Episode ka 60 : Mawar Hideung ngalalakon/in action Ku sabab loba kajadian nu pikasebeleun, ayeuna Lasmini ngahaja loba meuli pakean “lalaki”; nu warna na mun teu ungu kolot, pasti hideung; manehna ge pesen loba gambar2 laleutik , ngagambarkeun kembang Ros nu warnana hideung; buukna dirapihkeun basajan pisan, terus dibengker ku pita, mun teu beureum warnana hideung . Tah ku pakean kitu Lasmini ngarasa bebas nyarekan atawa nyentak ka sing saha wae, nu wani2 ngaganggu manehna. Tapi masing manehna make pakean lalaki, keukeuh we kageulisanana teu luntur. Malah mah matak ngundang loba Pendekar kapincut ku Lasmini; atuh sapanjang perjalanan ka Cirebon teh, sering pisan Mawar Hideung tarung; boh jeung para Pendekar ngora, boh jeung nu geus karolot; lolobana tarung ku sabab hayang ngawin Mawar Hideung; dimana Mawar Hideungna mah ngarasa rada ijid, ku lalaki teh. Atuh nya antukna tarung. Tapi nepi ka waktu ieu can aya hiji ge Pendekar nu mapakan kagagahan Mawar Hideung. Atuh ngan sakeudeung ngaranna geus sumebar, sohor pisan. Ayeuna mah loba nu mariris ka Mawar Hideung teh, salian ti ku sabab kagagahana na , oge mere hukumanana oge tara kapalang; loba Pendekar nu tanpa daksa ku ieu Mawar Hideung. Di Cirebon oge Mawar Hideung tarung mani hebat pisan, jeung hiji tokoh nu oge geus kasohor, nya eta KI Barda si Kaki Sakti. Harita di Cirebon euweuh nu wanieun ngalawan ka Ki Barda, sabab jago2 Cirebon kabeh ge eleh ku ieu ki Barda. Ku sabab kitu, kalakuan Ki Barda Kacida sombongna; manehna nindes pisan; nu wani ngalawan tangtu disiksana. Pamajikanana aya salapaan urang; sering pisan mun teu ditampiling, nya digebug mah tangtu. Untungna euweuh nu boga anak ; meureun Ki Barda na gabug. Atuh pamajikan Ki Barda teh loba nu keuheul ka salakina, tapi teu wasa lantaran jago tea. Sakali mangsa aya nu nekad ngaracun ki Barda, nya eta pamajikan nu katilu, Nyi Icih, tapi gagal !