Atuh harita keneh Nyi Icih disiksa ku Ki Barda mani jejeritan; euweuh saurang ge jelema nu wani meper Ki Barda; padahal jejeritanana kadenge ku sabudereun eta kampung ; euweuh hiji ge nu wani datang, misah. Kabeneran harita Mawar Hideung ngaliwat ka tempat Ki Barda nyiksa pamajikana na tea ; atuh langsung we Mawar Hideung ngadeukeutan tempat nu kadenge aya sora nu jejeritan. Mawar Hideung barang nempo kumaha sadisna Ki Barda nyiksa pamajikanana, geus teu bisa nahan deui, terus we teu tata pasini deui nyerang ka Ki Barda. Ciaaat ! duk ! aduuh ! Ki Barda kokoloyongan kajejek hariguna; padahal nu dituju ku Mawar Hideung sirahna pisan; tapi kulantaran Ki Barda memang Jagoan, masing serangan Mawar Hideung ngadadak pisan, tapi tetep kareret ku Ki Barda; Ki Barda nyingcet mani kesit pisan; tapi keukeuh kakeunaan, sabab Mawar Hideung leuwih kesit ti batan Ki Barda. Reuwas jeung keuheul Ki Barda nyorowok :”Eh siah jurig ! lebokeun tetelo ! saha maneh wawanianan pipilueun urusan rumah tangga aing hah !?” Mawar Hideung teu ngajawab, panonna nu cureuleuk molotot ambek ka Ki Barda; Ki Barda rada deg2an nenjo Mawar Hideung, enya geulis rupana mah, cek hatena, tapi sorotna eta mata kacida wibawana; ret manehna nempo baju Mawar Hideung, aya gambar kembang Ros nu warna na hideung; manehna kungsi oge ngadenge yen aya Pendekar anyar, awewe ngaranna Mawar Hideung; ah moal salah ieu mangkelukna. Ku sabab geus ngadenge beja yen Mawar Hideung teh luhur Elmu kanuraganana, Ki Barda teu wani gagabah, da tadi kabuktian, manehna nu sakitu kasohor jago bisa katajong, masing enya ge dibongohan. Pok we manehna nyarita:”Euh sampeyaan pasti nu disebut Mawar Hideung tea nya ? Naon urusanana sampeyan pipilueun urusan Kula, hah !?”HANCA
