Mawar Hideung waspada, yen ayeuna si Raja Racun geus ngaluarkeun racunna; ngan sakilat Mawar Hideung oge geus ngabelesatkeun senjata rahasiana ! Aduuuh ! kadenge sababaraha kali eta nu opatan kadenge nyorowok ku sabab nyeri; kaciri tikoro nu opat begal geus katancep ku senjatana Mawar Hideung; opatanana ting jarungkel, duka maot duka tacan. Mawar Hideung nyanghareupan para Begal nu loba nu keur arolohok mata simeuteun; barang Mawar Hideung ngangkat senjata Rahasiana, berebet we eta anak buah begal teh kalabur paheula heula; loba nu lumpat bari wer2 kiih ku sieun2na. Di tempat eta ayeuna mah lenglang; ngan aya nu pating solengkrah we nu kaparaehan, atawa nu binasa. Mawar Hideung masih luak lieuk sakeudeung; keur kitu karasa lieur; brek we Mawar Hideung diuk, terus ngalempengkeun pernapasan; rupana Mawar Hideung oge geus ngisep saeutik hawa racun si Raja Racun; karasa awakna rada laleuleus; tapi terus we Mawar Hideung konsentrasi. Untung para begal geus barirat, mun henteu mah matak bahaya pisan. Mawar Hideung ngarasa urat2na nyareri; wah racun teh jahat pisan. Rada reuwas oge Mawar Hideung; tapi gancang nenangkeun diri; sabab mun henteu racun bakal leuwih gancang nyebarna. Keur manehna diuk kitu; asa karasa aya angin ngahiliwir; geus kitu karasa saperti aya nu diuk satukangeun manehna; Mawar Hideung terus we peureum; teu kanyahoan siga aya tanaga nu ngabantuan manehna ngusir racun; eta jirim teh estu ngeteyep pisan teu kaciri Barang Mawar Hideung beunta, sanggeus sawatara lilanaa, manehna nenjo digigireunana aya hiji bungkusan leutik jeung hiji surat; barang dibaca mapatahan kudu ati2 jeung eta obat anti racun cenah gancang diinum; lamun iinditan kudu nyiapkeun obat; bisi kabongohan. Mawar Hideung rungah ringeuh, teu nyaho saha nu nulungan manehna; tapi tadi karasa aya nu diuk satukangeun manehna jeung nyalurkeun tanaga ngabantu miceun racun ti jero awakna, Manehna yakin aya hiji Pendekar sakti nu ngahaja nulungan manehna; teg we Mawar Hideung ka bapana; wah mungkin wae bapana geus apal ayeuna mah yen anakna keur ngalalana, terus nulungan. HANCA