan jeung inuman nu disuguhkeun. Kaciri Ki Tanu siga nu bungah pisan, narima ka nu limaan teh. Sanggeus kitu, kakara Ki Tanu nyarita deui :” Ki Abd Gofar , Kula ngahaja ngundang sampeyan lantaran Kula hayang pisan boga sobat ti Kaum persilatan sejenna; nya sanggeus dipikir pikir Kula cop ka sampeyan; lantaran pan sampeyan di kawasan ieu mah minangka pang nyongcolangna. Hahahaha. Jadi mun Kula bisa nyobat jeung sampeyan pasti Kula saparakanca untung gede pisan”. Ku dipuji jeung diumpak kitu, mangkak hate Abd Gofar, jeung memang manehna yakin, di kawasan Cirebon jeung sabudeurna mah moal aya nu bisa ngaluhuran maranehna, boh di na masalah sohorna, pon kitu deui di na luhur elmu kanuraganana. Sakabehna pasti sahandapeun 5 Macan Cirebon. Jadi wajar we, mun aya nu hayang misobat atawa mimitran ka maranehna teh. HANCA
