“Bujur Piyan batamu lawan Ulun; batamu lawan Si Setan Alas Kobar buahayya ! Hahahaha. Ulun bakal manjadikan Piyan Wakil. Tah pan luhur pisan pangkat Piyan.” Mawar Hideung mani kekerot ku ambek2na; tapi bari lucu ngadenge pangbibita Si Raja Racun nu lain bae bakal ditolak, tapi pikacuaeun pisan. Ayeuna Mawar Hideung nyorowok bari nulak cangkeng :”Ngomong naon andika heh si goreng pucus ! Aing mah teu sudi najis teuing ngabalad jeung sampeyan sakabeh ! Malah ayeuna aing bakal merenkeun sampeyan sakabehna!” Amarahna eta opat Kapala Begal Siluman Laut Kaler geus teu kaampeuh deui; ayeuna opatanana maju ngoroyok Mawar Hideung. Cek di na angkeuhanana pasti Mawar Hideung bisa ditalukkeun, komo ditambah Racunna si Raja Racun mah. Mawar Hideung susuitan, tanda siap tarung tutumpuran ngalawan eta opat jadug. Rame pisan eta nu tararung ngadu jajaten teh, estu matak gigis nu lalajo; lantaran gerakan maranehna Kacida karesitna; ngan ukur kaciri kolebatna wungkul. Sanggeus sapuluh jurus; Si Tenjrag Bumi kapeupeuh deui igana, mani rada ngoloyong katukang. Barang si Manuk Dadali ngabarengan nyerang ku gerak kilatna; kapiheulaan ku gerak nu leuwih cepet ti Mawar Hideung, Jeplak kacabok pipina pisan; atuh mani kokoloyongan lieur. Untung Mawar Hideung teu terus nyerang lantaran kapegat ku Tapak Waja; nya kapaksa Mawar Hideung mundur. Karasa tonggongna aya nu ninggang; Mawar hideung salto ngajauhan . Rada reuwas oge Mawar Hideung, lantaran karasa ieu koroyokan beurat pisan; napasna rada sesek oge; tapi lain ge Mawar Hideung mun mundur ku kitu2 bae mah; manehna ningkatkeun Elmuna atuh ayeuna mah nu opatan ge ampir teu nempo gerakan Mawar Hideung; nu katenjo ngan kolebatna wungkul. Atuh harita keneh plak ! Plok ! nu opatan pada kabagi cabokan sakali sewang ! Si Raja Racun ayeuna mah ngaluarkeun sejatana model suling ti na awi; tapi euweuh liangan; terus we manehna niup bul we ti na eta bungbung awi teh aya kebul warnana semu hejo ngelun terus nuju ka Mawar Hideung.HANCA
