Fikmin #Munggahan# Ku: Ki Hasan
"Dag, dulugdug, dag, dulugdug, dag...!" "Treng, trong, teng...!" "Treng, trong, teng...!" Barudak di Tajug, maceuh ngadulag. Ma' Uneh pakpikpek di dapur. Lulumpang jeung halu tatalu. Coet jeung mutu diadu. Ngabarak samara keur opor hayam. "Bah! Usep pesen dada mentona nya!" Bah Kardi singkil. Sarung dibeulitkeun kana cangkeng. Gasik ngudag si Rengge. Gabrug dirontok. Si Rengge ngagarapak. Luncat ka tepas. Crot! Ngabayabah dina palupuh. Gabrug deui. "Beunang siah! Tong lingas teuing sia teh Rengge! Kawas kanu lian wae!" "Sep kadieu euy! Pang nyekelankeun!" "Wayahna Rengge, dipenta ridona, ku kami rek disampurnakeun!" Geresel. "Bismillahi Wallahu Akbar!"
