Tapi sanajan Subali kesit jeung mantep tapi Mawar Hideung leuwih kesit deui; malah manehna ngabarengan oge luncat sawaktu Subali luncat ka manehna; jadi di dieu Mawar Hideung geus bisa naksir kamana gerakan Subali; manehna make gerak Walet nyirorot; luncat ka luhur bari geus kitu neunggeul ti luhur ka handap ! Subali gancang ngagerakkeun leungeun nakis ka luhur; serangan nu mimiti geus gagal; malah manehna ampir kabeunangan taktakna; untung masih bisa nakis. Orokaya Subali rada ngoloyong; tapi untung gancang ajeg deui; lantaran memang Elmu Subali ampir nyaruan guruna Si Setan Alas kobar. Tapi Mawar Hideung teu cicingeun terus we nyerang deui sababaraha kali make jurus beda2 nu teu katulis di dieu ku cepet2na; Subali ampir2an; sedengkeun tapak panasna Ki subali teu aya pangaruhna keur Si mawar Hideung. Gancang wae Ki maruto jeung Ki Gento ngaluarkeun senjatana terus dipake nulungan Subali. Tapi ngan sakilat Mawar Hideung ninggalkeun Subali nu keur ripuh terus malah nyerang ka nu keur nyarerang, nya eta Ki Maruto jeung Ki Gento. Ki Maruto katampaling nepi ka babangkieungan ; ari Ki Gento persis walikatna keuna katajong Mawar Hideung. Atuh Gento aduh2an terus tigugulutik. Tapi boh Ki Maruto, boh Ki Gento duanana ge jadug; enya nyeri tea mah; tapi masih bisa ditahan maranehna maraju deui rek ngepung Mawar Hideung. Tapi kaciri Mawar Hideung teu gentar sama sakali; malah seuri ngeunah pisan; pok ngomong:”Hahahaha … sok atuh sakalian jeung paman guruna kainyah maju !”HANCA
