Ajot jeung batur-baturna ngala suluh ka leuweung bari ngabuburit. Wanci bedug
lohor Ajot jeung batur-baturna geus salse mengkeutan suluh. Suluhna tangkal anu
garing jeung aralus, Kilaban anu kateulah ku balarea ngarupakeun suluh anu pang
hadena, dibeuleumna ngareung jeung ruhay, gancang asak kana nyangu jeung
angeunan. Suluh dibengkeut make areuy carulang dijieun dua hurunan, panaggulna
make tangkal Kijeret. Geus saralse Ajot jeung batur-baturna marulang bari
maranggul suluh sewang-sewang. Ditengah jalan deukeut susukan sisi lembur
Cipicung Ajot eureun nurunkeun tanggungan suluh, terus manehna leumpang ka
susukan ngagujubarkeun awak terus leup teuleum lila pisan terus mucunghul bari
beungeut katenjona sumringah ngarasakeun kalegaan. Ceuk salah sahiji
baturna ngarana Agus anu nenjo Ajot teuleumna lila teuing nyeleketek ngomong
"Teuleum bari pelem nya Jot?". Puguh bae si Ajot teu tarima "Ari dia sok suudon
bae, aing mah teuleum ge ngaleungitkeun
hawa panas anu teu kawawa" tembalna bari hate leutikna ngaku manehna teuleum
bari nginum cai.